8 عوامل ممكن تأثر على فرص الحمل عندك
مش كل الازواج بيكونوا محظوظين وبيحصل معاهم الحمل على طول ، في حالات بيحاولوا كتير وبيفشلوا ، وبتكون مشكلة صعبة ، ولكن السؤال هنا اللي هتسأليه لنفسك ، هل اقدر اعمل حاجة في ده؟ في حين ان بعض العوامل اللي ممكن تأثر على خصوبة المرأة بتكون خارجة عن ارادتها ، في حاجات تانية تقدري انتي تتحكمي فيها ، وده اللي هنعرفه النهاردة مع بعض من خلال السطور الجايه ، هنقولك ايه هي عوامل التأثير على الحمل اللي تقدري تغيريها او تتحكمي فيها.
عوامل التأثير على الحمل:
1- الاجهاد المستمر:
لو دايما تحت ضغط واجهاد مستمر ، فتوقعي انك هتلاقي مستويات عالية من الفا اميليز في الدم (وده يعتبر عنصر بيولوجي للاجهاد) ، وده ممكن انه يقلل من فرص الحمل بنسبة كبيرة ممكن توصل ل 29% ، وده ممكن يخلي العقم مشكلة حقيقية خصوصا بالنسبة للنساء اللي بيشتغلوا اللي بيتعرضوا لاجهاد زيادة ، فلو الاجهاد بيأثر بشكل سلبي على حياتك حاولي تمارسي اليوجا او التأمل بانتظام ، ولو الاجهاد مستمر عندك ، حاولي تتخلصي من المشكلة الاساسية اللي بتسبب لك التوتر والاجهاد في حياتك ، او تقدري تستعيني بمتخصص يساعدك في ده بشكل افضل.
2- الوجبات السريعة:
البيتزا, التشيز برجر, البطاطس المحمرة مش بس بتضيف وزن زيادة لجسمك وحوالين منطقة الخصر ولكن بتعمل حاجة اخطر ، الوجبات السريعة معروفة بمستوياتها العالية من الكوليسترول اللي الابحاث اثبتت انها مش بس بتسد الشرايين ، ولكن كمان بتدخل مع توليف جسمك للهرمونات الجنسية ، التستوستيرون والبروجسترون ، وهي هرمونات حيوية جدا لما الموضوع يتعلق بالحمل.
3- الوزن:
سواء بتعاني من زيادة الوزن او نقص الوزن ، فهو اكيد انه ليه تأثير على فرص الحمل ، لو مؤشر كتلة جسمك عالي ، فالوزن الزيادة ممكن يأثر على انتاج الهرمون الجنسي ، بمجرد ما ترتفع مستويات الدهون في الجسم بنسبة من 10 – 15% اكتر من الطبيعي ، توقعي ان جسمك هيكون مليان بالاستروجين ، وده هيأثر على الدورة الشهرية.
نقص الوزن كمان مشكلة ، لو مستويات الدهون في جسمك اقل بنسبة ما بين 10 – 15% عن المعدل الطبيعي ، الجسم في الحالة دي هيبقى عنده نقص في هرمون “اللبتين” المسئول عن التحكم في الجوع وسرعة التمثيل الغذائي ، ونقص اللبتين معناه عدم وجود دورة شهرية.
4- العمر:
زي ما قولنا قبل كده ان في بعض العوامل زي العمر خارجة عن سيطرة اي واحدة ، ولكن ده ميمعنش انك تفكري في المستقبل ، عادة سن اليأس ممكن يجي لاي ست في سن الاربعينات او الخمسينات مع عمرها تقريبا ، وده بيحصل لما المبيض بيتوقف عن اطلاق البويضات ، ولكن العمر الحقيقي اللي لازم تنتبهي له هو سن 35 ، بعد السن ده مش بس الحمل هيبقى صعب مع انخفاض كمية البويضات ونوعيتها ، ولكن كمان بيزيد خطر الاجهاض بنسبة 20 – 35% بسبب زيادة حدوث تشوهات الكروموسومات ، ودي الساعة البيولوجية اللي جوه الجسم هي اللي بتحدد ده.
5- التدخين:
التدخين مش بس مضر بالصحة بشكل عام ، ولكن كمان ممكن يقتل بشكل كبير فرصك يف الحمل ، وحسب ابحاث الجمعية الامريكية للطب التناسلي ، ان التدخين بيمثل تقريبا 13% من حالات العقم.
6- الكافيين:
لو انتي من محبات القهوة وبتحاولي في نفس الوقت في الحمل ، يبقى لازم تتجنبي القهوة والكافيين ، لان بعض الدراسات اثبتت ان الكافيين ممكن يقلل فرص الحمل ، لانه بيمنع تقلصات العضلات اللي بتساعد البويضة للوصول لقناتي فالوب ويتم تخصيبها ، ولكن عشان نكون منصفين في دراسات تانية بتقول القهوة مالهاش علاقة بالخصوبة.
7- جودة مخاط عنق الرحم:
مخاط عنق الرحم مطلوب لحماية الحيوانات المنوية اثناء انتقالها لقناتي فالوب للتخصيب ، وبالتالي فاي تشوهات في مخاط عنق الرحم ممكن انه يكون ليه تأثير كبير على فرصك في الحمل ، ويعتبر التدخين بشكل منتظم واحد من العوامل الرئيسية اللي ممكن تسبب عدم جودة مخاط عنق الرحم.
8- استخدام التليفون قبل النوم:
التعرض للضوء اللي خارج من اجهزتك الالكترونية قبل النوم على طول بيأثر على “الايقاع اليومي” ودورة النوم وجودته ، وده مش بس بيأدي لتقليل فرص الحمل بشكل عام ، ولكن كمان بيسبب انخفاض انتاج هرمون النوم اللي ممكن يأثر بشكل سلبي على نمو الجنين.
فلو انتي بتحاولي مع الحمل ، يبقى لازم تراجعي اسلوب حياتك والعادات اللي بتعمليها يوميا.
التغذية الصحية اثناء فترة الحمل: الاكلات المهمة واللي المفروض تتجنبيها
