تنضيف البشرة بالبرتقان في 3 خطوات بسيطة لبشرة مثالية
البرتقان مليان بمضادات الاكسدة وبيحتوي على مجموعة من المعادن والفيتامينات المهمة ، وهو مش بس مفيد صحيا ، ولكن كمان مفيد جدا للبشرة لو دخلتيه في الماسكات الطبيعية ، والنهاردة من خلال موضوعنا هنتعرف على طريقة تنضيف البشرة بالبرتقان في 3 خطوات بسيطة وسهلة للحصول على بشرة شابة ومثالية وخالية من العيوب.
تنضيف البشرة بالبرتقان:
الخطوة 1: غسول البرتقان لتنضيف البشرة
اول خطوة والاساسية هي الغسول اللي بيساعد على ازالة الاوساخ والاتربة والزيوت الزيادة وكل شوائب البشرة ، وبيخلي البشرة نضيفة.
المكونات:
1 معلقة كبيرة برتقان مهروس.
2 – 3 معالق صغيرة لبن.
الطريقة:
في بوله اخلطي البرتقان المهروس مع اللبن ، وزعي الخليط على البشرة ودلكيه في حركات دائرية لمدة دقيقتين تقريبا ، وبدعها اغسليه بالمية.
وبكده تبقي انتهيتي من الخطوة الاولى البرتقان بيساعد على التخلص من تجاعيد البشرة وبينقيها من اي شوائب ، وممكن تستخدمي قشر البرتقان المجفف والمفروم بدل من البرتقان المهروس.
واللبن غني بفيتامين B, واحماض الفا هيدروكسي, والكالسيوم, ومضادات الاكسدة القوية اللي ليها فوايد كتير للبشرة ، وهيساعد على تغذية الجلد بعمق ، وهيحافظ على ترطيبها.
الخطوة 2: سكراب البرتقان
السكراب او المقشر بيساعد على ازالة خلايا الجلد الميتة وتقشير الجلد.
المكونات:
2 معلقة كبيرة عصير برتقان.
1 معلقة كبيرة شوفان.
الطريقة:
في بولة اخلطي عصير البرتقان مع الشوفان وامزجيهم مع بعض كويس ، سيبي الخليط يرتاح لمدة 5 دقايق ، بعدها افركي الخليط على البشرة في حركات دائرية لمدة 5 – 6 دقايق ، بعدها اغسلي بشرتك بالمية.
الخطوة دي بتساعد في ازالة كل خلايا الجلد الميتة من البشرة ، وبتنعمها وبتخليها صحية.
عصير البرتقان هيحافظ على شباب وتوهج البشرة.
الشوفان هيمتص الزيوت الزيادة من البشرة ، وهيساعد على علاج حب الشباب ، وكمان بيحتوي على خصائص مضادة للاكسدة ومضادات الالتهابات اللي بتساعد على علاج جفاف الجلد وازالة خلايا الجلد الميتة.
الخطوة 3: ماسك البرتقان
خطوة الماسك هي الخطوة الاخيرة واللي بتساعد على ترطيب البشرة ، وبتحسن مظهر البشرة بشكل عام.
المكونات:
2 معلقة كبيرة عصير برتقان.
1 معلقة كبيرة حمص مطحون.
1 معلقة صغيرة مية ورد.
الطريقة:
اخلطي عصير البرتقان مع الحمص المطحون ومية الورد ، امزجي المكونات مع بعض كويس لحد ما يتكون عندك عجينة ناعمة ، وزعي الخليط على البشرة وسيبيه لمدة 20 دقيقة لحد ما ينشف ، وبعدها اغسليه بالمية ، كرري الماسك ده مرتين في الاسبوع.
الماسك ده بيساعد على تنضيف وتطهير البشرة والحفاظ على درجة حموضة البشرة ، بيحتوي على مضادات للبكتيريا وبيقلل من تصبغات الجلد.
عصير البرتقان يعتبر مصدر غني لفيتامين C واي حاجة غنية بفيتامين C هي معروفة على طول بفوايدها الرائعة لتفتيح لون البشرة ، عصير البرتقان بيساعد على تقليل الميلانين اللي بيتسبب في غمقان البشرة.
مية الورد بتحتوي على مضادات الاكسدة اللي بتساعد على تقوية خلايا الجلد وتجديد انسجة الجلد ، ولان مية الورد بتحتوي على خصائص قابضة للبشرة فهو بيساعد على تنضيف لمسام وتوحيد لون البشرة.
الحمص المطحون معروف انه بيساعد على ازالة الاوساخ والسموم من البشرة وتنضيفها بعمق ، وبيساعد كمان على امتصاص الزيوت الزيادة من البشرة ، وفي نفس الوقت من غير ما يسبب جفاف للجلد.
