طريقة عمل وصفة الفراخ بالثوم بالخطوات

كلنا بنحب الفراخ ، لكن ممكن يعدي علينا اوقات نزهق من الطرق التقليدية وبنبقى عايزين نغير شوية ونجرب وصفات جديدة ، والنهاردة جايبين لبنات حوا طريقة سهلة وطعمها لذيذ جدا وهي وصفة الفراخ بالثوم.

وصفة الفراخ بالثوم:

الكمية تكفي 4 اشخاص.

المكونات:

– 4 افخاد فراخ.

– ملح, لتتبيل الفراخ.

– فلفل اسود, لتتبيل الفراخ.

– خلطة توابل , لتتبيل الفراخ (اي توابل تفضليها).

– 3 حبات بصل صغيرة, مفرومة.

– 40 فص ثوم.

– ½ كوباية شوربة فراخ (120 مل).

– 3 اعواد بقدونس.

– 1 معلقة صغيرة هندباء هندية مجففة “سريس”, وممكن تستبدليه بالزعتر.

– ¾ كوباية شوربة فراخ (180 مل).

– 450 جرام بطاطس متقطعة مكعبات.

طريقة التحضير:

1- سخني الفرن على درجة حرارة 180 درجة مئوية.

2- تبلي الفراخ بالملح, والفلفل, وخليط التوابل.

3- في طاسة كبيرة او صينيه ممكن تدخل الفرن سخني شوية زيت او زبدة على النار ، وحمري الفراخ على الناحيتين لمدة من 10 – 15 دقيقة بالتساوي لكل جنب لحد ما لونه يبقى بني دهبي.

4- طلعي الفراخ من الزيت على طبق وسيبيها على جنب.

5- ضيفي البصل المفروم للزيت مكان تحمير الفراخ ، وشوحيه لمدة 5 دقايق على نار متوسطة.

6- ضيفي فصوص الثوم ، وشوحيها لمدة دقيقتين.

7- ضيفي ½ كوباية شوربة الفراخ ، وسيبيها تغلي لحد ما تقل شوية.

8- ضيفي الفراخ, البطاطس المتقطعة, اعواد البقدونس, والهندباء, وبعدين ضيفي ¾ كوباية شوربة الفراخ.

9- دخلي الفراخ في الفرن لمدة من 20 – 25 دقيقة ، او لحد ما الفراخ تستوي.

10- قدميها مع الخبز والخضروات ، او الارز والخضروات.

وبالهنا والشفا.

بالصور والخطوات .. طريقة عمل وصفة الفراخ بالكريمة والمسطردة