7 طرق لتجنب تهيج الجلد اثناء لبس الماسك بره البيت
في الفترة الصعبة اللي كل العالم بيعشيها بسبب فيروس كورونا ، حكومات العالم كلها فرضت لبس الماسك بشكل اجباري على كل الناس عشان نحمي نفسنا ونمنع من انتشار المرض ، مع بداية تخفيف الحظر وفتح المحلات والمطاعم بالتدريج ، ولكن برغم ان الماسك هيحمينا من الفيروس الا انه لبسه لفترات طويلة ممكن يسبب تهيج بشرتك ، ويتسبب في ظهور بثور جلدية او تغيرات في نسيج البشرة ، والنهاردة هنقولك 7 طرق لتجنب تهيج الجلد واي مشاكل تانية ممكن تحصل اثناء لبس الماسك.
طرق لتجنب تهيج الجلد:
1- اختاري الخامة المناسبة:
لازم خامة الماسك اللي هتختاريه يسمح لك بالتنفس كويس, ناعم , طبيعي ، وممكن تعتمدي على الماسك القطن لانه الاكتر سهولة في الاستخدام ، ممكن كمان تستخدمي سكارف قطن او باندانا ، الماسكات اللي بتكون مصنوعة من خامات صناعية ممكن تسبب تهيج الجلد ، فلو لاحظتي ان بشرتك بقت حساسة اكتر بعد لبس نوع معين من الماسكات ، في الحالة دي استبدليه بنوع طبيعي اكتر ، وفي بعض الاراء بتنصح بلبس اكتر من طبقة من القطن فوق بعض عشان تعملي حاجز مفلتر يحميكي من البكتيريا والجراثيم.
2- حافظي على نضافة البشرة:
لو هتخرجي لاي مشوار ، نضفي بشرتك بالغسول المناسب قبل ما تخرجي ، ولما ترجعي البيت اتأكدي انك تنضفي بشرتك تاني بالغسول من اي اتربة او اوساخ ، ولو انتي بشرتك دهنية اوي وبيطلع فيها حبوب وبثور بسهولة ، اتأكدي انك تغسلي بشرتك بشكل صح ، واستخدام تونر بعد الغسول لتقليل حجم المسام وتجنب البثور.
3- اتجنبي المكياج:
افضل طريقة عشان تضمني ان بشرتك تفضل صافية وتمنعي اي حساسية مفرطة او مشاكل اتجنبي وضع المكياج تماما ، وفي النهاية بشرتك محتاجة استراحة ومحتاجة انها تتنفس ، والمكياج بيمنع ده ، فلو انتي بشرتك معرضة بشكل كبير لحب الشباب ، فالمكياج لازم يبقى اخر حاجة تفكري فيها في خروجاتك اليومية.
4- عالجي حب الشباب:
لو انتي بشرتك اصلا بتعاني من حب الشباب فاكيد وضع اي مادة غريبة فوقيه ممكن تزود المشكلة ، خصوصا في حالات حب الشباب الشديدة ، عشان كده زي ما قولنا في البداية خليكي حذره من خامة الماسك اللي هتلبسيه واختاري خامة طبيعية، واتأكدي من علاج حب الشباب عشان لبس الماسك ميزودش المشكلة.
5- اتجنبي التقشير لبعض الوقت:
تقشير البشرة بقوة للتخلص من حب الشباب مش افضل فكرة ممكن تتعمل لان ده ممكن يأدي لاحمرار الوش وتهيج البشرة اكتر ، والتقشير الزيادة ممكن يسبب تلف الطبقات الرقيقة من البشرة ويخلي البشرة معرضة لمشاكل كتير ، التزمي بس باستخدام المنظفات العميقة, او انواع الغسول الرغوية, او غسول الوجه الزيتي خلال الوقت ده ، واستخدام منظف بيحتوي على حمض الساليسيليك افضل اختيار لانه هيحمي البشرة ، ومهم جدا تغسلي وشك اول ما ترجعي البيت او تاخدي شاور وتتخلصي من كل البكتيريا والاوساخ ، وانهي روتين العناية ببشرتك بالتونر, والكريم المرطب الليلي.
6- اعملي ماسك مرطب للبشرة:
في الفترة دي يمكن كتير مننا نفسيتنا مش حلوة ومش بنهتم ببشرتنا كفاية ، لكن رغم كل حاجة بشرتك محتاجة لعناية ، حاولي تعملي ماسك مرطب من وقت للتاني لو لاحظتي اي جفاف في بشرتك ، اعتمدي على الماسكات اللي بتحتوي على مية الورد, جل الصبار, او حمض الساليسيليك لو بشرتك دهنية ومعرضة لحب الشباب.
7- رطبي البشرة يوميا:
النصيحة مهمة جدا بشكل خاص للي بيعانوا من البشرة الجافة ، الحفاظ على رطوبة البشرة خطوة مهمة جدا عشان تحافظي على شبابها ونضارتها ، لو بتعاني من البثور ركزي على علاجات حب الشباب ، ولو بشرتك جافة ركزي على الحفاظ على بشرتك رطبة ومنتعشة.
في النهاية لو حصل تهيج في بشرتك متهمليش ده وعالجيه لانه لو اهملتيه ممكن المشكلة تزيد وتبقى اسوأ ، ونحاول في الفترة دي على قد ما نقدر نحافظ على التباعد الاجتماعي ، ونخرج للضرورة بس.
