10 اسباب ممكن تخليكي تنهي العلاقة حتى لو في حالة حب

بقلمريهام محمود فيعلاقات visibility862

الحب والرومانسية اكيد حاجات جميلة كلنا بنتمنى نعيشها ، ولكن مع العلاقات الطويلة ، الحب لوحده مش كفاية لضمان علاقة صحية ومتوازنة وسعيدة ، عشان كده ساعات كتير ممكن يكون الشخص في حالة حب عميقة ولكن مع ذلك بيختار الانفصال عن شريكه ، ودي بتبقى حاجة مش سهلة ابدا لما بتحصل ، والحاجة المحزنة او المؤلمة اكتر انه عادة كان ممكن منع الاسباب اللي تخليكي تعملي كده ، وغالبا بتكون حاجات وتفاصيل صغيرة ولكن مهمة بشكل كبير جدا ، وفي كتير من الحالات الحاجات دي هي اللي بتعمل الفرق بين الشريك الصح فعلا وما بين مجرد شريك مؤقت ، والنهاردة من خلال موضوعنا هنقولك اسباب انهاء المرأة للعلاقة ، حتى لو في حالة حب.

اسباب انهاء المرأة للعلاقة:

1- مش موجود:

لما بتكوني في علاقة مع شخص ما ، فاكيد بتبقي عايزة تكوني معاه ، وتقضوا الوقت سوا ، وتكوني حاسه بالراحة وانتوا مع بعض ، وتستمتعوا بكل حاجة بينكم والتواريخ المهمة ، وتكونوا جنب بعض دايما ، ولكن في بعض الاحيان الشريك بيكون دايما عنده حجج غياب.

– ممكن انه بيقضي وقت اكبر مع اصحابه.

– بيشتغل لحد وقت متأخر و 90% من وقته مشغول.

– ممكن يكون وقت فراغه مشغول بالكامل بهوايات.

كل ده بيخليكي في زاوية لوحدك ، وفي اخر القايمة في اولويات شريكك ، او على الاقل مش في مكان قريب من الحاجات المهمة عنده ، والحاجة المحزنة اكتر ان الاشخاص اللي بيتصرفوا كده هما في كتير من الاوقات بيكونوا طيبين ومش بيتصرفوا كده عن قصد ولا بتكون طبيعتهم كده.

وفي الغالب بيكون الزوج واخد شريكته كأمر مسلم بيه وموجودة في اي وقت ، يعني هيغيب وهينشغل وهيرجع يلاقيها موجودة عادي ، ودي حاجة لما بتحصل بتبقى مش مبشرة بالخير لاي علاقة.

2- الشعور بالوحدة وعدم الاعتراف بيها:

كلنا بنبقى عايزين نحس اننا مهمين ، ولو حتى بس للاشخاص المهمين بالنسبة لنا بس ، ولو الست بتحس انها دايما لوحدها من غير دعم شريكها ، فاكيد هتسأل نفسها هل فعلا هي مهمة بالنسبة لشريكها ولا لا؟

وده معناه ان المفروض الست لما تيجي تحكي لشريكها عن مشاكلها ، لازم يسمعها وميصدهاش او يتحجج بانشغال او انه مش قادر يسمع ، لما تقول حاجة هي متحمسة لها اوي ، ميتردش عليها بمجرد حركة بالراس من غير كلام او يبص في التليفون وميسمعش باهتمام ، لما تتكلم عن اي خطط مستقبلية او اي فكرة عندها ، مينفعش يرفضها او ياخد فكرتها باستهزاء.

اسباب انهاء المرأة للعلاقة
اسباب انهاء المرأة للعلاقة

3- انعدام الامان:

كلنا ممكن تعدي علينا لحظات نحس فيها بعدم الامان ، والكلام عن احساسك بعدم الامان مع شريكك ده هيقربوا من بعض اكتر ، ولكن المشكلة لما احساس عدم الامان ده يبقى موجود في كل حاجة في العلاقة في الحالة دي الست بتفكر انها تنهي العلاقة وتمشي.

انعدام الامان بيولد الغيرة ، والغيرة بتولد السلوك المسيطر ، وهتبدأ مراقبة كل تصرفات الشريك والشك فيها.

وكلنا ممكن نعاني من احساس عدم الامان ولكن لازم التعامل معاه وحله ، لانه مش المفروض اننا نسيبه يسيطر على حياتنا ، فلو لقيت شريكتك حاسه بالغيرة عليك بشكل مفرط او مش واثقة فيك باي شكل ، اسألها عن سبب تصرفاتها ، متتعاملش مع الموضوع بتجاهل من غير حل اسباب المشكلة.

4- توقف الشغف (خصوصا في العلاقة الحميمية):

العلاقة الحميمية ممكن متكونش عامل رئيسي في كل العلاقات ، ولكن هي مهمة في معظمها اكيد ، لانه الحقيقة ان العلاقة الحميمية مهمة جدا للعلاقة الايجابية السعيدة ، واللحظات الحميمية المملة والروتينية اكيد مافيهاش متعة ، العلاقة على الاقل لازم تكون فيها عاطفة الى حد ما ، ومتبقاش روتين او مجرد تحصيل حاصل.

واكيد العلاقة لازم تكون بموافقة الطرفين ، عشان كده مينفعش ان في وقت من الاوقات طرف يجبر التاني على العلاقة لمجرد انه عايز يحافظ عليه وخلاص ، ولكن من حق الست او اي شخص انه ينهي او يمشي لو مش راضي عن العلاقة.

ولازم يتحط في الاعتبار ان الشغف مش بس في العلاقة الحميمية ، ولكن في العلاقة ككل ، لازم الست تحس انها لسه جذابة في عين شريكها بالكلام الحلو دايما ، وتجربة حاجات جديدة مع بعض جوه وبره اوضة النوم ، والاستمتاع مع بعض بكل حاجة خاصة بالعاطفة اللي في اوقات كتير ممكن نتجاهلها من غير قصد.

اسباب انهاء المرأة للعلاقة

5- المقارنات:

اكيد مافيش حد يحب انه يتقارن بشخص تاني ، خصوصا لو مقارنة سلبية ، وده اسوأ لما بيتعمل مع الشريك ، اللي هو المفروض الشخص اللي بتحبيه وحطاه في مكانه فوق اي شخص تاني.

لو الشريك قارن مراته باي حد كان يعرفه قبل كده ، او حد في العيلة او الاصحاب ، فهو كده يبقى بيجيب المشاكل في العلاقة ، اكيد مافيش حد يحب يبقى مجرد ظل لشخص تاني.

المقارنات المستمرة ممكن تكون مضرة جدا لاحترام الشخص لنفسه لدرجة انها ممكن تعتبرها اساءة معاملة عاطفية ، المقارنات بتخلي اي شخص يحس بعدم التقدير ، وانه مش جذاب ، مش ذكي ، ومجموعة كبيرة من المشاعر السلبية ، وكقاعدة عامة ان الشخص اللي بيقارن صديق او زوجة بشخص تاني شخص ميستحقش الاستمرار معاه.

6- العطاء الدائم ، وعدم استقبال مقابل:

الست بتكون محتاجة مشاركة وعايزة شريك يدي في العلاقة زي ما هي بتدي ، لان العلاقة الصحية هي طريق باتجاهين ، ومافيش علاقة في العالم ممكن انها تستمر بشكل صح لما طرف من الاتنين يدي والطرف التاني ياخد او يستقبل بس.

– هل المفروض ان الست بس هي اللي تاخد اجازة من شغلها لو حصلت اي حاجة والمفروض هي بس اللي تضحي؟

– هل المفروض هي بس اللي تشتري الهدايا ونادرا لما هي يجيلها هدية؟

– هل لازم هي اللي دايما تدي بحب ومتستقبلش نفس القدر من الحب والعاطفة؟

– كل الحاجات دي بتخلي العلاقة مش متوازنة ، وبتشجع الست انها تنهي العلاقة ، حتى لو في حالة حب.

اسباب انهاء المرأة للعلاقة

7- انعدام العاطفة:

الجانب العاطفي مهم جدا في العلاقات ، لانه ضروري لاستمرار اي علاقة ، الست بتحب ان شريكها يكون متاح عاطفيا ، بتحب تعرف رغبات شريكها ، وانه يعبر دايما عن اللي جواه ، لان الست لو حست ببرود او عدم اهتمام من شريكها ده هيخليها تحس بعدم التقدير وانها مش مهمة ، وعدم الاهتمام ده هيخليها تفكر انها تنهي العلاقة وتمشي.

8- الكذب, السرية, ونقص الاتصال:

اي شخص بيسعى لعلاقة لمدة طويلة وتستمر ، لازم يعرف ان الكذب, والاسرار لازم يتم استبعادهم من العلاقة ، لان الكذب والاسرار ممكن يسببوا توتر وضغط في العلاقة ، وممكن انه يدمر ثقة المرأة في شريكها تماما.

العلاقات الصحية بتعتمد على التواصل والصدق بين الطرفين ، من غير الحاجات دي ، العلاقة بيكون محكوم عليها بالفشل من البداية ، ايه اللي يخلي الشريك يبقى عنده اسرار او حاجات كتير يخفيها او بيكدب كتير؟

بعض الاشخاص ممكن يكدبوا عشان يخلي شريكته متغيرش او تضايق ، يعني مثلا ممكن يكذب عى شريكته بخصوص رسالة او مكالمة من صديقة قديمة ، لتفادي ان ده ممكن يزعجك او يضايقك حتى لو مافيش حاجة مريبة او غلط ، او يتظاهر انه كويس بخصوص حاجة معينة على عكس الواقع.

والكذب يعتبر شبكة متعقدة في بعض لو الشخص دخل فيها مش هيعرف يخرج منها ، وبدل ما تتقال نص الحقيقة في اي حاجة ، اختار الصدق والتواصل الايجابي المفتوح عشان العلاقة تستمر ، لان لو حصل غير كده الست ممكن تاخد قرار انهاء العلاقة.

9- النضج:

عدم النضج خطير جدا على العلاقة ، لان الست ممكن تفكر تمشي لو حست ان شريكها:

– مالوش اهداف في الحياة.

– مش عارف هو عايز ايه.

– مش بيدي اولوية للحاجات المهمة فوق رغباتة العشوائية.

– مش بيعرف ازاي يوفر فلوس.

– مش بيقدر يقوم بالمهام الكبيرة.

– لو متهور اغلب الوقت.

– لو ميعتمدش عليه على الاطلاق.

المرأة او اي شخص في علاقة عموما ، بيحتاج انه يعتمد على شريكه ، فلو مثلا الشريك فكر انه يسيب شغله والمخاطرة بمستقبله على مزاجه بخطوة مش محسوبة ومن غير تفكير ، فده هيخليكي حاسه بعدم الامان في العلاقة.

10- التغيير:

التغيير امر لا مفر منه ، وده في بعض الاحيان للاسف ممكن يأدي لانهاء العلاقات ، وده تقريبا الحاجة الوحيدة اللي مافيش في ايدنا كتير اننا نعمله عشان نصلحه.

الست ممكن تنهي العلاقة لو حست ان شريكها اتغير وبقى شخص مختلف تماما عن اللي هي ارتبطت بيه ، وانها مبقتش قادرة تتعرف على الشخص اللي وقعت في حبه في يوم من الايام ، والطرفين بقت حياتهم ماشية في اتجاهين مختلفين.

واحيانا بيكون التغيير هو الافضل للطرفين ، وبينمي العلاقة ، ولكن في الحالة دي لازم يكون في تواصل مفتوح بين الطرفين ، ويتناقشوا في التغيرات الحياتية المحتملة ، او تغيير الاهداف ، او التغيرات الشخصية اللي بتحصل ، الزوجين ممكن يكبروا مع بعض ويكملوا حياتهم مع بعض للابد ، ولكن عليهم انهم يبذلوا مجهود.

في النهاية سواء الست او الراجل ، محتاجين لتقدير واحترام في العلاقة ، ولو شريكك بيعمل الاخطاء اللي احنا قولناها دي ، حاولي تتواصلي معاه وتحسني العلاقة ، ولو انتي اللي بتقعي في الاخطاء دي يبقى دده الوقت اللي تحاولي تراجعي نفسك وتصرفاتك فيه.

7 علامات تقولك انك عايشة حياة زوجية مش سعيدة