4 وصفات طبيعية لتفتيح البشرة خلال اسبوع واحد بس
ممكن اننا نوصل دايما لبشرة نضرة وفاتحة وخالية من العيوب ، ونقدر نحسن بشرتنا ونقلل من البقع الغامقة بشوية مجهود وعناية ، وبطرق مش مكلفة وكلها طبيعية وبمكونات متوفرة في كل بيت ، والنهاردة جايبين لكل بنات حوا 4 وصفات طبيعية لتفتيح البشرة بشكل سريع.
وصفات طبيعية لتفتيح البشرة:
الوصفة (1):
من اشهر العلاجات المنزلية اللي بتساعد على تفتيح البشرة هو وصفة دقيق الحمص واللبن الرايب والليمون ، والوصفة دي تقريبا تعتبر من افضل الوصفات لتحسين لون البشرة.
الحاجات اللي هتحتاجيها:
1 معلقة كبيرة دقيق حمص.
½ معلقة كبيرة كركم.
عصير ليمون على قد ما تحتاجي عشان تعجني المكونات.
الطريقة:
في طبق اخلطي دقيق الحمص مع الكركم وضيفي لهم عصير الليمون لحد ما تتكون عندك عجينة قوامها مناسب ، ولو بشرتك حساسة من الليمون ضيفي كام نقطة ليمون بس واعجني الخليط بمية الورد.
افردي الماسك على بشرتك وسيبيه لمدة 15 دقيقة لحد ما ينشف ، وبعدين اغسليه بالمية.
الوصفة (2):
اللبن كمان واحد من المكونات الفعالة اللي بتساعد على تفتيح البشرة.
في بولة صغيرة حطي شوية لبن وبقطنة ادهني بشرتك كلها باللبن ، دلكيه لمدة دقيقتين ، وبعدين سيبيه لحد ما ينشف ، بعدها حطي طبقة تانية وسيبيها لحد ما تنشف ، كرري العملية دي من 4 – 5 مرات ورا بعض ، وبعدها اغسلي بشرتك بالمية الباردة.
حمض اللاكتيك الموجود في اللبن هيقلل بالتدريج من تصبغ الجلد ، وهيأدي لتفتيح البشرة.
الوصفة (3):
الوصفة دي داخل فيها مكون فعال جدا وهي الطماطم اللي بتحتوي على حمض الليكوبين ، اللي بيحمي البشرة من اشعة الشمس وبيساعد على تقليل اسمرار البشرة من الشمس بشكل فوري.
والطماطم تعتبر من افضل المكونات اللي ممكن تعتمدي عليها لو عايزة تفتحي بشرتك.
الحاجات اللي هتحتاجيها:
من 2 – 3 معالق كبيرة طماطم مهروسة.
كام نقطة عصير ليمون.
الطريقة:
اخلطي الطماطم مع عصير الليمون ، ادهني الخليط على بشرتك وسيبيه 20 دقيقة ، وبعدين اغسليه بالمية.
الوصفة (4):
الحاجات اللي هتحتاجيها:
1 معلقة كبيرة شاي اخضر بودر.
½ معلقة كبيرة لبن رايب.
½ معلقة كبيرة عسل.
الطريقة:
اخلطي الشاي الاخضر مع اللبن الرايب والعسل وامزجيهم مع بعض كويس ، ولو بشرتك دهنية ممكن تستبدلي اللبن الرايب باللبن العادي.
افردي الخليط على البشرة وسيبيه لمدة 15 دقيقة لحد ما ينشف ، وبعدها اغسليه بالمية.
