نصايح للاكل الصحي اثناء انتشار فيروس كورونا

بقلمريهام محمود فيصحة visibility1

اثناء انتشار فيروس كورونا احنا محتاجين نركز على الاكل الصحي المغذي اللي يمد الجسم بالفيتامينات اللي محتاجها للوقاية من الفيروس ، بالاضافة كمان اننا محتاجين حاجات نقدر نلاقيها بسهولة ومش مكلفة على اي بيت في ظل الظروف الاقتصادية اللي بنعيشها وان ممكن يكون في مواد غذائية مش متوفرة ، والنهاردة من خلال موضوعنا هنتعرف مع بعض على نصايح للاكل الصحي اللي المفروض نعتمد عليه خلال الفترة دي.

نصايح للاكل الصحي اثناء فيروس كورونا:

1- حافظي على اكل الفاكهة والخضروات:

ممكن يكون في بعض الاوقات في الفترة اللي احنا فيها دي الاسواق بتبقى مقفولة وبيكون صعب نشتري خضار طازة ، ولكن حاولي انك تشتري الخضار والفاكهة الطازة كل ما تلاقيها متاحة قدامك بقدر المكان ، تقدري تشتري كمية وتجمديها هتفضل محتفظة بمعظم العناصر الغذائية والنكهة بتاعتها ، وممكن تستخدمي الخضار الطازة لعمل كميات كبيرة من الشوربة واطباق الخضار المختلفة اللي هيخليها تدوم عندك لفترة اطول وفي نفس الوقت هتوفرلك اكلات لاكتر من يوم ، واللي تقدري كمان تجمديها وتاخدي منها تسخني كل ما تحتاجي.

نصايح للاكل الصحي
نصايح للاكل الصحي

2- اعتمدي على بدائل صحية مجففة او معلبة لو متوفرتش المنتجات الطازة:

اكيد المنتجات الطازة هي دايما الاختيار الافضل والصحي اكتر ، ولكن لو مش متوفرة في بدايل كتير صحية اللي سهل تخزينها وتجهيزها.

ممكن تخزني الفاصوليا المعلبة والحمص ، اللي بتمد الجسم بكتير من العناصر الغذائية ، لشهور او حتى لسنين ، وتقدري تدخليها في الاكل بطرق مختلفة ، الاسماك الزيتية المعلبة زي السردين, الماكريل, السلمون الغنية بالبروتينات واحماض اوميجا 3 الدهنية ومجموعة كبيرة من الفيتامينات والمعادن ، وكل الانواع دي ممكن تستخدميها باردة في السندوتشات, السلطات او اطباق المكرونة ، او مطبوخة في وجبة دافية.

الخضروات المعلبة زي الطماطم مثلا ، بتحتوي على كميات اقل من الفيتامينات من المنتجات الطازة ، ولكنها تعتبر اختيار احتياطي لو لقيتي صعوبة انك تجيبي منتجات طازة او خضار مجمد.

المنتجات المجففة زي الفاصوليا والبقوليات والحبوب زي العدس واللوبيا او الارز والكسكسي او الكينوا ، اختيارات مغذية ممكن تقعد معاكي فترة طويلة وفي نفس الوقت لذيذة وسعرها رخيص ومليانة بالفيتامينات وبتشبع ، ممكن كفطار تعتمدي على الشوفان المطبوخ مع اللبن او المية يعتبر اختيار ممتاز جدا ، وممكن تضيفي له زبادي, فواكة متقطعة او زبيب عشان تزودي من قيمتة الغذائية.

نصايح للاكل الصحي

3- خزني وجبات خفيفة صحية:

غالبا ممكن نحتاج وجبات خفيفة خلال النهار ، وخصوصا لو عندك اطفال ومحتاجين هيبقوا محتاجين سناكس في نص اليوم عشان تحافظ على نشاطهم ، وبدل ما تدي الاطفال وجبات مالحة او مسكرة اعتمدي على السناكس الصحية زي المكسرات,  الجبن, الزبادي (ويفضل تكون من غير سكر), الفواكة المتقطعة او المجففة, البيض المسلوق, او اي اختيارات تانية صحية متاحة قدامك ، الاطعمة دي بتبقى مغذية ولذيذة ومشبعة ، وبتساعد على بناء عادات غذائية صحية تستمر معاكي على طول.

نصايح للاكل الصحي

4- قللي من الاطعمة المصنعة بقدر الامكان:

على الرغم من ان الحصول على المنتجات الطازة مش دايما متاح في كل الاوقات ، لكن حاولي على قد ما تقدري انك تقللي من الاطعمة المصنعة ، لان الاطعمة المصنعة والوجبات الجاهزة والحلويات غنية بالدهون المشبعة والسكريات والملح ، فلو انتي مضطرة تشتري اطعمة مصنعة يبقى بصي على مكوناتها الاول وحاولي تختاري الحاجات الصحية منها اللي بتحتوي على كمية قليلة من المواد دي ، حاولي كمان تتجنبي المشروبات السكرية واستبدليها بشرب كمية كبيرة من المية ، واضافة الفاكهة والخضار زي الليمون, شرايح الخيار, التوت, الفراولة للمية تعتبر طريقة رائعة جدا لاضافة نكهة حلوة ومختلفة للمية.

نصايح للاكل الصحي

5- خلي الطبخ والاكل جزء ممتع ومفيد من روتين عيلتك:

الطبخ والاكل مع بعض تعتبر طريقة رائعة جدا لروتين صحي وتقوية الروابط العائلية والاستمتاع بوقتك مع الاسرة ، لو عندك اطفال خليهم يشاركوكي في تحضير الاكل ، ممكن تخلي الاطفال الصغيرين يساعدوكي في غسل وفرز المواد الغذائية والاطفال اللي سنهم اكبر خليهم يعملوا مهام اصعب شوية انهم يحضروا الترابيزة.

حاولي بقدر الامكان الالتزام باوقات ثابتة للوجبات ، الطريقة دي ممكن تساعد انها تقلل القلق والتوتر عند الاطفال خلال الفترة دي لما يحسوا بجو عائلي ويقضوا وقت ممتع.

نصيحة للاطفال الرضع:

لبن الام يعتبر افضل مصدر لتغذية الطفل ما بين 6 – 24 شهر ، والنساء المصابات بكورونا يقدروا يستمروا في الرضاعة الطبيعية لو حابين ده ، ولكن مع ذلك لازم انهم يمارسوا نضافة الجهاز التنفسي اثناء الرضاعة ، ولبس ماسك ، غسل الايد قبل وبعد لمس الطفل ، تنضيف الاسطح اللي تم لمسها بشكل روتيني ، ولو انتي صحتك مش كويسة بسبب الكورونا او اي مضاعفات تانية ومش هتقدري ترضعي بشكل طبيعي ، في الحالة دي اعتمدي على الرضاعة الصناعية.

نصايح لنضافة الاكل اثناء فيروس كورونا:

بالرغم ان مافيش دليل لحد دلوقتي على ارتباط الاكل او تغليف الاكل بنقل فيروس كورونا ، ولكن ممكن انه يتنقل من خلال لمس سطح او اي حاجة ملوثة بالفيروس وبعدين لمس وشك ، ومع ذلك ، الخطر الاكبر بيجي من الاتصال المباشر مع الاشخاص اثناء التسوق او استلام الاكل عن طريق الدليفري ، وبالتالي النضافة مهمة لما تيجي تتعاملي مع الاكل لمنع اي امراض منقولة عن طريق الاكل.

امسحي العلب والعبوات بمطهر قبل فتحها او تخزينها ، اغسلي ايديك بالمية والصابون لمدة 20 ثانية على الاقل ، او استخدمي معقم الايد اللي بيحتوي على الكحول بعد لمس اي حاجة جايباها من بره.

اغسلي الحاجات الغير معلبة زي الفاكهة والخضروات كويس تحت المية الجارية.

نصايح عامة لنضافة الاكل:

– اغسلي ايدك كويس بالمية والصابون لمدة 20 ثانية على الاقل قبل تحضير اي اكل.

– استخدمي الواح تقطيع منفصلة لتحضير اللحوم والاسماك النية.

– طبخ الاكل بدرجة الحرارة المناسبة.

– على قد ما تقدري احفظي المواد الغذائية المعرضة للتلف مبردة او مجمدة ، وانتبهي لتاريخ انتهاء صلاحية المنتج.

– اتخلصي من بقايا الاكل بطريقة مناسبة وصحية ، واتجنبي تراكم القمامة اللي ممكن تجذب الآفات والفيروسات.

– اغسلي ايدك بالمية والصابون لمدة 20 ثانية على الاقل قبل الاكل واتأكدي ان اطفالك بيعملوا نفس الشيء.

– استخدمي دايما الاواني والاطباق النضيفة المغسولة كويس.

كل اللي محتاجة تعرفيه عن غسل الايدين بشكل صح للحماية من فيروس كورونا

غسل الايدين بشكل صح