كل اللي محتاجة تعرفيه عن غسل الايدين بشكل صح للحماية من فيروس كورونا

ريهام محمود
ريهام محمود
في
صحة
228

فيروسات الجهاز التنفسي زي فيروس كورونا بينتشر لما يدخل المخاط او الرزاز الحامل للفيروس لجسمك من خلال العين, الانف او الحلق ، وفي اغلب الاحيان ده بيحصل من خلال الايدين ، الايد تعتبر اكتر الوسايل اللي ممكن تأدي لانتشار الفيروس من شخص للتاني ، وواحدة من اسهل الطرق لمنع انتشار الفيروس هي غسل الايدين كتير بالمية والصابون ، تعالوا نشوف من خلال السطور الجايه كل اللي محتاجة تعرفيه عن غسل الايدين بشكل صح.

غسل الايدين بشكل صح:

1- ازاي تغسلي ايدك بشكل صح؟

عشان تتخلصي من اثار الفيروس من على ايديك ، مش هينفع معاه الغسيل السريع ، عشان كده هنقولك الخطوات الصح اللي المفروض تعمليها لغسل ايديكي.

– الخطوة 1: بل الايدين بالمية الجارية.

– الخطوة 2: حطي كمية صابون كفاية تغطي الايد كلها.

– الخطوة 3: افركي ايديكي كويس ، بما فيهم ضهر الايد, وبين الصوابع, وتحت الضوافر, لمدة 20 ثانية على الاقل.

– الخطوة 4: اشطفي ايدك كويس بالمية الجارية.

– الخطوة 5: نشفي ايدك بقماشة نضيفة, او فوطة لاستخدام مرة واحدة وبعدها تتغسل.

2- المدة اللي المفروض تغسليها فيها ايدك:

غسل الايدين المفروض يبقى لمدة من 20 – 30 ثانية, وطريقة سهلة عشان تحسبي الوقت قولي اغنية عيد الميلاد كاملة مرتين ورا بعض.

ونفس الموضوع ينطبق على معقم الايدين, استخدمي معقم يحتوي على 60% كحول على الاقل, وافركيه في ايدك لمدة 20 ثانية على الاقل عشان تضمني التغطية الكاملة.

3- امتى المفروض تغسلي ايدك؟

اثناء انتشار فيروس كورونا لازم نتأكد من غسل الايد في الاوقات دي:

– بعد استخدام المنديل للانف, وبعد الكحة والعطس.

– بعد زيارة الاماكن العامة, بما فيهم وسائل النقل العامة والاسواق واماكن العبادة.

– بعد لمس الاسطح بره البيت ، بما فيهم لمس الفلوس.

– قبل واثناء وبعد رعاية شخص مريض.

– قبل وبعد الاكل.

وبشكل عام حتى لو مافيش فيروس المفروض انك تغسلي ايدك في الاوقات دي:

– بعد استخدام التواليت.

– قبل وبعد الاكل.

– بعد التعامل مع القمامة.

– بعد لمس الحيوانات الاليفة.

– بعد تغيير حفاضات الاطفال او مساعدة الاطفال على استخدام التواليت.

– لو ايدك مش نضيفة بشكل واضح.

غسل الايدين بشكل صح 1
غسل الايدين بشكل صح 1

4- ازاي تساعدي طفلك على غسل ايديه؟

هنقولك بعض الطرق اللي ممكن من خلالها تساعد الاطفال على غسل ايديهم عن طريق تسهيل عملية غسل الايدين وتبقى مهمة مرحة بالنسبة لهم:

– سهلي الموضوع: هاتي كرسي عشان تسهلي على اطفالك الصغيرين انهم يوصل للحوض بنفسهم ، حطي الصابون في متناول ايد الطفل ،وخلي جنبه على الحوض تايمر يساعده على العد التنازلي من 20 – 1.

– خليه مهمة مرحة وممتعة: غني معاه اغنية بيحبها اثناء غسل الايدين ، ده هيساعد انه يغسل ايده لمدة 20 ثانية ، ممكن تستخدمي صابون باشكال مختلفة مخصصة للاطفال على شكل حيوانات مثلا ، او تستخدمي صابون ملون ، ويكون صابون رغوته قوية وريحته حلوة ، او شكله مختلف ومثير لاهتمام الطفل.

– خليه روتين: حددي اوقات غسل الايدين اول ما يوصل الطفل البيت وقبل الاكل وقبل النوم ، اتأكدي من غسل ايديهم بعد الكحة والعطس.

– ساعديهم يفهموا: علميهم ان ازاي برغم ان الفيروسات والجراثيم منقدرش نشوفها بعنينا لكن هي موجودة ، لما الاطفال يفهموا هما ليه المفروض يغسلوا ايديهم ويعرفوا الاسباب ، في الغالب هيستمروا على عادة غسل الايدين باستمرار.

– خليه عادة اسريه: خليكي مثال كويس لطفلك وقدوة يعمل زيها عن طريق انك تخلي كل اللي في البيت يغسلوا ايديهم في الاوقات المهمة اللي مطلوب غسل الايد فيها.

غسل الايدين بشكل صح 2
غسل الايدين بشكل صح 2

5- هل محتاجة لاستخدام المية الدافية لغسل الايدين؟

مش شرط استخدام مية دافية ، ممكن تستخدمي مية باي درجة حرارة ، المية الباردة او الدافية الاتنين ليهم نفس الفاعلية في قتل الجراثيم والفيروسات ، مادام بتستخدمي معاها صابون.

6- هل محتاجة تنشفي ايدك بالفوطة؟

الجراثيم بتنتشر من الجلد الرطب بسهولة اكبر من الجاف ، عشان كده يعتبر تجفيف الايد خطوة مهمة جدا ، استخدمي المناديل الورق او قطعة قماش نضيفة ودي تعتبر الطرق الاكثر فاعلية لازالة الجراثيم من غير نشرها على الاسطح التانية.

غسل الايدين بشكل صح 3
غسل الايدين بشكل صح 3

7- ايه الافضل: غسل الايدين او استخدام معقم الايدين؟

بشكل عام غسل الايدين بالمية والصابون او استخدام معقم الايدين بشكل صحيح ، الاتنين فعالين في قتل الجراثيم ومسببات الامراض ، وغالبا معقم الايدين هيكون مناسب اكتر وانتي بره البيت ، ولكن ممكن يكون مكلف او مش متوفر بشكل مستمر ، كمان معقم الايدين بيقتل فيروس كورونا ن لكن مش بيقتل كل انواع البكتيريا والفيروسات ، على سبيل المثال ، يعتبر مش فعال نسبيا ضد norovirus و rotavirus.

8- تعملي ايه لو مش متوفر صابون؟

المية بالكلور او معقم الايدين اللي بيحتوي على 60% كحول على الاقل يعتبروا افضل الاختيارات لو مش متوفر صابون ومية جارية ، وفي حالة ان دول مش متوفرين ممكن استخدام الرماد او مية بصابون يساعد على ازالة البكتيريا ولكن مش هيكونوا بنفس الفاعلية ، ولو استخدمتي الطرق دي ، يبقى مهم نك تغسلي ايدك في اقرب وقت ممكن لما يكون عندك فرصة انك توصلي لاي مكان فيه مية وصابون ، واثناء الوقت ده لحد ما تغسلي ايدك اتجنبي الاتصال بالاشخاص والاسطح.

غسل الايدين بشكل صح 4

9- ازاي تقدري تساعدي في وقف انتشار فيروس كورونا؟

– استخدمي آداب العطس والكحة المناسبة: غطي الفم والانف بالكوع او بالمنديل عند العطس او الكحة ، واتخلصي من المنديل فورا ، واغسلي ايديكي.

– اتجنبي لمس وجهك (الفم, الانف, العين).

– الابتعاد الاجتماعي: اتجنبي السلام بالايد, الاحضان, التقبيل, مشاركة الاكل والاواني والكوبايات والفوط.

– اتجنبي الاتصال مع اي شخص بيعاني من اعراض الزكام او الانفلونزا.

– اطلبي الرعاية الطبية بدري لو طفلك بيعاني من ارتفاع درجة الحرارة, الكحة او صعوبة في التنفس.

– نضفي الاسطح اللي ممكن يكون حصل اتصال بينها وبين الفيروس ، وتنضيف الاسطح بشكل عام بشكل متكرر (خاصة في الاماكن العامة).

غسل الايدين بشكل صح 5

7 حاجات ماينفعش ترجعي تعمليها لما وباء كورونا ينتهي.. اعرفيهم وماتستغنيش عنهم

7 حاجات ماينفعش ترجعي تعمليها لما وباء كورونا ينتهي
7 حاجات ماينفعش ترجعي تعمليها لما وباء كورونا ينتهي

مقالات متعلقه

ايه الاطعمة اللي المفروض تاكليها لو عندك فيروس كورونا

ايه الاطعمة اللي المفروض تاكليها لو عندك فيروس كورونا

7 حاجات ممكن تحصل لجسمك لو استخدمتي مطهر الايدين زيادة عن اللزوم

7 حاجات ممكن تحصل لجسمك لو استخدمتي مطهر الايدين زيادة عن اللزوم

نصايح جمالية لازم تحطيها في اعتبارك اثناء فترة فيروس كورونا

نصايح جمالية لازم تحطيها في اعتبارك اثناء فترة فيروس كورونا