ايه هي طريقة الساندوتش وازاي تحولي سلوك طفلك للاحسن من غير ما تكوني قاسية عليه

ريهام محمود
ريهام محمود
737

تربية الاطفال مهمة مش سهلة ابدا ، تعليم طفلك القيم والسلوك الصح من غير ما تأذيه او تكوني قاسية عليه يمكن تشوفي انه مهمة مستحيلة ، ولكن الباحثين والمتخصصين بيأكدوا ان النقد البناء سهل لو عملتيه بشكل صح ، وهنا تيجي طريقة الساندوتش عشان تخلي مهمة الاب والام اكتر فعالية ومتعة للطرفين ، والنهاردة من خلال موضوعنا هنقولك ازاي تحولي سلوك طفلك للاحسن بطريقة صح.

ازاي تحولي سلوك طفلك للاحسن:

الدكتور النفسي للاطفال “دانيال امين” بيشير ان كتير من الاباء والامهات بيعبروا عن شكوتهم من اطفالهم بطريقة قاسية جدا ، او العكس انهم بيخافوا يتكلموا بقسوة مع اطفالهم ، ودكتور دانيال حدد صفتين ممكن انها تعمل فرق كبير جدا مع الاطفال وهما الحزم والحب.

لما الاب والام يكونوا محددين وحازمين اتجاه سلوك اطفالهم الغير مرغوب فيه ، وفي نفس الوقت يقدموا ده بالحب واللطف والرعاية ، هيبقى دايما عندهم نتايج ايجابية ، والطريقة اللي تعلمي بيها ده انك تقدمي النقد في التعليقات الناعمة والمدح الصادق ، عشان الطفل مياخدش كلامك بشكل نقدي صريح.

ازاي تحولي سلوك طفلك للاحسن 1
ازاي تحولي سلوك طفلك للاحسن 1

1- المدح:

قبل ما تبدأي كلامك مع طفلك ، حاولي انك تبدأي المحادثة بحاجة ايجابية عن الطفل ، ده هيكسر الجليد وهيخفف ضغط الموقف ، ولازم هنا تكوني محددة ، يعني متقوليش كلام عام زي مثلا “انت طفل كويس”, لو هتتكلمي عن سلوكه يبقى قولي لحظة او موقف معين الطفل اتصرف فيه بشكل كويس ، وكان ليه تأثير ايجابي.

ازاي تحولي سلوك طفلك للاحسن 2
ازاي تحولي سلوك طفلك للاحسن 2

2- قولي رأيك – وخليكي محددة ومفصلة:

بمجرد ما تتأكدي ان طفلك سمعك كويس ، تقدري تعالجي المشكلة وسلوكه المضطرب ، ولازم تكون ملاحظاتك وتعليقاتك محددة بجمل زي “انا مش حابه سلوكك او طريقة تصرفك” او “متعملش كده مرة تانية” ، لكن متقعديش تشرحي الغلطة اللي هو عملها عشان متدفعيش الطفل انه يبعد عن المحادثة او ميسمعكيش ، ومتفضليش تلومي وتوبخي فيه وتقوليله ازاي يتصرف ، بدل ده حاولي انك توصلي لحل معاه لتحسين الوضع وتكونوا انتوا الاتنين راضيين عن الحل ده.

ازاي تحولي سلوك طفلك للاحسن 3
ازاي تحولي سلوك طفلك للاحسن 3

3- اسأليه عن رايه:

بمجرد ما تخلصي الجزء الرئيسي اللي اتكلمنا عنه في النقطتين اللي فوق ، حاولي تعرفي رأي طفلك وتعليقه ، مهم جدا انك تسمعي ازاي طفلك استقبل اللي انتي قولتيه ، اسألي الطفل لو فهم اللي انتي قولتيه ولا لا ، وهل موافق على ده ولا لا ، وهل عنده حاجة يضيفها ، ومافيش مشكلة لو الطفل عايز يجادل ويتناقش معاكي ، مع الحفاظ على صوت واطي والكلام بأدب ، اسمعيه ومتقاطعيش كلامه ، وبعدين اتناقشوا في الحاجات اللي انتوا مختلفين فيها.

ازاي تحولي سلوك طفلك للاحسن 4

4- قولي لطفلك قد ايه انتي بتحبيه:

مهم انك تخرجي من المحادثة بشكل صح عشان الطفل ميحسش انه خيب ظنك وانك مبقتيش تحبيه ، لان ده ممكن يطور شعور قوي بالذنب في عقل الطفل او يبدأ في التصرف بشكل اسوأ في اي مشكلة تانية بعد كده ، انهي الحديث بينكم بمدح تاني ، حاولي متستخدميش جمل او كلمات عامة ومدح بشكل مفرط , ولكن قوليله بس مشاعرك الحقيقية والايجابية.

كلنا عارفين ان مافيش اطفال مثاليين ، ولكن لازم كل اب وام يدوروا عن الافضل في اطفالهم واظهار وتنمية الايجابيات في شخصياتهم.

ازاي تحولي سلوك طفلك للاحسن 5

مقالات متعلقه

12 حيلة لتطوير نمو الطفل بشكل افضل هتريحك في المستقبل

12 حيلة لتطوير نمو الطفل بشكل افضل هتريحك في المستقبل

علميا ازاي الكذبات البيضا الصغيرة ممكن تأذي اطفالنا

علميا ازاي الكذبات البيضا الصغيرة ممكن تأذي اطفالنا

5 اساليب تسيطري بيهم على نوبة الغضب والصراخ على اطفالك

5 اساليب تسيطري بيهم على نوبة الغضب والصراخ على اطفالك