ازاي تتحكمي في النظام الغذائي الخاص بيكي اثناء فترة الحجر الصحي من غير ما تحسي بالذنب
في بداية فترة الحجر المنزلي كنا متحمسين لشوية راحة من تعب النزول والمواصلات وسواقة العربية وكمان كان عنجنا حاجات كتير عايزين نعملها في البيت، ولكن لما قعدة البيت تطول هنا ممكن تبان بعض الغضوطات اللي طبعا في 90% من الحالات بتترجم لزيادة في الأكل ومع زيادة الأكل واللغبطة فيه طبعا بييجي اهمال الاكل الصحي والتمارين الرياضية، بس احنا هنتكلم معاكي النهاردة فازاي ممكن ده يكون صحي ليكي ومش بالضرورة ابدا يكون حاجة وحشة، وكمان ازاي تتخطي اللغبطة دي وتتحكمي فيها، اعرفي معانا ازاي تتحكمي في النظام الغذائي الخاص بيكي اثناء فترة الحجر الصحي من غير ما تحسي بالذنب
ازاي تتحكمي في النظام الغذائي الخاص بيكي اثناء فترة الحجر الصحي من غير ما تحسي بالذنب
انك تاكلي عشان تحسي باحساس افضل مش مشكلة
الـ comfort food مش ضروري تعتبريه كارثة ابداً، خصوصا انه طبيعي في معظم البشر انهم بيميلوا للأكل عشان يحسوا بالراحة والسعادة فلو من وقت للتاني لقيتي نفسك بتميلي للأكلات السريعة والـ junk food عشان تحسي بشوية سعادة او لأنه كان نفسك رايحاله، مفيش مشكلة من مرة او مرتين، العالم مش هينتهي، واعرفي دايماً انه الاكل عشان تحسي بإحساس افضل مش مشكلة ابداً.
اعرفي ان الدايت مش دايماً هو الحل
التضييق على نفسك والريجيم القاسي والدايت مش هما دايماً الحل، لانه غالبا كل ما الريجيم زاد وبقيتي بتحرمي نفسك من اكلات كتيرة ومشددة اوي هتلاقي نفسك جيتي في مرة وانفجرتي وكلتي كل الحاجات الغلط واللي كنتي مانعة نفسك منها واكتر كمان، عشان كده الدايت مش دايماً هو الحل، ممكن تنظمي اكلك وتاكلي كل اللي نفسك فيه من فترة للتانية بكميات قليلة على قد ما تقدري وتعويضها بتمرينات زيادة مثلا.. المهم بلاش الحرمان لانه هيضغطك ويوترك اكتر.
كلي وانتي قاصدة تاكلي
نقصد ادي لنفسك الاذن تاكلي وقت ما تحبي، لما تجوعي كلي من غير ما تحسي بالذنب، لانك لما تبقى قاصدة تاكلي هتبقى واعية انتي بتاكلي ليه وايه هي الكمية اللي محتجاها عشان تحسي بالشبع، ولما تاكلي وانتي قاصده، لا اراديا هتتجنبي الاكلات العشوائية اللي بناكل فيها كميات كبيرة من غير ما نحس.
اتخطي اللي اكلتيه
حتى لو لغبطتي في الاكل وزودتي في الكحك والبيتيفور والايس كريم، خلاص مش مشكلة الدنيا مانتهتش، اتخطي اللي كلتيه وكملي على نظامك الغذائي عادي تاني يوم، وممكن تعوضي اللغبطة بشوية تمارين زيادة، يوجا، ارقصي على اغنية بتحبيها او ابذلي شوية مجهود أكتر بانك تنضفي البيت مثلا، اتخطي اللي كلتيه وكملي وماتحبطيش نفسك.
اعرفي عملتي ايه غلط وماتكرريهوش
اهم حاجة في الموضوع ده كله انك لما تغلطي، تعرفي غلطك فين وماتكرريهوش، يعني عادي لو ضعفت وكلت النهاردة ماك مع اخواتي، لكن بكره لما يجيبوا اوالمرة الجاية مثلا هقول لا ومش هاكل junk food تاني، مهم جدا مانكررش اخطائنا، وزي ما قلتلك شوية تظبيط اكل بعد كده وتمارين بسيطة هتخليكي تاني ترجعي على الطريق الصح وتستعيدي لياقتك.
حاولي على قد ما تقدري
الخلاصة هي انك مش مطلوب منك غير انك تحاولي على قد ما تقدري، عادي تلغبطي وتكسلي تعملي تمارين وتعكي في الاكل وسط الحجر المنزلي والضغوطات النفسية اللي بتفرضها علينا الظروف المحيطة بفيروس كورونا، المهم انك ماتبطليش محاولة وبس.
اعرفي كمان 7 اسباب زيادة الوزن مالهاش علاقة بالكسل او الوجبات السريعة