ازاي تعملي تفتيح “تشقير” شعر الوجه بطرق طبيعية

بقلمريهام محمود فيبشرة visibility1008

احيانا في بنات بتكون بشرتهم حساسة زيادة ومش بيعرفوا يعملوا ازالة لشعر الوجه باستمرار ، وهنا بنلجأ للتشقير او تفتيح الشعر عشان نقلل من ظهورة ، ولكن كريمات التشقير كمان ساعات بتسبب حساسية للبشرة لان بيكون داخل فيها مواد كيميائية ، عشان كده النهاردة هنقولك ازاي تعملي تشقير شعر الوجه بمكونات طبيعية.

تشقير شعر الوجه بمكونات طبيعية:

1- عصير الليمون:

الليمون غني بفيتامين C, وهو يعتبر من اشهر المكونات اللي بتستخدم لعلاج التصبغ, وبيستخدم كمان كمبيض طبيعي وبالتالي ممكن انه يساعد في تفتيح شعر الوجه.

كل اللي هتعمليه اعصري الليمون في بوله صغيرة, هاتي قطعة قطن اغمسيها في عصير الليمون, ادهني بيها بشرتك, سيبيه من 15 – 20 دقيقة وبعدها اغسليه بالمية, كرري الطريقة دي يوميا لحد ما توصلي للنتيجة اللي انتي عايزاها.

ملحوظة: عصير الليمون ممكن يسبب تهيج للجلد للبشرة الحساسة, عشان ضروري انك تعملي اختبار حساسية وتجربيه الاول على جزء صغير من البشرة قبل ما تحطيه على البشرة كلها.

تشقير شعر الوجه
تشقير شعر الوجه

2- الكركم:

الكركم الممزوج بعصير الليمون ممكن انه يساعد على تفتيح شعر الوجه, عصير الليمون زي ما قولنا بيحتوي على فيتامين C اللي ممكن يساعد على تبييض شعر الوجه, والكركم بيستخدم لازالة الشعر.

اخلطي الكركم المطحون مع عصير الليمون لحد ما يتكون عندك معجون سميك, ادهني الخليط على البشرة كلها وسيبيه لمدة 15 دقيقة وبعدين اغسليه بالمية, كرري الطريقة دي مرتين في الاسبوع.

ملحوظة: الكركم في بعض الاحيان ممكن يسيب لون اصفر على الجلد, ياما تستخدمي كركم البشرة, او لو هتستخدمي الكركم العادي متسيبهوش اكتر من 15 دقيقة بس على البشرة.

تشقير شعر الوجه

3- الطماطم:

الطماطم كمان تعتبر مصدر رائع جدا لفيتامين C, والطماطم الممزوجة بعصير الليمون ممكن انها تساعد في تفتيح شعر الوجه.

ابشري الطماطم لحد ما تبقى عندك معجون ناعم وضيفي لها معلقة صغيرة عصير ليمون, حطي طبقة سميكة من الخليط على البشرة كلها او على المناطق اللي فيها الشعر, سيبيه من 15 – 20 دقيقة وبعدها اغسليه بالمية الباردة, ممكن تكرري الطريقة دي من 1 – 2 مرة في الاسبوع.

تشقير شعر الوجه

4- البابايا:

البابايا بيحتوي على انزيم اسمه البابين اللي ليه تأثير مزيل للشعر, والبابايا الممزوج بعصير الليمون ممكن انه يساعد على تفتيح شعر الوجه.

اهرسي البابايا كويس لحد ما تبقى عجينة ناعمة, اخلطي معاها معلقة صغيرة من عصير الليمون, وزعي الخليط على البشرة وسيبيه لمدة 20 دقيقة, وبعدها اغسليه بالمية, كرري الطريقة دي مرتين في الاسبوع.

5- دقيق الحمص:

دقيق الحمص يعتبر من اقدم العلاجات اللي بتستخدم في ازالة الشعر, لان دقيق الحمص بيلزق في البشرة لما بينشف, ولما تيجي تغسليه ممكن انه يساعد على ازالة الشعر بسهولة.

هاتي معلقتين من دقيق الحمص واخلطي معاهم شوية كركم صغيرين ومية لحد ما يتكون عندك عجينة سميكة, وزعي الخليط على البشرة وسيبيه لمدة 15 دقيقة, وبعدها افركيه بالراحة بايدك باستخدام المية الدافية, كرري الطريقة دي من 1 – 2 مرة في الاسبوع.

ليه الافضل تستخدمي الطرق الطبيعية وتتجنبي استخدام المنتجات اللي موجودة في السوق؟

الاثار الجانبية لمنتجات تشقير شعر الوجه:

منتجات التشقير اللي موجودة في السوق بتحتوي على مواد كيميائية زي بيروكسيد الهيدروجين, والتعرض للمواد الكيميائية دي بشكل منتظم ومستمر ممكن انه يسبب ضرر كبير للبشرة, والاثار الجانبية اللي ممكن تحصل:

– تهيج الجلد.

– طفح جلدي وحكه.

– تورم.

– احمرار.

– تصبغ الجلد.

عشان كده بننصحك انك تستخدمي الطرق الطبيعية لتفتيح شعر الوجه كبديل للمنتجات اللي ممكن تضر بشرتك.

وصفات الكركم لازالة الشعر الزائد من الوجه بدون الم

وصفات الكركم لازالة الشعر الزائد من الوجه
وصفات الكركم لازالة الشعر الزائد من الوجه