7 اسباب زيادة الوزن مالهاش علاقة بالكسل او الوجبات السريعة
هل مر عليكي وقت حسيتي انك بتعملي كل حاجة صح ، ومع ذلك وزنك بيزيد؟ وكل حاجة صح دي معناها تجنب الوجبات السريعة ، بتمارسي تمارين قوية ، ومع ذلك بتلاقي نفسك وزنك بيزيد ومش بتخسي ، النهاردة هنقولك من خلال السطور الجايه ايه هي اسباب زيادة الوزن اللي مالهاش علاقة بالوجبات السريعة او الكسل وعدم ممارسة الرياضة اللي هي بتأدي لزيادة الوزن ، في بعض الاوقات بتكون الاسباب غير متوقعة ، ومش هتتخيلي ان الاسباب دي ممكن تأدي لزيادة الوزن.
اسباب زيادة الوزن:
1- تغيرات في هرمونات جسمك:
اي واحدة جسمها بيمر بتغيرات هرمونية كتير ، وده اللي بيخلي اجسامنا مختلفة تماما عن اجسام الرجالة ، بيحصل تغيرات خلال فترة الدورة الشهرية كل شهر ، ومن الحمل لسن اليأس الجسم بيمر بتغيرات كتير جدا.
وبالتالي التمارين اللي كنتي بتعمليها وانتي في سن صغير وكانت فعالة وبتساعدك في انقاص الوزن ، هتتوقف عن العمل بمجرد ما تعدي سن 30 او 40 سنة ، والحل للمشكلة دي بسيط جدا كل اللي عليكي تعمليه انك تزودي من قوة التمارين يوميا بالتدريج ، ده هيساعدك انك تتخلصي من الوزن الزايد.
2- بتاكلي فاكهة كتير:
ده يمكن تشوفيه انه عكس اللي بنسمعه طول حياتنا ، ولكن متقلقيش الفاكهة تعتبر وجبة خفيفة صحية ، واكيد افضل من وجبات خفيفة تانية ممكن تاكليها ، ولكن مع ذلك ، لازم تاخدي حذرك من كمية الفاكهة اللي بتاكليها ، وكمان نوع الفاكهة ، في كتير من الفواكة بتحتوي على سعرات حرارية اكتر من غيرها ، على سبيل المثال ، الموز بيحتوي على نسبة عالية من السكروز ، يعني هو عبارة عن سكر بس ، عشان كده لتجنب زيادة الوزن ، بننصحك باكل الفواكة منخفضة السعرات الحرارية ، زي الجريب فروت والرمان ، حتى التفاح الاخضر بيحتوي على سعرات حرارية اقل بكتير من التفاح العادي.
3- تجاهل المشاكل الصحية:
في بعض الاوقات لو بنعاني من اي مشكلة صحية بنتجاهلها وبنحاول نقنع نفسنا اننا كويسين ، لكن بننصحك لو في اي وقت حسيتي بحاجة مش مظبوطة او بمشكلة صحية انك متتجاهليش ده ، وانتبهي دايما للعلامات اللي جسمك بيديهالك ، وواحدة منها هي زيادة الوزن اكتر من الطبيعي ، في الحالة دي لازم زيارة الدكتور المتخصص عشان يشخص الحالة ويكتبلك العلاج الصح.
4- اثر جانبي لبعض الادوية:
في بعض الاوقات ممكن ان الدواء يسبب زيادة الوزن ، عشان كده لو انتي بتاخدي دوا معين ولاحظتي زيادة في الوزن ، يبقى زوري الدكتور فورا ، ومتوقفيش اي علاج من غير استشارة الدكتور ، الدكتور في الحالة دي هيغيرلك الدواء اللي بتستخدميه بنوع تاني مش بيسبب زيادة في الوزن.
5- الافراط في عادات الاكل غير الصحية:
اكل الطعام الغير صحي مش معناها بس مجرد اكل الاكلات الغير صحية ، في بعض الاوقات كتير مننا بياكل الاكل بطريقة عاطفية ، يعني في اشخاص ممكن تقعد تبص للاكل باعتباره حاجة مريحة بالنسبة لهم وبيلجأوا له كل ما يمروا بوقت صعب ، وده يعتبر اسوأ نوع من الادمان على الاكل وبيأدي دايما لمشاكل صحية ، وزيادة الوزن يعتبر اقل حاجة بينها، وفي طريقة واحدة عشان تتعاملي مع المشكلة دي هو انك تحاولي تميزي او تفرقي ما بين الجوع الفعلي او المفتعل ، عشان تحلي مشكلة الجوع المفتعل حاولي انك تعملي نشاطات تخلصك من الاجهاد من غير اكل اطعمة غير صحية ومليانة بالسعرات الحرارية.
6- مش بتعملي حاجة تخلصك من الاجهاد:
في كتير من الاوقات بنفكر ان الشخص طول ما هو تحت الضغط والاجهاد هيفقد وزن ، ولكن ده مش دايما صح ، لان في احيان كتير بيحصل العكس ، ولو انتي من الاشخاص اللي بيحصل معاهم كده ، بننصحك انك تدوري على الطرق اللي تخلصك من الاجهاد والضغط ، وممكن تروحي لمتخصص يساعدك ، خصوصا لو انتي مش عارفة ايه سبب الضغط.
7- مش بتنامي كفاية:
عدم الحصول على ساعات نوم كفاية ممكن انه يأدي لاكتساب الوزن ، وتراكم الدهون حوالين منطقة الوسط ، وكتير من الدراسات اثبتت الارتباط ما بين قلة النوم وزيادة الوزن ، وافضل طريقة لحل المشكلة دي هي انك تحطي جدول زمني لنفسك وتلتزمي بيه ويبقى في ميعاد معين تنامي فيه كل يوم ، ده هيساعدك في اعادة هيكلة ساعة جسمك وهيقدر ياخد ساعات النوم اللي محتاجها.