تحدي الجمال: ازاي تبقي اجمل في شهر واحد بس

بقلمريهام محمود فيشعر visibility1526

مع تغيير المواسم هيكون مفيد جدا لينا اننا نعمل روتين نهتم فيه بنفسنا ، بس اكيد الروتين ده ممكن يتعمل في اي وقت طول السنة ، انك تخصصي لنفسك وقت تعتني فيه ببشرتك وشعرك وبصحتك بشكل عام ، والنهاردة من خلال موضوعنا هنتعرف مع بعض على تحدي الجمال للبشرة والشعر والضوافر والجسم وهنقولك ازاي تبقي اجمل في شهر واحد بس بروتين بسيط.

تحدي الجمال للبشرة والشعر والضوافر:

نتايج التحدي:

اول حاجة هنعرف ايه النتايج اللي هتحسي بيها بعد ما تخلصي التحدي ده.

– هتحسي بتحسن بدني ، وصحتك اقوى.

– ممكن تتخلصي من بعض الوزن الزايد بطريقة صحية 100%.

– مظهرك العام هيبقى احلى.

– هتطوري عادات صحية جديدة.

ولازم تعرفي ان الروتين ده مش بس عشان يحسن شكلك ومظهرك ، ولكن كمان هيحسن مودك ، وهيخلصك من جزء كبير من المشاعر السلبية.

تحدي الجمال للبشرة والشعر والضوافر
تحدي الجمال للبشرة والشعر والضوافر

الجزء 1: العناية بالجسم

الجزء ده بيتعلق بصحة ولياقة الجسم ، وهنعرف مع بعض ايه اللي ممكن تعمليه عشان توصلي لده بشكل سريع.

1- ابدأي بشرب كمية مية اكتر:

المية بتساعد على الحفاظ على صحة وحيوية الجسم ، وبتحافظ على رطوبته ، وبتساعد كمان ان البشرة تبقى نضرة وصافية وصحية.

بتساعد كمان على التخلص من الانتفاخ ، بالاضافة كمان انها هتساعد على التخلص من بعض الوزن الزايد.

عشان كده خلي خطوتك الاولى هي انك تزودي كمية المية اللي بتشربيها يوميا ، وممكن عشان تغيري طعم المية وتشجعي نفسك انك تشربي اكتر ضيفي لها فاكهة ، نعناع ، او خيار وليمون.

2- ابدأي بأكل خضار وفاكهة اكتر:

زيادة اكل الخضار والفاكهة هيكون مفيد جدا ، وتعتبر طريقة مثالية جدا لانقاص بعض الوزن الزيادة من غير ما تحسي كأنك ماشية على دايت ، تقدري تعملي ده ازاي:

مع كل وجبة كلي طبق سلطة كبير ، او خضروات مشوية ، او شوربة خضار.

ولو تقدري خلي واحدة من وجباتك اليومية معتمدة على الخضار بس.

اشربي عصير الفاكهة يوميا وهيكون مثالي جدا في وجبة الفطار ، وعشان تخلي الوجبة صحية اكتر ومشبعة ممكن تضيفي لها بروتين او دهون زي المكسرات, زبدة الفول السوداني, بذور الشيا ، ولو مش هتقدري تدخلي الحاجات دي في وجبة فطارك ، حاولي تركزي على البروتينات الصحية ، زي الفول, العدس, الحمص ، كلها مفيدة للجسم.

الاكل بالطريقة دي هيعزز من عملية التمثيل الغذائي ، هيحسن الدورة الدموية وهيخلي حتى بشرتك انعم وصحية اكتر.

عشان تشجعي نفسك انك تاكلي خضار وفاكهة زيادة فكري كده ان اكل الخضروات والفاكهة دي هيخليكي احلى وجسمك صحي اكتر ، لان كل اكل صحي هو في الواقع بيمد جسمك بالمغذيات الضرورية للبشرة ، الضوافر ، الشعر ، والوظايف المعرفية.

ومن الاطعمة كمان اللي هتساعد على ده التوت ، الزبادي اليوناني ، اللحوم الخالية من الدهون ، الاسماك ، السي فوود ، البذور ، زيت الزيتون ، الكركم ، الزنجبيل ، المشروم ، الشوفان ، العسل ، حاولي تدخلي الاطعمة دي في روتينك الغذائي بشكل يومي.

لكن في حاجة لازم نفتكرها ، ان كل الاكل بيحتوي على سعرات حرارية ، البعض فيه سعرات حرارية اكتر من غيره ، ولكن لو انتي عايزة تنقصي وزنك اثناء التحدي ده ، يبقى لازم تتأكدي من عدم الافراط في اكل الاطعمة الصحية ، لان خرافة الاكل الصحي لوحده كافي لخسارة الوزن ده مش صحيح ، الاكل الصحي مش هيخسس لوحده لو مافيش معاه رياضة.

فلو انتي بيدخل جسمك سعرات حرارية اقل من اللي جسمك بيستهلكه هتفقدي وزن ، اما لو الجسم بيدخله سعرات حرارية اكتر وزنك هيزيد ، حتى لو بتاكلي افوكادو بس.

3- ابدأي اعملي بعض التمارين البسيطة يوميا:

لازم تعرفي ان التمارين جزء اساسي من التحدي ده ، فلو انتي مشغولة جدا او بتكسلي تعملي رياضة هنقولك تدخلي التمارين ازاي في روتينك اليومي:

بدل ما تلتزمي بتمرين طويل مرة واحدة في اليوم ، اعملي تمارين بسيطة لمدة 10 – 15 دقيقة اللي تقدري بسهولة تقدري تدخليها في روتينك اليومي ، ممكن تعملي تمرين بسيط لمدة 10 – 15 دقيقة مرة الصبح ومرة بالليل ، هتكون كافية جدا لجسمك ، وده هيخليكي تتمرني 30 دقيقة كل يوم ، ولو عندك ايام فيها وقت فراغ ممكن تزودي التمارين اكتر.

4- استخدمي تان لجسمك:

اللون البرونزي بيخلي شكل البشرة يبان شكلها صحي ونضر ، ممكن تستخدمي اي لوشن او برونزر عشان تدي جسمك لون تان طبيعي وصحي وجميل.

تحدي الجمال للبشرة والشعر والضوافر

المرحلة 2: العناية بالوجه

المرحلة دي خاصة ببشرة الوش وازاي تعتني بيها.

اول حاجة ابدأي باستخدام المقشرات اللطيفة مع الاحماض عشان تتخلصي من الجلد الميت وتجددي بشرتك ، ومن افضل الحاجات اللي ممكن تستخدميها هو حمض الجليكوليك فعال جدا ولطيف على البشرة ومناسب لاي نوع بشرة ، ولكن متبالغيش مرة واحدة في الاسبوع كافية.

ابدأي دخلي في روتين العناية بالبشرة تدليك الوش بالزيت كل اسبوع ، التدليك بيساعد على الحصول على بشرة نضرة وصحية وناعمة ، ممكن تستخدمي زيت الزيتون او زيت جوز الهند “وهما يعتبروا مضادات للبكتيريا وكويسين جدا لحب الشباب” ، وممكن تستخدمي زيت بذور الورد من الزيوت المفيدة جدا للبشرة لانه بيحتوي على الريتينول.

ابدأي استخدمي ماسكات الوجه كل اسبوع ، ال Sheet mask من الماسكات المفيدة جدا للبشرة ممكن تجربي تستخدميها.

وعشان تسهلي على نفسك لو انتي مشغولة ومعندكيش وقت تعملي ده في ايام منفصلة اختاري يوم يكون عندك في وقت لمدة 20 دقيقة بس ، هتكون كافية انك تعملي ال 3 خطوات مع بعض ، التقشير, تدليك الزيت, والماسك ، وهتكوني خلصتي روتين العناية بالبشرة وخلتيها صحية بخطوات بسيطة وسريعة وفعالة في نفس الوقت.

الجزء التاني من العناية بالبشرة:

الحواجب مهمة جدا ، بصي عليها كده لو لقتيها خفيفة اوي ، يبقى لازم تفكري في اعادة نموها ، ويمكن تاخد وقت شوية لكن تقدري تستخدمي المكياج عشان تمليها وتظهريها لحد ما الشعر ينمو تاني.

اهتمي بازالة شعر الوش ، في بنات بيحبوا يستخدموا الشمع او الفتلة ، ولو انتي عايزة وسيلة مش مؤلمة ممكن تستخدمي الشفرة النسائية تقدري تستخدميها لشعر الوش كله والشنب.

اهتمي بشفايفك ، واتخلصي من جفاف وتقشر الشفايف ، جربي استخدمي مقشر شفايف بسيط وطبيعي من السكر وزيت الزيتون ، رائع جدا لتقشير الشفايف وترطيبها.

اهتمي باسنانك ، الاسنان البيضا هتفرق جدا معاكي ، تقدري تستخدمي صودا الخبز “الكربوناتو”, او الفحم المنشط لازالة بقع الاسنان وتبيضها ، ولو عايزة تأثير اقوى ممكن تستخدمي شرايط تبييض الاسنان اللي بتتباع في الصيدلية.

تحدي الجمال للبشرة والشعر والضوافر

المرحلة 3: العناية بالشعر

دلوقتي هنيجي للمرحلة التالتة وهي العناية بالشعر.

1- قصي الاطراف المنقسمة والمقصفة:

الاطراف المنقسمة والمقصفة دي بتخلي الشعر شكله مش صحي ، فلازم كل فترة تتقص ، ومش مطلوب انك تقصري الشعر ولكن قصي الاطراف الجافة بس وتأكدي ان ده هيفيد شعرك جدا.

2- جددي لون شعرك:

صبغ الشعر بيجدد اللوك وبيديكي شكل مختلف وبيعمل فرق كبير في مظهر الشعر ، وانتي مش مضطرة انك تغيري اللون اللي انتي عاملاه الا لو حابه بس تعملي تغيير جذري في شكلك ، لكن ببساطة ممكن تلوينه بنفس اللون مرة تانية وتجدديه.

3- دوري على ستايلات شعر جديدة:

لو بقالك فترة كبيرة مغيرتيش ستايل شعرك بشكل عام ، دلوقتي هو الوقت المثالي انك تدوري على النت على ستايلات وافكار جديدة لشعرك ممكن تجربيها ، حتى من غير ما تغيري لون الشعر او طوله لو مش عايزة ده ، ولو انتي بتثقي في الكوافير اللي انتي بتتعاملي معاه ممكن تسأليه عن رايه في اللي يناسبك اكتر.

4- عالجي شعرك:

الشمس ، الصبغة ، منتجات الشعر القاسية ، كلها بتأثر على صحة الشعر ومظهره بشكل عام ، حاولي انك تستخدمي منتجات مغذية لشعرك تساعد على علاج التلف والجفاف او وصفات طبيعية تساعد على علاج الشعر.

المرحلة 4: العناية بالاظافر

المرحلة الرابعة هي العناية بالاظافر للحصول على ضوافر طويلة وقوية , وحتى لو مش طويلة فلازم تحافظي عليها شكلها حلو وصحية ، لان الضوافر بتبقى علامة على النضافة الشخصية ، وجزء مهم جدا من الاهتمام والعناية بنفسك.

تقدري تهتمي بضوافر الايد والقدمين بكل بساطة في البيت او في صالون التجميل مع متخصصة.

تقدري تشوفي من هنا طريقة عمل الباديكير للقدمين .. وطريقة عمل المانيكير للايدين.

ازاي تحصلي على بشرة نضرة ومشرقة في ليلة واحدة بس