Sirtfood Diet – دايت صحي لخسارة الوزن بشكل سريع

بقلمريهام محمود فيتخسيس الوزن visibility671

Sirtfood Diet بيساعد على خسارة الوزن بسرعة وكمان طويل المدى يعني نتيجته بتستمر معاكي بعد ما توقفيه من خلال تشغيل مفتاح التمثيل الغذائي لحرق الدهون بسرعة ، النظام ده بيساعد على تنشيط الجينات اللي بتزود التمثيل الغذائي وبتقلل الالتهابات من خلال بعض الاطعمة ،بالاضافة ان الاطعمة دي هتساعد على التخلص من دهون البطن الصعبة ، والنهاردة من خلال موضوعنا هنقولك ايه الاطعمة دي ، وهنقولك بالتفصيل ازاي تعملي دايت ال Sirtfood.

ايه هو ال Sirtfood Diet؟

ال Sirtfood diet هو نظام غذائي متوازن غذائيا بيتكون من الاطعمة اللي ليها قدرة على تشغيل جينات “SIRT1” ، اللي بيتم تنشيطها من خلال الاطعمة دي اللي بتساعد على زيادة التمثيل الغذائي في الجسم وتحسين العضلات وتعزيز الصحة العامة.

النظام ده الميزة فيه انه متوازن مش زي الحميات اللي بتعتمد على الانظمة الغذائية القاسية المقيدة في السعرات الحرارية ، وفي نفس الوقت النظام هيساعد على زيادة الطاقة ، وفقدان الوزن بسرعة من غير فقدان العضلات ، وكمان هتبقي مش مضطرة انك تمارسي تمارين قاسية ، يعني النظام خفيف جدا ومش قاسي زي كتير من الانظمة الغذائية التانية.

واخصائيين التغذية حطوا خطة للنظام ده وهي عبارة عن شرب 3 انواع عصاير خضرا في اليوم مع وجبات متوازنة عشان تبدأ عملية التمثيل الغذائي ، وتأدي في النهاية لحياة صحية خالية من الامراض.

sirtfood diet
sirtfood diet

ازاي بيشتغل نظام Sirtfood؟ وهل هو فعال في خسارة الوزن؟

النظام بيشمل الاطعمة اللي بتنشط جينات SIRT1 ، والنظام ده غني بالاطعمة الصحية اللي بتساعد على تشغيل الجينات دي ، وبتأدي بشكل فعال لفقدان الوزن على المستوى الجزيئي ، ازاي بيشتغل نظام Sirtfood:

– بيحرك الدهون: العلماء اكتشفوا ان الاطعمة اللي بيشملها النظام ده بتساعد على تحويل الانسجة الدهنية البيضا المتخزنة لدهون بنية ، واللي بيتم تعبئتها بسهولة واستخدامها كطاقة ، وده معناه ان الدهون المتخزنة بتبدأ في الذوبان وبتأدي لفقدان الوزن.

– بيمنع تراكم الدهون: جينات ال SIRT1 بتساعد على تنظيم الاديبوكين اللي بيفرز الخلايا الدهنية اللي بتأثر على حساسية الانسولين والجوع وبتزود من الالتهاب ، و تنشيط جين ال SIRT1 من خلال الاطعمة اللي داخلة في النظام بيساعد على تقليل افراز الاديبوكين ، وده هيمنع تراكم الدهون بشكل مفرط والجوع في اوقات مش مناسبة.

– بيحسن حساسية الانسولين: عدم قدرة الخلايا للاستجابة للانسولين ” هرمون مسئول عن امتصاص الجلوكوز من مجرى الدم بواسطة الخلايا” بيأدي لزيادة مستويات السكر في الدم والسمنة ومرض السكر من النوع التاني ، واظهرت الابحاث ان تنشيط جينات SIRT1 بيحسن من حساسية الانسولين وده بدوره بيحسن التمثيل الغذائي ، وبيعزز من افراز هرمونات الغدة الدرقية ، وبيحرق دهون اكتر ، وبيحمي من السمنة المفرطة.

– بيتحكم في الجوع المفرط: اللبتين هو الهرمون اللي موجود في المخ بتفرزه الخلايا الدهنية عشان تدي اشارة للمخ بالشبع ، ومع ذلك في بعض الاحيان ممكن مقاومة اللبتين تمنع الاشارة دي للمخ ، وده هيأدي للجوع المستمر والافراط في الاكل ، وثبت ان زيادة مستويات ال SIRT1 بتمنع زيادة الوزن.

– زيادة حساسية اللبتين: تحسين جينات ال SIRT1 ممكن انها تساعد في السيطرة على الجوع المفرط عن طريقة زيادة حساسية الجسم باللبتين.

– بيحافظ على العضلات الضعيفة: جينات SIRT1 بتساعد في الحفاظ على كتلة العضلات الضعيفة اثناء حرق الدهون ، ويتزود من كتلة العضلات الهيكلية ، وبتعزز من نمو العضلات وتعافيها ، وبالتالي ده هيمنع من فقدان العضلات المرتبط بالعمر ، وفقدان العضلات اللي ممكن ينتج عن ممارسة الرياضة.

– بيقلل الالتهابات: الالتهاب ممكن انه يأدي ان الخلايا تشتغل بشكل مش صح ، وده هيأدي لتراكم الدهون والامراض المرتبطة بالسمنة زي مرض السكر وامراض القلب ، وجينات ال SIRT1 بتساعد في تقليل الالتهاب وتقليل خطر الاصابة بامراض القلب ، الاورام ، ومرض الزهايمر.

دلوقتي بعد ما عرفنا النظام بيشتغل ازاي وفعاليته في خسارة الوزن ، تعالوا نتعرف على الاطعمة اللي بتساعد على تنشيط جينات SIRT1.

sirtfood diet

ايه هي اطعمة نظام Sirtfood؟

الاطعمة اللي بتنشط جينات ال Sirt1 هي في الاساس اطعمة نباتية بتحتوي على مغذيات نباتية قوية ، المواد دي بتنشط المواد الكيميائية الحيوية اللي بتساعد على تنشيط السرتوين ، واللي بيتم تنشيطها بس كاستجابة للضغط الزيادة زي الصيام او ممارسة الرياضة.

ولما تستهلكي اطعمة نظام ال SIRT الجسم بيحاكي نفس الاستجابة للضغط من غير صيام او ممارسة رياضة ، وبالتالي بيحرق السعرات الحرارية والدهون من غير ما فقد كتلة العضلات, ومن غير صيام, ومن غير ممارسة تمارين قوية, تعالوا نعرف الاطعمة في نظام ال Sirtfood.

في تقريبا 20 نوع طعام من اطعمة Sirt1 المنشطة اللي تدخليها في نظامك الغذائي لفقدان الوزن ، والتخلص من دهون البطن الصعبة ، واستعادة كتلة العضلات.

1- الجرجير.

2- الحنطة السوداء او القمح الاسود.

3- نبات الكبر.

4- الكرفس مع الاوراق.

5- الفلفل الحار.

6- الكاكاو.

7- القهوة.

8- زيت الزيتون البكر.

9- الثوم.

10- الشاي الاخضر.

11- اللفت الاخضر.

12- البروكلي.

13- التمر.

14- البقدونس.

15- الهندباء الحمرا.

16- البصل الاحمر.

17- الصويا.

18- الفراولة.

19- الكركم.

20- عين الجمل.

تقدري كمان تدخلي في النظام السمك , الفراخ, اللحم البقري لانها كمان من الاطعمة اللي بتنشط السرتوين ، ولكن مع ذلك ، التركيز يكون على قايمة الاطعمة اللي احنا قولناها فوق.

sirtfood diet

ايه اللي المفروض متاكليهوش؟

اثناء نظام Sirtfood اتجنبي الاطعمة دي:

– الاطعمة المصنعة: السلامي, السجق, الاطعمة المجمدة الجاهزة للاكل, وعصاير الفواكة المعبأة او الجاهزة.

– الاطعمة السكرية: الحلويات, الكيك, الصودا, الدوناتس, المعجنات, المارشملو, القهوة او الشاي مع الكريمة والسكر, السكر المكرر, وكل الاكلات اللي بتحتوي على سكريات.

– الدهون والزيوت: الزبدة, الدهون في اللحوم, والزيوت النباتية.

– النشا: الارز الابيض, والبطاطس.

– الدهون المتحولة: البطاطس المحمرة, البرجر, البيتزا, الفراخ المقلية, الشيبسي, والبسكويت.

نظام ال Sirtfood هو نظام غذائي بسيط جدا وتقدري تمشي عليه بسهولة, وهو بيكون متقسم لمرحلتين ، وكل مرحلة بتستمر لمدة اسبوع.

هنقولك دلوقتي على خطة دايت بسيطة للمرحلة الاولى او الاسبوع الاول ، واللي تقدري تكرريها في المرحلة التانية.

sirtfood diet

خطة نظام Sirtfood لمدة 7 ايام – المرحلة 1 والمرحلة 2.

المرحلة 1: الاسبوع 1

المرحلة الاولى من النظام بتستمر على مرحلتين, المرحلة 1 والمرحلة 2 ، وكل مرحلة بتستمر لمدة 3 و 4 ايام ورا بعض, تعالوا نعرف اللي هتاكلية في المرحلة الاولى من المرحلة 1.

المرحلة الاولى (اليوم 1 – اليوم 3)

1000 سعرة حرارية في اليوم.

– 3 انواع عصاير خضرا من انواع الخضروات اللي قولناها في القايمة.

– 1 وجبة رئيسية.

– 14 او 21 جرام من الشوكولاتة الغامقة بنسبة 85%.

اختيارات للوجبة الرئيسية

– طماطم, جرجير, فول الصويا الاخضر, وسلطة الحنطة السودا مع زيت الزيتون.

– سلطة الكرفس, اللفت, والكبر مع عين الجمل وزيت الزيتون.

– صدر فرخة مع الجرجير, اللفت, وعين الجمل مع الفراولة وزيت الزيتون.

المرحلة التانية (اليوم 4 – اليوم 7)

1500 سعرة حرارية في اليوم.

– 2 عصير اخضر في اليوم.

– 2 وجبة رئيسية في اليوم.

اختيارات للوجبة الرئيسية

– شوربة فراخ.

– شوفان.

– سلطة فراولة, جرجير, وعين جمل.

– سمك مشوي.

– سلطة تفاح, كرفس, خس, مع عصير الليمون وعين الجمل والزبادي والملح والفلفل الاسود.

المرحلة 2: الاسبوع 2

خلال الاسبوع التاني كرري اللي عملتيه خلال الاسبوع الاول.

sirtfood diet

بعد المرحلة 2:

بعد ما تكملي 14 يوم من نظام Sirtfood ، ده النظام الغذائي اللي هتمشي عليه بعده:

– 3 وجبات متوازنة من ال Sirtfood يوميا.

– 1 عصير اخضر يوميا.

– 1 او 2 وجبة خفيفة يوميا من الاطعمة اللي في القايمة.

هل النظام ده كويس ليكي؟

النظام الغذائي بالاطعمة اللي داخلة فيه زي الشاي الاخضر, الكركم, والشوكولاتة الغامقة, اثبتت الدراسات ان ليها خصائص مضادة للالتهابات ومضادة للاكسدة ، بتساعد على محاربة السمنة, امراض القلب, ارتفاع ضغط الدم, والسكتة الدماغية.

والدراسات اثبتت كمان ان الاطعمة للي بتنشط السرتوين بتطول العمر, بتحسن حساسية الانسولين, بتحرق دهون اكتر, وبتقلل من خطر الاصابة بالسرطان ، ونظام ال Sirtfood يعتبر نظام غذائي متوازن بيساعد بشكل كبير على خسارة الوزن.

بالنسبة للعصير الاخضر لو انتي مش متعودة عليه ممكن متتقبليش طعمه اوي في البداية ، وكمان اكل وجبة واحدة بس او اتنين في اليوم مع 1000 – 1500 سعرة حرارية بس ممكن يخليكي تحسي بجوع شديد ، عشان كده النظام زيه زي اي نظام غذائي ممكن ميناسبش كل الاشخاص.

مين الاشخاص اللي المفروض ميجربوش نظام Sirtfood؟

– متجربيش النظام ده لو بتعاني من نقص السكر في الدم.

– لو مؤشر كتلة الجسم اقل من 30.

– لو بتاخدي مضادات اكتئاب.

– لو بتاخدي اي ادوية لاي مشكلة صحية عندك.

– لو ليكي تاريخ طبي مع اي مرض.

– لو بتعاني من IBS / IBD.

– لو عندك حساسية من اي نوع اكل من اللي قولناها في القايمة.

عصير Sirtfood الاخضر مع التفاح والكيوي:

المكونات:

– 1 ثمرة تفاح اخضر متقطع.

– 2 ثمرة كيوي متقطعة.

– 1 ساق كرفس متقطع.

– ½ ليمونة.

– ½ معلقة كبيرة عسل نحل.

– ذرة ملح.

– ½ معلقة صغيرة كركم.

الطريقة:

اخلطي كل المكونات مع بعض واضربيها في البلندر, وصبيها في كوباية واشربيها.

سموزي الشوفان:

المكونات:

– 1 كوباية شوفان.

– 1 كوباية لبن و حليب الصويا.

– 1 كوباية زبادي.

– 10 حبات فراولة كبيرة.

– مليء الكف لوز.

– ½ معلقة صغيرة مستخلص الفانيليا.

الطريقة:

اضربي الفراولة مع اللبن في البلندر, صبي العصير في كوبايتين, وبعدين ضيفي له الشوفان وسيبيه منقوع 10 دقايق, حطي على الكوباية من فوق قطع فراولة ولوز مطحون, وكلي السموزي بالمعلقة.

النظام ده زي ما قولنا هو نظام غذائي متوازن هيساعدك على التخلص من الدهون بسرعة خلال اسبوعين من غير ما تفقدي كتلة العضلات ، ومن اشهر المشاهير اللي خسوا على النظام ده هي المطربة اديل.

استراتيجية نظام غذائي جديد لفقدان الوزن بحساب الوقت مش السعرات الحرارية

تخسيس الوزن بحساب الوقت