ازاي تحمي صحتك العقلية اثناء الحظر خلال فترة الفيروس

بقلمريهام محمود فيمنوعات visibility183

العالم كله بيعيش في ازمة فيروس كورونا اللي خليتنا نقفل على نفسنا ونقعد في البيت ونبعد عن اصحابنا واهلنا ، ونبقى قلقانين على حياتنا وشغلنا ، واحنا النهاردة مش جايين ، واحنا النهاردة مش جايين نقولك اساليب الوقاية من النضافة والتعقيم لان ده كلام كلنا بقينا عارفينه ، لكن النهاردة من خلال موضوعنا هنتكلم عن جانب تاني مهم وهو طرق حماية صحتك العقلية اللي ممكن تتأثر بسبب الاوضاع والضغط النفسي خصوصا لو انتي شخص بيتعرض للقلق والاكتئاب بسهولة.

طرق حماية صحتك العقلية:

1- خليكي على اطلاع على الاخبار ولكن متبالغيش:

مع التغيير السريع لكل حاجة بتحصل وتطور الاحداث ، ممكن ده يحسسك انك مش قادرة تسيطري على الموقف ، وده بدوره ممكن يخلق مشاعر قلق وذعر قوية ، لكن لازم تفكري نفسك ان دي حاجة طبيعية ، دلوقتي العالم كله حاسس بعد امان ، لكن افضل حاجة تعمليها عشان تقللي من المشاعر دي انك تبقي على اطلاع على الجديد ولكن بحدود من غير مبالغة وتقللي من الوقت اللي بتقضيه في قراية الاخبار ، واختاري مصادر رسمية موثوقة زي منظمة الصحة العالمية مواقع الاخبار الموثوقة.

وبننصحك متقضيش ساعات طويلة في البحث عن معلومات جديدة لانها هتكون مرهقة عليكي ، ممكن بس تشوفي الاخبار اكتر من مرة في اليوم لمدة دقايق كل مرة ، وبعدها حاولي انك تعيشي حياتك طبيعي ، وبنأكد عليكي انك تفضلي في البيت لو تقدري تشتغلي من بيتك ، وقللي من الاتصال الاجتماعي المباشر.

طرق حماية صحتك العقلية
طرق حماية صحتك العقلية

2- متهمليش العناية بنفسك:

القعدة فترة طويلة في البيت ، مع تقليل الاتصال الاجتماعي المباشر ومن غير كمان الانشطة اللي بتحبيها وكنتي متعودة تعمليها ده ممكن يكون ليه تأثير كبير جدا على صحتك العقلية ، ولو اهملتي العناية بنفسك فطبيعي جدا انك هتحسي كل حاجة حواليكي مش صح.

لانه في الحالة دي هيكون سهل انك تقعي في فخ القلق والتوتر ، والعناية بنفسك هتقلل شوية من حدة المشاعر دي وتخليكي تحسي بشعور افضل وبتفائل اكتر.

بننصحك متنسيش تعملي الحاجات دي:

– اغسلي اسنانك بالفرشة كل يوم وحافظي على رطوبة بشرتك عشان تزودي من راحتك الجسدية.

– دوري على اي نشاط حركي تقدري تعمليه في البيت ، زي اليوجا ، البيلاتيس ، ممكن تمارسيها عن طريق فيديوهات على اليوتيوب من غير ما تضطري انك تخرجي بره البيت.

– غذي روحك بالكتب ، افلامك المفضلة ، والنشاطات اللي ممكن تزود طاقتك الايجابية وتخليكي تحسي انك احسن.

– حافظي على ترطيبك من خلال شرب كمية كافية من المية.

– شمي هوا فريش نقي عن طريق فتح الشبابيك والبلكونة بشكل منتظم.

طرق حماية صحتك العقلية

3- حافظي على التواصل الاجتماعي عن طريق النت:

مش معنى العزلة الاجتماعية اللي احنا عايشين فيها دي اننا نقطع التواصل باصحابنا وعيلتنا ، ممكن تتصلي باصحابك وعيلتك عن طريق الفيديو كول وحافظي على التواصل الاجتماعي من خلال الانترنت ، ابعتي ايميلات ورسايل دعم ، وخليكي مع اهلك واصحابك حتى لو مش معاهم في نفس المكان ، ده هيسهل الفترة دي ويخليها تعدي بسلام.

في النهاية دي مش اول مرة العالم والانسانية يواجهوا تحديات كبيرة ، ولكن مع الامل ، نقدر نعدي المرحلة دي ، وممكن اننا نتكيف ونتغلب على الازمة دي.

5 حاجات مفيدة تعمليهم خلال فترة العزل المنزلي.. اعرفيهم واستفيدي منهم

5 حاجات مفيدة تعمليهم خلال فترة العزل المنزلي.. اعرفيهم واستفيدي منهم
5 حاجات مفيدة تعمليهم خلال فترة العزل المنزلي.. اعرفيهم واستفيدي منهم