ازاي تعملي ازالة السموم من البيت

بقلمريهام محمود فيمنوعات visibility186

كل حاجة بنستخدمها في البيت تقريبا بتحتوي على مواد كيميائية مضرة ، من معطرات الجو, المنظفات المنزلية, منظفات الغسيل, وغيرها من المنتجات اللي ممكن نكون بنستخدمها في البيت, عادة المنتجات دي بتحتوي على مواد زي الامونيا, الفورمالديهايد, والمبيدات والمعادن التقيلة, كل المواد دي مضرة بالصحة, ممكن تأثر على الجهاز العصبي, الجهاز المناعي, الغدد الصماء, والقلب والاوعية الدموية, ومش بس كده لكن كتير من المواد دي بتكون مسرطنة, والاسوأ من ده ان المواد الكيميائية دي مش بتفضل في المنتجات لكن بتنتشر في الهوا, ومع الغبار, الاكل, والمشروبات وكل حاجة موجودة عندك في البيت ، وبما اننا 90% من وقتنا بنقضيه جوه البيت ، وبنحتك بكل حاجة في البيت وبنتعرض لكل المواد الكيميائية دي, في حقيقة من منظمة الصحة العالمية بتثبت ان حوالي 4 مليون شخص حوالين العالم بيموتوا كل سنة من تلوث هواء المنزل, ولكن الخبر الحلو انك تقدري تحمي نفسك وعيلتك من الاضرار دي كلها, كل اللي انتي محتاجة تعمليه هي ازالة السموم من البيت, وده اللي هنعرفه مع بعض النهاردة في السطور الجاية.

طرق ازالة السموم من البيت:

1- اتجنبي المنتجات اللي بتحتوي على عطور:

لو عايزة تتخلصي من السموم من البيت ، ابدأي بالمنتجات اللي ليها ريحة ، المنتجات العطرية بتحتوي على مواد كيميائية اسمها الفثالات ومواد متطايرة ومركبات عضوية ، اللي بتستخدم لنشر العطر في الجو ، المشكلة ان المواد الكيميائية دي بتسبب مشاكل صحية زي الحساسية, تهيج الانف, الحلق, الرئتين, وحتى بتسبب كمان تلف الجهاز العصبي المركزي.

فلو عايزة تخلي ريحة البيت حلوة ممكن تعتمدي على الحاجات الطبيعية زي البخور ، الورد الطبيعي ، او شموع معطرة ، وهوي البيت باستمرار عشان تجددي فيه الهوا وتتخلصي من اي روايح مش حلوة.

ازالة السموم من البيت
ازالة السموم من البيت

2- استخدمي منتجات تنضيف طبيعية:

هل تعرفي ان كل مرة بتستخدمي فيها منتج تنضيف بيسيب مواد كيميائية سامة وراه. وعشان تزيلي السموم من البيت ، استبدلي المنتجات دي بالمواد الطبيعية او استخدمي منظفات غير سامة ، بالحاجات الطبيعية هتوصلي لنفس النتيجة من غير ما تضري صحتك ، ممكن بسهولة تستخدمي منتجات تنضيف طبيعية زي صودا الخبز “الكربوناتو”, الملح, الخل, عصير الليمون, زيت شجرة الشاي, وغيرها من منتجات التنضيف الطبيعية.

ازالة السموم من البيت

3- ابدأي استخدمي الزجاج بدل البلاستيك:

البلاستيك بيحتوي على مادة كيميائية اسمها BPA, المادة الكيميائية دي سامة جدا وممكن انها تسبب ضرر في خلايا الجسم ، عشان الافضل انك تستخدمي الزجاج قدر الامكان في تخزين الاكل واتجنبي الشرب في الكوبايات البلاستيك ، واستخدام الاطباق والاواني والاغطية البلاستيك.

لو بتشربي مية خلال فترة النهار وانتي بره البيت ، اشربي في كوباية او ازازة من الستانلس ستيل المقاومة للصدأ لانها بتكون خالية من المادة السامة اللي موجودة في البلاستيك وكمان الميزة انها مش هتتكسر.

حاجة كمان لازم تتجنبيها وهي منتجات الطهي اللي ضد الالتصاق زي الحلل والطاسات ، لانها بتحتوي على تفلون اللي ممكن انها تتكسر منها جزيئات وتدخل في الاكل وتاكليها وده ثبت انه بيسبب السرطان.

ازالة السموم من البيت

4- اتخلصي من الغبار اول بأول:

كل المواد الكيميائية اللي في المنتجات اللي بتستخدميها بتنتهي في الاخر في الغبار او التراب اللي موجود في البيت ، واسوأ الحاجات اللي بتثبت عليها المواد الكيميائية هي الالكترونيات والاثاث ، ولازالة السموم اتخلصي من الغبار ، واشفطي التراب بالمكنسة الكهربا اول بأول ، ده بيساعد على التخلص من كل الغبار السام ومسببات الحساسية.

ازالة السموم من البيت

5- ازالة السموم من مية الحنفية:

كلنا عارفين اكيد ان المية اللي بتوصل لنا في البيت مش نقية مية في المية ، عشان كده لازم انك تستخدمي فلتر كويس للمية ، عشان تنقيها من المواد الكيميائية والرصاص وغيرها من المواد السامة.

ازالة السموم من البيت

6- نضفي السجاد كويس:

اول حاجة اختاري سجاد نوعه كويس ، لان في انواع سجاد بتكون مصنوعة من مواد لاصقة ومواد كيميائية سامة ومضرة على الصحة ، واتأكدي انك تنضفيه كويس وتشفطي منه التراب باستمرار لان الغبار بيتراكم عليه مع مرور الوقت.

7- اختاري الخشب الصلب او الاثاث الغير معالج:

خليكي حذرة لو بتشتري اثاث خشبي مضغوط ، لان عملية الضغط دي عادة بتتعمل بمادة كيميائية اسمها الفورمالديهايد والمادة دي سامة جدا ، عشان كده حاولي انك تختاري اثاث من الخشب الصلب على قد ما تقدري واتجنبي الخشب المعالج ، ولو هتشتري اثاث مضغوط سيبيه بره البيت كام يوم عشان المواد اللي فيه تتبخر.

8- وقفي استخدام مبيدات الحشرات:

لو بتعاني من الحشرات في البيت ، حاولي تلاقي لها حل طبيعي بدل المبيدات الحشرية ، لان مبيدات الحشرات من اكتر المنتجات السامة ، والمبيدات ليها بدايل تانية كتير طبيعية ، زي اللافندر ، زيت شجرة الشاي ، واي منتجات تانية طبيعية بروايح قوية.

9- املي البيت بالزرع الطبيعي:

الخطوة الاخيرة لازالة السموم من البيت هو انك تمليه بالزرع الطبيعي ، والمفروض انه يكون في كل غرفة في البيت زرع ، لان الزرع بيساعد على تنضيف الهوا وفي نفس الوقت هيدي ريحة حلوة للجو ، ولو انتي مش بتحبي الزرع او مش هتقدري انك تشتري زرع ، يبقى البديل هو استخدام مرشح هواء.

نتمنى ان النصايح دي تفيدكم لازالة السموم من البيت ، لان مهم جدا انك تعيشي في بيئة نضيفة بقدر الامكان ، عشان تحافظي على صحتك ، وده اكيد هيبقى مهمة سهلة بمجرد ما تعرفي ايه اللي المفروض تتجنبيه.

10 طرق للتخلص من الطاقة السلبية في البيت

طرق للتخلص من الطاقة السلبية