كل اللي محتاجة تعرفيه عن تقنية التقشير البارد للبشرة

بقلمريهام محمود فيبشرة visibility339

التقشير البارد هو واحد من افضل انواع تقشير البشرة ، ويعتبر حل مثالي لبشرة خالية من البقع والتصبغات والكلف ، والنوع ده من التقشير مناسب لتقشير البشرة والجسم ، والتقشير ده يعتبر من احدث انواع العلاجات لمشاكل البشرة والحصول على بشرة مثالية ، والنهاردة من خلال موضوعنا هنتعرف بالتفصيل على تقنية التقشير البارد للبشرة ، وفوايدها.

ايه هي تقنية التقشير البارد للبشرة:

التقشير البارد هو من احدث العلاجات اللي تعتبر حل بديل للتقشير الكيميائي ، اللي بيعتمد على مواد كيميائية قاسية على البشرة اللي ممكن ينتج عنها ضرر للبشرة ، ولكن التقشير البارد بيعتمد على استخدام حمض اللاكتيك وحمض الكوجيك اسيد ، اللي ليها تأثير فعال جدا في علاج التصبغات والبقع الغامقة والندبات الناتجة عن حب الشباب وغيرها من الاسباب.

والمواد دي بتتميز انها بتتحكم في الميلانين المسؤول عن لون البشرة ، وبتمنع التصبغات والبقع في المستقبل.

تقنية التقشير البارد للبشرة
تقنية التقشير البارد للبشرة

انواع التقشير البارد:

التقشير البارد ليه نوعين هما كوزميلان ، وديرماميلان ، الطريقتين بيتميزوا بفاعلية قوية في علاج البقع الغامقة والنمش والتصبغات ، والنوع ده من التقشير بيعالج:

– بقع التقدم في العمر.

– الكلف.

– التصبغات الناتجة عن الشمس.

– البقع الغامقة الناتجة عن حب الشباب او اي اسباب تانية.

– فرط التصبغ الناتج لبعض الامراض الالتهابية.

– النمش.

– التجاعيد والخطوط الرفيعة.

– الندبات.

– اثار حب الشباب.

– البثور والحبوب في البشرة والجسم ، ومنع تكونها تاني.

– بيساعد على تجديد خلايا البشرة وزيادة نضارتها.

– التخلص من الجلد الميت.

– تقليل التهاب البشرة.

ايه هو تأثير تقشير كوزميلان وديرماميلان على البشرة:

النوع ده من التقشير اللي بيميزه انه بيخلصك من البقع والتصبغات الموجودة بالفعل على البشرة ، بالاضافة الى انه بيشتغل على الميلانين وبيمنع العوامل اللي بتأدي لفرط التصبغ وبيقلل انتاج الميلانين وبالتالي بيحمي البشرة من البقع في المستقبل.

كمان بيزود معدل تجديد خلايا البشرة ، وده بيخلي البشرة نضرة وصحية ، وبيقلل من آثار التجاعيد والتقدم في العمر.

تقنية التقشير البارد للبشرة

ايه الفرق بين التقشير البارد وانواع التقشير التانية؟

تقشير كوزميلان وديرماميلان بيتميزوا بفاعليتهم القوية اللي بتدي نتايج مضمونة 100% مثبتة بالتجارب ، ونتايجة ناجحة جدا في اغلب الحالات ، وتقريبا حقق نتايج بنسبة 90% في علاج الكلف وتفتيح وتوحيد لون البشرة وعلاج شيخوخة البشرة ، بالاضافة انه خالي من مادة الهيدروكينون ، اللي عادة بتستخدم في كريمات التفتيح وبتسبب بعض الاثار الجانبية المضرة للبشرة.

تقنية التقشير البارد للبشرة

طريقة التقشير البارد للبشرة:

التقشير البارد بيتقسم لمرحلتين ، المرحلة الاولى بتكون في مركز التجميل واللي فيها الدكتور المتخصص بيوزع على البشرة كريم التقشير المناسب ليكي بالكمية المناسبة والتركيز المناسب للحالة وده بيحدده الدكتور ، وبيتساب على البشرة لفترة الدكتور هو اللي بيحددها وغالبا بتكون من 6 – 12 ساعة ، وبعدها الكريم بيتغسل بالمية بس من غير اي غسول او صابون.

بعدها بتبدأ المرحلة التانية وهي العلاج في البيت بكريمات ترطيب “كوزميلان 2 او ديرماميلان ، وغيرها من المنتجات اللي بيحددها الدكتور ، وبعدها ممكن تكرري الجلسة تاني حسب حاجة بشرتك او عشان تحافظي على نضارة البشرة بعد التقشير.

تقنية التقشير البارد للبشرة

ايه الفرق بين تقشير كوزميلان وتقشير ديرماميلان:

الفرق بينهم بيكون في التركيز ، النوعين بيحتوا على مادة حمضة قوية بتساعد على تقشير البشرة ، بالاضافة للاحماض الفينولية واحماض الجليكوليك.

تقشير ديرماميلان بيتميز انه بيحتوي على تركيز احماض اعلى بتوصل ل 35% ، اما كوزميلان بيكون تركيزة اقل بيوصل تقريبا ل 30% ، وعشان كده يعتبر تقشير ديرماميلان مناسب اكتر للبقع الغامقة والاثار العميقة في البشرة ، اما تقشير كوزميلان مناسب اكتر للبشرة الحساسة.

نتيجة التقشير البارد:

تأثير تقشير ديرماميلان وكوزميلان بيختلف من شخص للتاني حسب نوع البشرة ودرجة تحملها وتركيز التقشير وفترته ، والدكتور هو في النهاية اللي بيحدد التركيز اللي بشرتك محتاجاه.

تأثير التقشير على البشرة ، غالبا بعد الجلسة ممكن يحصل عن بعض الاشخاص شوية احمرار وتورد للبشرة ، واحساس بحرقان في الوش عن اشخاص تانيين او حتى تورم بسيط في البشرة خلال الايام الاولى من التقشير ، وبيكون متوقع ان الاثار دي تختفي خلال 3 – 7 ايام بعد التقشير من خلال ترطيب البشرة بالكريمات اللي هيحددها الدكتور.

لو انتي بشرتك محتاجة بس لعلاج اثار الحبوب السطحية وتوحيد لون البشرة هتحتاجي لجلسة واحدة بس ، اما لو بشرتك بتعاني من الكلف او بقع غامقة عميقة ، او تقشير المناطق الحساسة ، او تقشير الكوعين والركبتين في الحالة دي هتحتاجي 4 جلسات او اكتر.

عادة النتيجة بتبان من اول جلسة ، خلال ايام بعد التقشير ، والنتايج النهائية بتتوقف على حالة البشرة ، وعلى اللي بيحدده الدكتور والمتخصص ، وفترة العلاج.

ولكن بعد الجلسة الاولى هتلاحظي تقشير بسيط على بشرتك ، وهيجي بعده تجديد للبشرة وتفتيح للبقع الغامقة ، وبشكل عام النتيجة النهائية هتظهر خلال 4 شهور “بعد 4 جلسات بمعدل جلسة كل شهر” ، لحد سنة من العلاج على حسب الحالة.

نصايح بعد التقشير البارد:

في شوية نصايح وتعليمات وعناية ضروري انك تمشي عليها بعد جلسة التقشير.

1- تجنب ملامسة مستحضر ديرماميلان او كوزميلان للعين وللاغشية المخاطية ، وفي حالة انهم اتعرضوا للمستحضر ضروري غسلهم فورا بالمية.

2- تقشير كوزميلان وديرماميلان مينفعش لسن اقل من 12 سنة.

3- في بعض الاثار الجانبية اللي ممكن حصل للبشرة بعد التقشير زي الحكة او تورد او تقشر البشرة ، وده طبيعي جدا ، عشان كده لازم تلتزمي بمستحضرات الترطيب اللي هيحددها الدكتور بعد جلسة التقشير لترطيب بشرتك والمساعدة على تجديد البشرة والتخلص من القشور.

4- اتجنبي التعرض المباشر للشمس ، واتجنبي كمان التعرض لاي مصدر حرارة مرتفع ، زي الحمام المغربي او الساونا ، او حرارة النار في المطبخ.

5- اتجنبي استخدام المكياج ومستحضرات التجميل في الفترة الاولى بعد التقشير ، واكتفي بس بالمستحضرات اللي الدكتور هيكتبهالك.

6- لو هتخرجي في الشمس استخدمي واقي من الشمس وجدديه كل ساعتين طول ما انتي بره ، والواقي يكون بعامل حماية ميقلش عن SPF 50.

7- تجنب تقشير ديرماميلان وكوزميلان اثناء فترة الحمل والرضاعة الطبيعية.

8- التزمي بكل تعليمات الدكتور بالظبط من غير اهمال.

9- حاولي تلبسي قبعة كبيرة لو هتتعرضي للشمس.

10- اشربي كمية كبيرة من المية ، وحاولي تاكلي اكل صحي متوازن عشان يساعد في سرعة تجديد البشرة.

فوايد تبييض البشرة اللي محتاجة تعرفيها .. وازاي تعمليه في البيت بمكونات طبيعية