بالصور والخطوات.. اعرفي ازاي تعملي وصفة الكفتة على الطريقة الجزائرية
بقينا خلاص في آخر رمضان وقربنا شهر الخير، وفي الأيام اللي زي دي بتبقى خلصتي كل أفكار ووصفات الفطار اللي ممكن تعمليها، لانه بنحاول نجدد ونغير الوصفة من يوم للتاني، ولأنه الكفتة من أكتر الوصفات اللي المصريين بيحبوها وكمان لذيذة وسريعة ونتيجتها مضمونة، في المقال ده هنقولك على طريقة جديدة تعملي بيها الكفتة، اعرفي معانا بالصور والخطوات.. ازاي تعملي وصفة الكفتة على الطريقة الجزائرية
بالصور والخطوات.. اعرفي ازاي تعملي وصفة الكفتة على الطريقة الجزائرية
المقادير:
نص كيلو لحمة مفرومة
4 فصوص توم
نص كوباية بصل مفروم.
3 حبات طماطم صغيرة.
ملح وفلفل
بقدونس
نص معلقة من توابل راس الحانوت (ممكن تلاقيها عند اي عطار كبير)، وممكن تستخدمي أجزاء متساوية من البابريكا+الزعفران+ فلفل حلو ناشف + كزبرة ناشفة كبديل له.
نص كوباية مياة
الخطوات:
امزجي اللحمة مع نص كمية التوم ومعلة بصل مفروم وممكن تضيفي كمية بسيطة من المياة واعجنيها كويس وشكليها على شكل كرات.
في طاسة على نار متوسطة، حطي معلقتين من زيت الزيتون وابدأي سوي الكفتة لحد 10 دقايق على الجنبين، لحد ما تبقىمقرمشة من بره ويختفي منها اللون الوردي بتاع اللحمة النية.
قللي النار على الكفتة، وضيفي باقي كمسة البصل والتوم وسيبيهم يستووا حوالي 5 دقايق لحد ما البصل يبقى لونه تقريبا شفاف، ضيفي التوابل مع الملح والفلفل.
آخر خطوة معانا، في طاسة تانية ضيفي معلقة من زيت الزيتون، وضيفي الطماطم وتوابل راس الحانوت او البديل ليها ومعاها البقدونس وباقي كمية المياة، وسيبيها على النار لحد ما الطماطم تنعم ويبقى قوام المكونات أقرب للصوص.
التقديم:
حطي الكفته مع ميكس البصل والتوم في طبق التقديم وصبي عليها صوص الطماطم من فوق، وممكن كمان تقدميها مع أرز أبيض وبالهنا والشفا.
اعرفي معانا كمان وصفة قوارب الكوسة باللحمة المفرومة والبشاميل والجبنة الموتزاريلا