فوايد تبييض البشرة اللي محتاجة تعرفيها .. وازاي تعمليه في البيت بمكونات طبيعية
كلنا عايزين بشرتنا تبقى حلوة وخالية من اي عيوب ، وكلنا تقريبا بنتولد ببشرة نقية ونضيفة ، ولكن للاسف انها مش بتفضل كده بسبب الاوساخ والتلوث والروتين اليومي الغلط كل ده ممكن يدمر البشرة لانها بتبقى حساسة وبتتاثر بسرعة ، وممكن البشرة تتعرض لمشاكل كتير زي التصبغات ، تغيير لون البشرة ، البقع الغامقة ، بالتالي بيبقى تبييض البشرة اولوية عند كل بنت عشان تتخلص من كل المشاكل دي ، والنهاردة من خلال المقال بتاعنا هنتعرف مع بعض على فوايد تبييض البشرة ، وهل آمن او لا ، وبعض الوصفات الطبيعية اللي هتساعدك على تبييض لبشرة.
فوايد تبييض البشرة:
1- تفتيح البشرة:
اكيد اول واهم ميزة للتبييض هي تفتيح البشرة عن طريق تقليل محتوى الميلانين في بشرتك ، المسؤول عن لون البشرة اللي بيخلي بشرتك بيضا وفاتحة اكتر.
2- تفتيح شعر الوش:
من فوايد عملية تبييض البشرة ، هي انها بتفتح او بتشقر شعر الوش ، وبيخلي الشعر اقل وضوح على البشرة ، ودي تعتبر ميزة للبنات اللي شعرهم بيطلع بسرعة او كثيف وبشرتهم حساسة من ازالته بشكل مستمر ، التبييض هيساعد انه يخلي الشعر مش باين بطريقة سهلة ومافيهاش الم.
3- توهج ونضارة الجلد:
من اهم فوائد التبييض هو انه بيساعد على توهج ونضارة البشرة ، لانه بيتخلص من غمقان البشرة وبيخلي بشرتك افتح ، وبيزيل الشوائب من على البشرة ، وبيتخلص من الاندر تون الغامق من بشرتك ، وبيديها تأثير مضيء ومتوهج.
4- التخلص من البقع:
البقع الناتجة عن انسداد المسام بالاوساخ والاتربة اللي بيفسد مظهر الجلد مجرد ما جلدك يمتصها ، التبييض بيساعد على التخلص من المشكلة دي.
هل تبييض البشرة آمن؟
التبييض يعتبر وسيلة فعالة جدا لتفتيح البشرة ، وازالة الاوساخ من البشرة ، وبيدي بشرتك توهج طبيعي ، لكن هل هو آمن للبشرة؟ هو يعتبر آمن ومش آمن ، لانه التبييض اللي من مكونات طبيعية اكتر آمان وثقة على البشرة مقارنة بالتبييض الكيميائي المتاح في المنتجات المتوفرة في الصيدليات او محلات مستحضرات التجميل والعناية بالبشرة.
ولو بتسألي ازاي تقدري تعملي تبييض البشرة بمكونات طبيعية ، احنا عندنا اجابة السؤال ده في السطور الجاية من خلال مجموعة وصفات تبييض بمكونات طبيعية.
بدائل طبيعية لمنتجات تبييض البشرة:
هنشوف وصفات تبييض بمكونات طبيعية ، سهلة التحضير والاستخدام ، وفي نفس الوقت هتديكي نفس نتيجة منتجات التبييض اللي ممكن تكون غير آمنه كفاية على بشرتك.
– وصفة الطماطم والليمون للتبييض:
عصير الطماطم بيحتوي على خصائص تبييض للبشرة ، وبيساعد على التخلص من البقع الغامقة من البشرة.
هتحتاجي ل ½ حبة طماطم و ½ ليمونة ، في بولة صغيرة اعصري نص الليمونة ، واضربي الطماطم في البلندر وضيفي عصير الطماطم لعصير الليمون ، اخلطيهم مع بعض كويس ، وزعي الخليط على الوش والرقبة ، سيبيه لمدة 30 دقيقة ، وبعدين اغسليه بمية باردة ، كرري الوصفة دي مرة في الاسبوع للحصول على افضل النتايج.
– وصفة الزبادي والعسل:
حمض اللاكتيك معروف بتبييض لون البشرة ، والزبادي هو واحد من المصادر الغنية بحمض اللاكتيك ، وهيساعد كمان على تحسين علامات الشيخوخة والبقع الغامقة.
هتحتاجي 1 كوب زبادي ، 1 معلقة كبيرة عسل ، 4 – 5 لوزات ، كام نقطة عصير ليمون ، وشوية كركم صغيرين.
اخلطي الزبادي والعسل مع بعض ، اطحني اللوز لحد ما يبقى ناعم وضيفيه معاهم ، وبعدين ضيفي عصير الليمون والكركم في الاخر وقلبي المكونات كلها مع بعض كويس جدا.
وزعي الخليط على الوش والرقبة وسيبيه لمدة 45 دقيقة ، وبعدها اغسلي وشك ورقبتك بالمية الباردة ، كرري الوصفة دي يوميا للحصول على افضل النتايج.
زي ما قولنا تبييض البشرة بيساعد على استعادة لون البشرة ، والتخلص من غمقان الجلد وتفتيحه ، ازالة البقع الغامقة والشوائب من البشرة ، وفي نفس الوقت بشكل آمن بعكس التبييض الكيميائي اللي ممكن يأدي لاثار جانبية زي تهيج الجلد.
