ازاي تستخدمي النعناع للتخلص من حب الشباب في اسبوعين بس

بقلمريهام محمود فيبشرة visibility1194

كتير مننا ممكن يعاني من حب الشباب, البثور, والطفح الجلدي خصوصا في فصل الصيف ده بيزيد اكتر من اي موسم تاني ، وبما اننا دخلنا تقريبا في الصيف والجو الحر ، ولو انتي صاحبة بشرة دهنية دايما بتتعرض لحب الشباب والبثور خلال الحر ، النهاردة من خلال موضوعنا هنتعرف على علاج حب الشباب بالنعناع ، وهنقولك فوايدة للبشرة وازاي تستخدميه.

علاج حب الشباب بالنعناع:

1- عصير الليمون والنعناع لحب الشباب:

هتحتاجي:

نعناع.

1 معلقة كبيرة عصير ليمون.

مية.

الطريقة:

اغسلي كمية مليء الكف من ورق النعناع ، واضربيهم في الخلاط مع شوية مية صغيرين لحد ما يتكون عندك معجون ناعم.

ضيفي عصير الليمون للنعناع وقلبيهم مع بعض كويس.

وزعي الخليط بالتساوي على البشرة كلها والرقبة ، سيبيه 15 – 20 دقيقة وبعدين اغسليه بالمية.

كرري الوصفة من 2 – 3 مرات في الاسبوع.

عصير الليمون فعال جدا في التخلص من حب الشباب ، بالاضافة انه بيحتوي على خصائص مضادة للبكتيريا ومضادة للميكروبات ، عشان كده مفيد جدا في علاج البثور ، ولانه بيحتوي على حمض الستريك بيساعد على تنضيف البشرة بعمق وتقشيرها وازالة الشوائب والسموم ، وبالتالي تقليل فرص الاصابة بحب الشباب.

النعناع كمان يعتبر من العلاجات الفعالة جدا لحب الشباب والبثور ، لانه بيحتوي على خصائص مضادة للبكتيريا بتساعد على تدمير البكتيريا المسببة لحب الشباب ، كمان بيحتوي على حمض الساليسيليك المعروف بخصائصة المضادة لحب الشباب ، وحمض الساليسيليك بيساعد كمان على تقشير الطبقة العليا من الجلد وازالة الشوائب من المسام ، وبالتالي تقليل فرص تكوين حب الشباب الجديد وتجفيف حب الشباب الموجود بسرعة.

علاج حب الشباب بالنعناع
علاج حب الشباب بالنعناع

2- مية الورد والنعناع لحب الشباب:

هتحتاجي:

نعناع.

مية ورد.

الطريقة:

هاتي شوية من اوراق النعناع دوقيها في الهون ، وضيفي لها مية ورد لحد ما يتكون عندك معجون ناعم.

وزعي الخليط بالتساوي على البشرة ، سيبيه 15 – 20 دقيقة وبعدين اغسليه بالمية.

كرري العلاج ده مرتين في الاسبوع.

مية الورد من المكونات المعروفة اللي بتساعد على علاج حب الشباب والبثور ، ومعروف انه مطهر للبشرة وبيساعد على تنقية البشرة ، كمان مية الورد بتحتوي على خصائص مضادة للبكتيريا واللي بتساعد على تدمير البكتيريا المسببة لحب الشباب وتطهير المسام المسدودة  ، كمان ليها خصائص مضادة للالتهابات بتساعد على تهدئة احمرار وتورم حب الشباب ، مية الورد بتساعد كمان على تحسين عمل خلايا الجلد وتفتيح العلامات والندبات وتنقية الجلد.

مية الورد كمان ليها دور مهم جدا في الحفاظ على درجة حموضة الجلد واستعادة المستوى الهيدروجيني الطبيعي للبشرة ، اللي بيساعد على تجنب كتير من مشاكل الجلد ، بما فيها حب الشباب والبثور.

علاج حب الشباب بالنعناع

3- اللبن الرايب والنعناع لحب الشباب:

هتحتاجي:

½ معلقة صغيرة نعناع.

1 معلقة كبيرة لبن رايب.

مية.

الطريقة:

اخلطي النعناع مع اللبن الرايب وشوية مية صغيرين قلبيهم مع بعض كويس.

وزعي الخليط على البشرة وسيبيه 15 – 20 دقيقة ، بعدها اغسليه بالمية.

كرري الوصفة 2 – 3 مرات في الاسبوع.

اللبن الرايب معروف انه علاج طبيعي فعال لحب الشباب ، لانه بيحتوي على خصائص طبيعية مضادة للبكتيريا ، وبيحتوي كمان على البرو بيوتيك اللي تعتبر البكتيريا الجيدة اللي بتساعد على تدمير البكتيريا المسببة لحب الشباب وبتخلي البشرة صحية ونقية مع مرور الوقت.

اللبن الرايب بيحتوي كمان على الزنك ، وهو معدن حيوي لمحاربة حب الشباب ، الزنك بيحتوي على خصائص قابضة ، واللي بتساعد على تقليل حجم المسام وبالتالي التحكم في الدهون ، بيحتوي الزنك كمان على مضادات الالتهابات اللي بتساعد على علاج حب الشباب.

اللبن الرايب يعتبر مصدر كبير لحمض اللاكتيك ، اللي بينتمي لعائلة AHA اللي بتساعد على تقشير البشرة وفتح المسام وازالة الشوائب من سطح الجلد ومنع ظهور البثور.

اللبن الرايب كمان يعتبر مرطب طبيعي للجلد ، بيدي البشرة كمية الترطيب المناسبة مع منع الغدد الدهنية في نفس الوقت من الافراط في النشاط وانتاج زيت اكتر من المطلوب.

علاج حب الشباب بالنعناع

4- غسول النعناع والليمون ومية الورد لحب الشباب:

هتحتاجي:

2 كوب مية.

½ كوباية من اوراق المرمرية.

½ كوباية من اوراق النعناع.

معلقة كبيرة مية ورد.

2 معلقة صغيرة من عصير الليمون.

الطريقة:

اغلي كوبايتين المية وانقعي فيهم اوراق النعناع واوراق المرمرية لمدة ساعة ، بعدها صفي المية وضيفي لها عصير الليمون ومية الورد.

وكده يبقى الغسول بتاعنا جاهز صبيه في ازازة نضيفة واحتفظي بيها في التلاجة للاستخدام.

لما تيجي تستخدميه حطي منه كمية صغيرة على ايدك ودلكي بيه البشرة زي طريقة الغسول العادي ، وبعدين اغسلي بشرتك بمية باردة.

وممكن كمان تغلي اوراق النعناع بس لوحدها في المية من غير اي اضافات وتصفيها وتسيبيها لما تبرد خالص ، وتستخدميه كغسول للبشرة ، واحتفظي بيه في التلاجة لكل استخدام.

5- غسول النعناع والخيار:

هتحتاجي:

حزمة من اوراق النعناع الطازة.

½ معلقة صغيرة عصير ليمون.

½ معلقة صغيرة عصير برتقان.

½ معلقة صغيرة عصير خيار.

¼ معلقة صغيرة من مية مغلي الكرنب.

الطريقة:

اغلي اوراق النعناع في لتر مية على نار هادية.

صفي النعناع وضيفي له عصير الليمون والبرتقان والخيار ومغلي الكرنب.

سيبي الخليط لحد ما يبرد ، وبعدين صبيه في ازازة نضيفة واستخدميه كغسول للبشرة.

6- غسول النعناع والبقدونس:

اخلطي معلقتين من اوراق النعناع الطازة المفروم ، مع ½ كوباية بقدونس وضيفي لهم كوباية مية مغلية.

سيبي الخليط منقوع في المية لمدة ساعة مع تغطيته ، وبعدين صفيه.

صبي الخليط في ازازة نضيفة واستخدميه كغسول للبشرة.

روتين عناية بالبشرة بالبطاطس هيغير بشرتك بالكامل

روتين عناية بالبشرة بالبطاطس