قوارب الكوسة باللحمة المفرومة والبشاميل والجبنة الموتزاريلا
لو عايزة تعملي محشي كوسة بطريقة مختلفة ، النهاردة هنقولكم طريقة عمل قوارب الكوسة باللحمة المفرومة والبشاميل والجبنة الموتزاريلا, وصفة سهلة وطعمها لذيذ جدا.
قوارب الكوسة باللحمة المفرومة:
المكونات:
– كيلو كوسة بحجم متوسط.
– ½ كيلو لحمة مفرومة.
– 1 حبة بصل مفرومة.
– معلقة كبيرة ثوم مهروس.
– ¼ كوباية بقدونس مفروم.
– 1 معلقة كبيرة زيت نباتي.
– 1 معلقة صغيرة ملح.
– 1 معلقة صغيرة فلفل اسود.
– 1 كوب جبنة موتزاريلا مبشورة.
– ¼ معلقة صغيرة جوزة الطيب مبشورة.
– 1 كوباية عصير طماطم متخففة بالمية ومضاف لها مكعب مرقة دجاج.
– 2 كوباية صلصة بشاميل.
طريقة التحضير:
1- اغسلي الكوسة كويس واقطعي الاطراف بتاعتها من الناحيتين.
2- اقسمي الكوسة نصين بالطول ، وفرغي الكوسة من اللب بتاعها.
3- في طاسة حطي شوية زيت نباتي صغيرين واقلي قوارب الكوسة لحد ما تاخد لون بسيط ، وطلعيها وسييها على جنب لحد ما تحضري الحشوة.
4- في طاسة تانية على النار حطي الزيت ، وضيفي له البصل والثوم وقلبي لحد ما البصل يدبل.
5- ضيفي اللحمة المفرومة للبصل وقلبيها لحد ما لونها يتغير ، وسيبيها لحد ما تستوي على درجة حرارة منخفضة, ممكن مع اللحمة تضيفي لب الكوسة اللي طلعتيه وتسويه مع اللحمة.
6- بعد ما اللحمة تستوي ضيفي البقدونس المفروم وقلبي المكونات كلها مع بعض.
7- كده تبقى الحشوة جاهزة ، احشي بيها قوارب الكوسة.
8- دلوقتي هنحضر البشاميل ، في حلة على النار ضيفي الزبدة مع الدقيق ، وقلبي الدقيق كويس لحد ما ياخد لون دهبي فاتح ، ضيفي اللبن وقلبيه على نار هادية لحد ما صوص البشاميل يبقى سميك, تبليه بالملح والفلفل وجوزة الطيب المبشورة.
9- رصي قوارب الكوسة في صينية بايركس ، وضيفي فوقيها عصير الطماطم المخفف بالمية ومدوب فيه مكعب مرقة دجاج.
10- صبي البشاميل على قوارب الكوسة ، وبعدين رشي فوق الوش الجبنة الموتزاريلا.
11- دخليها الفرن على درجة حرارة 200 درجة مئوية لمدة 1/3 ساعة ، وبعدين شغلي الشواية وحمريها من فوق.
12- قوارب الكوسة تقدري تنوعي فيها وتحشيها بحشوات كتير جدا بدل اللحمة المفرومة ، زي المشروم, الفراخ, خضار مشكل, ارز مع خضروات مشكلة, تقدري تختاري الحشوة اللي تفضليها.