وصفات لبشرة وشعر مثاليين بمكون واحد موجود في كل بيت

بقلمريهام محمود فيشعر visibility1175

حتى لو انتي مش بتحبي العسل, لكن هو ببساطة طعام لابد منه في مطبخك, لان العسل يعتبر كنز فيتامينات ومعادن ومواد نشطة بيولوجيا, والعسل ليه مفعول مضاد للجراثيم, مرطب, مهديء, ومنشط, والنهاردة من خلال السطور الجايه هنقولك اسهل وافضل وصفات للبشرة والشعر من العسل.

وصفات للبشرة والشعر من العسل:

1- لتنقيه البشرة وعلاج البقع:

الوصفة الاولى: اخلطي كميات متساوية من العسل والقرفة, وحطي الخليط على المناطق اللي فيها بقع, سيبيه عشر دقايق وبعدين اغسليه بالمية, الخليط ده بيساعد على ظبط عمل الغدد الدهنية وليه تأثير مضاد للبكتيريا وبيحسن البشرة.

الوصفة التانية: اعصري نص ليمونة, وضيفي لها معلقة صغيرة عسل, ادهني الخليط على بشرة نضيفة وجافة, واغسليه بعد 20 دقيقة, كرري الوصفة دي 1 – 2 مرة في الاسبوع, والوصفة دي مش بس هتعالج البثور, لكن كمان هتساعد على تضييق المسام وتفتيح البشرة وترطيبها.

الوصفة التالتة: اطحني قرصين اسبرين, ضيفي لها 4 – 5 نقط من عصير الليمون وكمية صغيرة عسل, اخلطيهم كويس مع بعض, حطي الخليط عى الاماكن اللي فيها مشاكل وسيبيه طول الليل, والافضل انك تغطي الاماكن دي بضمادة طبية, تاني يوم الصبح هتلاقي الاحمرار قل, وهيعالج التهاب البثور بشكل اسرع.

وصفات للبشرة والشعر من العسل
وصفات للبشرة والشعر من العسل

النتيجة: بعد استخدام اقتعة العسل, الصور دي بتبين لنا النتيجة بعد اسبوعين بس من استخدامها, واكيد شايفين الفرق بين الاتنين وقد ايه البثور والبقع قلت كتير وشكل البشرة اتحسنت.

وصفات للبشرة والشعر من العسل

2- لتفتيح البشرة وازالة الهالات السودا:

هتحتاجي ½ معلقة صغيرة عسل, 1 معلقة صغيرة عصير ليمون, و 1 معلقة صغيرة زبادي, اخلطيهم مع بعض كويس, حطي الماسك على البشرة لمدة 20 دقيقة, كرري الوصفة 1 – 2 مرة في الاسبوع, الماسك ده هيساعد على تفتيح تصبغات البشرة والبقع الغامقة.

للهالات السودا: اخلطي 1 معلقة كبيرة عسل, 1 معلقة صغيرة عصير خيار, 1 معلقة صغيرة من عصير البطاطس, وادهني الخليط تحت العين, لمدة 20 دقيقة وبعدين اغسليه.

وصفات للبشرة والشعر من العسل

النتيجة: زي ما احنا شايفين في الصورة دي نتيجة الماسكات لتفتيح البشرة وعلاج الهالات السودا.

3- لبشرة متوهجة ونضرة:

الوصفة الاولى: اخلطي 2 معلقة كبيرة عسل, 2 معلقة كبيرة لبن, ادهني بشرتك بالخليط باستخدام قطعة قطن, واغسليه بعد 10 دقايق, الماسك ده مرطب رائع جدا للبشرة, وبيغذي البشرة بالفيتامينات الاساسية والاحماض الامينية, وبيزود من مرونة الجلد, وبيساعد على مكافحة التجاعيد.

الوصفة التانية: اخلطي 1 معلقة صغيرة عسل, 1 معلقة كبيرة جل الالوفيرا, حطي الخليط على البشرة واغسليه بعد 20 دقيقة, الوصفة دي هايلة جدا لتغذية وترطيب اي نوع من انواع البشرة, ولو انتي بشرتك دايما بتقشر وجافة اوي ممكن تضيفي على الوصفة كام نقطة من زيت الزيتون.

وصفات للبشرة والشعر من العسل

النتيجة: في الصورة البنت استخدمت الوصفات دي لمدة 5 اسابيع, وكانت دي النتيجة, بشرة فاتحة, تقليل الالتهاب, وترطيب الجلد.

4- لبشرة مثالية غير مقشرة:

اخلطي 1 معلقة كبيرة عسل, 1 معلقة كبيرة شوفان, واعملي تدليك لبشرتك بالخليط لمدة 10 دقايق وبعدين اغسليه, وممكن كمان تضيفي للمقشر ده شاي اخضر وتعجنيه بشوية مية صغيرين.

وصفات للبشرة والشعر من العسل

النتيجة: المقشر ده بيساعد على علاج مشكلة تقشر البشرة, ومناسب لاي نوع بشرة, وبيساعد على تجديد البشرة.

5- لشفايف ناعمة:

اخلطي عسل, سكر, وزيت زيتون, دلكي الشفايف بالخليط ده لمدة دقيقتين وممكن تستخدمي فرشة اسنان للتدليك, وبعدين اغسلي شفايفك, وحطي لها زبدة كاكاو, وممكن كمان تستخدمي خليط من السكر البني والعسل والفازلين.

وصفات للبشرة والشعر من العسل

النتيجة: بعد استخدام واحد للمقشر ده هيخلصك من مشكلة تقشر الشفايف وهينعمها ويرطبها جدا, وهيساعد على علاج تشققات الشفايف.

6- لشعر كثيف ولامع:

الوصفة الاولى: لتغذية وترطيب الشعر, اخلطي العسل مع صفار البيض بكميات متساوية, حطي الماسك على شعر نضيف ورطب, وسيبيه لمدة 30 دقيقة وبعدين اغسليه.

الوصفة التانية: لتغذية ولمعان الشعر, اخلطي زيت الزيتون مع ضعف الكمية عسل, حطي الخليط على الشعر, واغسليه بعد 30 دقيقة.

الوصفة التالتة: لتقوية ولمعان الشعر وزيادة نموه بشكل سريع, اهرسي موزتين, وضيفي لهم 1 معلقة كبيرة عسل, 2 معلقة كبيرة زيت جوز الهند, حطي الماسك على الشعر, سيبيه لمدة 30 دقيقة, وبعدين اغسليه بالشامبو, وممكن تضيفي للماسك ده كمان لبن رايب.

وصفات للبشرة والشعر من العسل

النتيجة: الصورة دي بتوضح لنا نتيجة استخدام ماسك العسل والموز وزيت جوز الهند واللبن الرايب, هتخلي الشعر ناعم وكثيف اكتر, وهتغذيه, وتديه لمعان.

7- لتفتيح الندبات:

اخلطي العسل, عصير الليمون, الزبادي, الشوفان, حطي الخليط على البشرة لمدة 5 – 10 دقايق, هتسرع شفاء البشرة, هتساعد على تفتيح البشرة, هتمنع تكون الكدمات, هتعالج الندبات, وممكن تدهني العسل بس على البشرة وتسيبيه طول الليل وتغسليه الصبح, الاستمرار على العلاج ده هيساعد على تفتيح الندبات, وتقدري تكرريه يوميا.

وصفات للبشرة والشعر من العسل

النتيجة: الفرق بين الصورتين بيوضح نتيجة الماسك على البشرة في علاج الندبات, وتفتيح الندبات الحمرا, وهينعم انسجة البشرة.

8- لازالة الشعر الصغير:

اخلطي ¼ كوباية عسل, 1 ½ كوباية سكر, ¼ كوباية عصير ليمون, و ½ كوباية مية, اغلي الخليط على نار هادية لحد ما السكر يدوب وتبدأ الفقاعات تظهر على السطح, سيبي الخليط على البشرة, افرديه على البشرة في الاماكن اللي عايزة تزيلي منها الشعر, وبعدين غطي المنطقة بقطعة قماش قطنية, واضغطي عليها, وبعدين شديها عكس اتجاه نمو الشعر.

وصفات للبشرة والشعر من العسل

النتيجة: الوصفة دي بتساعد على ازالة الشعر الصغير, بيمنع من نمو الشعر تحت الجلد, وبيغذي البشرة وينعمها وبمرور الوقت الشعر هيبقى ارق, والشعر مش هيطلع لمدة توصل ل 3 اسابيع.

روتين عناية بالبشرة بالبطاطس هيغير بشرتك بالكامل

روتين عناية بالبشرة بالبطاطس