12 عادة بسيطة هتساعدك تحافظي على البيت نضيف ومترتب على طول
كتير مننا بيشوف ان ترتيب البيت مهمة صعبة وكأنها مهمة مستحيلة انها تتعمل, ولكن لحسن الحظ انك تقدري بعادات بسيطة تحافظي على البيت نضيف ومترتب, وده اللي هنعرفه النهاردة من خلال السطور الجاية, هنتعرف على عادات هتحافظ على نضافة البيت.
عادات هتحافظ على نضافة البيت:
1- رتبي السرير اول ما تصحي من النوم على طول:
الناس المنتجين والنشيطين بيبدوأ يومهم بترتيب السرير, هي عادة بسيطة ومش هتاخد منك غير دقيقتين لترتيبه, وبرغم انها عادة بسيطة جدا الا انها مؤثرة وهتحول الاوضة نضيفة ومترتبة فورا, لما السرير يبقى مترتب, الاوضة كلها هيبان شكلها نضيف ومترتب.
2- حافظي على نضافة حوض المطبخ اول بأول:
على الرغم ان المهمة انتي ممكن تشوفيها شاقة ومتعبة, لكن الحفاظ على حوض المطبخ نضيف وغسل الاطباق اللي فيه اول بأول, عادة تانية بسيطة هتحافظ على البيت نضيف ومترتب, لان الحوض الفاضي والنضيف هيبقى شكله مريح للمطبخ كله, عشان كده دي تعتبر فكرة عملية جدا انك تعملي روتين لتنضيف وغسل الاطباق, بدل ما تسيبيهم حواليكي لحد ما يجيلك مزاج تغسليهم.
3- حافظي على نضافة ترابيزة الاكل:
زي بالظبط حوض المطبخ, كمان الحفاظ على ترتيب ونضافة ترابيزة الاكل, هيساعد انه يحافظ على شكل البيت كله مترتب, لان الترابيزة الزحمة اللي عليها حاجات كتير هتعمل شكل فوضوي للاوضة كلها, بدل ما انتي وقت كل وجبة تقعدي ترتبي الترابيزة, خلي دقيقتين يوميا لتنضيف وترتيب الترابيزة بعد كل وجبة.
4- اغسلي الهدوم اول بأول:
سواء كانت اسرتك كبيرة او صغيرة, فلازم تغسلي الهدوم مجرد ما تتملي سلة الغسيل, لان تجميع كمية كبيرة من الغسيل ممكن يسبب فوضى غير مرغوب فيها, عشان كده بننصحك لو عايزة تحافظي على البيت نضيف ومترتب, لازم تبصي على سلة الغسيل كلما امكن ومتسيبيش كمية هدوم كتير متجمعة فيها.
5- مش كل مكان محتاج تنضيف طول الوقت:
خدعة من اللي ممكن تخلي البيت شكله نضيف ومترتب, انك تنضفي الاماكن اللي بتستخدميها اكتر, يعني لو انتي مش في مزاج تنضيف للبيت كله, ركزي على المطبخ وغرفة المعيشة وغرفة الطعام, لو التلاتة دول نضاف ومترتبين, البيت كله هيبان شكله مترتب جدا.
6- اعملي بعض اعمال التنضيف قبل النوم:
لو سيبتي فوضى وراكي قبل ما تروحي تنامي, هتقومي الصبح هتلاقي عليكي مهام كتير, عشان كده حافظي على عادة ترتيب البيت قبل النوم, خصصي بس 10 دقايق قبل النوم لعمل شوية حاجات بسيطة, زي غسل الاطباق اللي في الحوض, حطي الهدوم اللي مش نضيفة في سلة الغسيل, او ببساطة ترتيب الستاير لشكل مترتب وانيق اكتر.
7- حطي كل ادوات النضافة في سلة او علبة واحدة:
لو عايزة عملية تنضيف البيت تتم بشكل اسرع, حطي على ادوات ومنتجات التنضيف مع بعض في سلة واحدة تقدري تشيليها بسهولة, ده هيخليكي تنضفي الغرف بشكل اسرع لانك مش هتضيعي وقت انك تقعدي تجمعي ادوات التنضيف من اماكن مختلفة او تقعدي تدوري عليها.
8- انتبهي لكاونتر الحمام:
معجون الاسنان, بقايا المكياج, بقايا منتجات الشعر, الحاجات دي ممكن تقع على كاونتر الحمام وتتراكم وتخلي شكله مش نضيف, عشان كده بننصحك جدا انك تنضفيها اول بأول, ده هيخليكي تتجنبي الفرك القوي او المتعب للمكان, والمكان هيبقى شكله نضيف على طول.
9- حطي الملابس النضيفة على طول في الدولاب:
بعد غسل الهدوم او تجفيفها او كويها, من الافضل انك ترتيبها على طول في مكانها في الدولاب, لان لو سيبتي الهدوم مرمية في اي مكان حتى لو نضيفة, هتخلي البيت شكله فوضوي ومش مترتب, ده غير ان جزيئات التراب في الجو ممكن تخليها تتوسخ تاني, عشان كده حافظي دايما على عادة ترتيب الهدوم النضيفة في الدولاب اول بأول.
10- نظمي حاجتك في سلات تنظيم:
استخدمي باسكت تنظيم لكل حاجة, للاحذية, للالعاب, لاي حاجات تانية, جمعي كل حاجة في باسكت واكتبي عليه ايه اللي جواه, ده هيخلي البيت مترتب على طول, خصوصا لو عندك اطفال, والسلات دي ليها اكتر من وظيفة, ممكن تبقى منظم للحاجات بتاعتك وفي نفس الوقت ديكور وتدي شكل جمالي لو اختارتي اشكال ماشية مع الاوضة.
11- رتبي الاوراق والمجلات:
اكوام الورق او المجلات هتخلق فوضى حواليكي وتخلي شكل البيت مكركب, عشان كده رتبي الاوراق اول بأول, اعملي اعادة تدوير للمجلات واستخدميها في اي حاجة تانية خصوصا لو مجلات قديمة وقرتيها كذا مره ومش محتاجاها تاني.
12- اعادة التدوير:
في كل مرة تيجي قدامك حاجة مش بتستخدميها, حطي في اعتبارك اذا ممكن تعملي لها اعادة تدوير, او التبرع بيها, او بيعها, اعادة التدوير ممكن يبقى فكرة رائعة وعملية جدا, زي اعادة تدوير الزجاجات البلاستيك, الورق المقوى, هتخلي البيت نضيف ومترتب وفي نفس الوقت مفيدة للبيئة.
حاولي تخلي العادات دي في روتينك اليومي ونفذيها, ومش لازم تعمليهم كلهم مرة واحدة عشان متضغطيش على نفسك, ممكن تختاري منهم كام عادة في البداية, وتزودي الباقي بعدين بالتدريج, لحد ما يبقوا كلهم من روتينك وعاداتك اليومية.
