ازاي تتخلصي من تجاعيد الشفايف بطرق طبيعية

بقلمريهام محمود فيبشرة visibility707

مع مرور الوقت, بتبدأ علامات الشيخوخة والخطوط الرفيعة تظهر على الوش, سواء الخطوط الرفيعة اللي حوالين الفم, او حوالين العين, لكن احنا النهاردة هنتكلم عن تجاعيد الشفايف اللي تعتبر من علامات الشيخوخة الملحوظة, وهنقولك طرق طبيعية هتساعدك على علاج تجاعيد الشفايف.

ايه هي اسباب تجاعيد الشفايف:

تجاعيد الشفايف بتظهر نتيجة انخفاض انتاج الكولاجين, بيخلي الشفايف نحيفة او رقيقة اكتر وبتظهر فيها تجاعيد, ولكن احيانا التجاعيد دي مش بتظهر بسبب الشيخوخة بس ممكن تحصل في سن مبكر بسبب الاجهاد او الجينات.

واكيد اي بنت بتبقى عايزة شفايفها تبان ممتلئة وشكلها حلو وناعم ومن غير اي تجاعيد, احنا بنقولك متقلقيش من المشكلة دي لان ممكن علاجها او على الاقل تخليها ملحوظة بشكل اقل, والنهاردة من خلال المقال بتاعنا هنقولك الطرق الطبيعية اللي ممكن تساعدك على التخلص من تجاعيد الشفايف وترجعها شكلها حلو.

علاج تجاعيد الشفايف
علاج تجاعيد الشفايف

علاج تجاعيد الشفايف بطرق طبيعية:

1- استخدام واقي الشمس:

اول حاجة لازم نعرفها ان الشفايف بتحتاج حماية من الشمس زيها زي اي جزء في الوش, لكن معظم البنات غالبا بينسوا العناية بالشفايف, وده بيأدي لتشقق وترهل الشفايف, ومش بس الشفايف ولكن كمان الجلد اللي حوالين الشفايف معرض للضرر من اشعة الشمس ومحتاج لعناية خاصة من اشعة الشمس, ضروري جدا تستخدمي واقي الشمس بعامل حماية مش اقل من 30, واتأكدي انك تجدديه كل ساعتين طول ما انتي بره البيت, وافضل حاجة للشفايف هي تطبيق مرطب شفايف او زبدة كاكاو بعامل حماية من الشمس, وكرري وضعه على الشفايف على مدار اليوم لمنع جفاف الشفايف, واتأكدي ان مرطب الشفايف بيحتوي على مكونات مرطبة زي زبدة الشيا او زبدة الكاكاو عشان تديكي افضل النتايج.

علاج تجاعيد الشفايف

2- قشري شفايفك:

تقشير الشفايف مهم جدا لازالة الجلد الميت, وتجديد جلد الشفايف, وتقليل تجاعيد الشفايف, لو عايزة تحافظي على شفايفك شكلها حلو وممتلئة, قشري شفايفك مرة واحدة على الاقل في الاسبوع.

والتقشير مش بس بيقلل تجاعيد الشفايف, ولكن كمان بيساعد على تفتيح الشفايف الغامقة وبيوحد لونها.

تقدري تحضري مقشر شفايف طبيعي بطريقة بسيطة جدا, اخلطي معلقة كبيرة من السكر البني او السكر العادي مع معلقة زيت زيتون ومعلقة صغيرة عسل, دلكي شفايفك بالخليط ده بحركات دائرية, هيساعد على تقشير شفايفك وترطيبها والتخلص من تجاعيد الشفايف وهتخليها ناعمة اكتر.

علاج تجاعيد الشفايف

3- تدليك الشفايف بزيت فيتامين E:

فيتامين E هو واحد من مضادات الاكسدة القوية, وبيساعد على زيادة انتاج الكولاجين في الجلد, كل اللي هتعمليه دلكي شفايفك بكمية بسيطة من زيت فيتامين E وعلى الجلد اللي حوالين الشفايف مرتين في اليوم, هيساعد على تنعيمها وعلاج التجاعيد والخطوط الرفيعة وهيخلي شكلها ممتليء.

4- اعملي تمارين الوجه للتخلص من تجاعيد الشفايف:

العضلات في الجسم بشكل عام وظيفتها انها بتحافظ على شكل الجسم, والتمارين بانتظام وبشكل صحيح بتحافظ عليها متناسقة, وزي باقي الجسم بالظبط, عضلات الوش بتحتاج تمارين عشان تفضل قوية ومتناسقة, وده هيساعد على منع تجاعيد الشفايف والخطوط الرفيعة, تقدري تختاري اي تمرين للشفايف وتكرريه 20 مرة يوميا على الاقل لافضل النتايج.

– الطريقة الاولى لتمارين الشفايف: اقفلي الفم وارفعي زاوية واحدة من الفم لحد ما تحولي الشفايف لنص ابتسامة, كرري الحركة للجنبين.

– الطريقة التانية: اعملي شكل “O” كبير بالفم مع اخفاء الاسنان بالشفايف.

التمارين دي بتساعد على شد الشفايف وشد العضلات, وبتزود من المرونة وبتقلل من تجاعيد الشفايف, مع الاستمرار على التمارين هتشوفي نتايج ملحوظة وان تجاعيد الشفايف قلت كتير.

5- اشربي مية كتير:

الجسم بيحتاج للمية, لانه لو جاف, هتكون النتيجة جلد جاف, وبقع خشنة, واكيد تجاعيد الشفايف, عشان كده لازم تتأكدي من شرب 8 كوبايات مية على الاقل يوميا عشان تدي جسمك المية اللي محتاجها, هتلاحظي تحسن في صحة الجسم بشكل عام, مع تحسن نسيج الجلد وتقليل تجاعيد الشفايف.

دي كانت بعض الطرق الطبيعية البسيطة اللي تقدري تنفذيها في روتينك اليومي للتقليل من تجاعيد الشفايف المزعجة, اتأكدي من ترطيب الجسم, واستخدام مرطب الشفايف, واستخدام واقي الشمس, هتوصلي لنتايج رائعة وفعالة جدا في وقت قصير.

تفتيح الشفايف الغامقة بوصفات طبيعية من مطبخك

تفتيح الشفايف
تفتيح الشفايف