7 طرق بسيطة هتخلي البيت شكله شيك وانيق اكتر
عملية تجديد البيت ممكن تكون مكلفة جدا, سواء دهان الحيطان, او تجديد الغرفة كلها, واكيد كلها هدفها اننا نعمل لوك جديد للبيت ونخلي شكله احلى, لكن بنلاقي ان ده محتاج ميزانية كبيرة وممكن تكون في بعض الاوقات صعب تتنفذ, عشان كده بدل ما تعملي حاجة تكون اكتر من ميزانيتك عشان تجددي البيت, ممكن تجربي تعملي شوية تغييرات بسيطة هتحول شكل البيت وتجدده, والنهاردة من خلال المقال بتاعنا هنشارك معاكم افكار لتجديد البيت بحيل بسيطة ومش مكلفة ومن غير مساعدة مصمم ديكور.
افكار لتجديد البيت:
1- استخدمي اضاءة مختلفة بقدر الامكان:
واحدة من اسهل الحيل اللي ممكن تظهر شكل البيت انيق جدا هو اضافة اضاءة مختلفة على قد ما تقدري, ممكن تستخدمي مصابيح ارضية, ومصابيح بتصاميم حديثة تعمل جو دافي في البيت, واضاءة خافتة, التصاميم المختلفة من الاضاءة هتضيف اناقة للبيت, وبننصحك كمان انك تحطي الاضاءات في ارتفاعات مختلفة, واستخدام لمبات باحجام مختلفة, هيعمل تأثير دراماتيكي وملفت جذاب جدا للجو العام في البيت.
لو لمبات السقف مش متاح انك تغيريها, ممكن تستخدمي المصابيح اللي بتتحط على الترابيزة “الاباجورة”, بتكون حلوة جدا ومش مكلفة ونازل منها اشكال كتير مختلفة تقدري تختاري منها.
2- حطي مرايات:
مصممين الديكور الداخلي بينصحوا انك لو عايزة تعملي تغيير كامل في ديكور البيت, ببساطة امزجي ما بين الاضاءة ونسقي معاها مرايات.
المرايا المتثبتة في المكان الصح وتكملها الاضاءة المثالية, ممكن انه يدي مساحة اكبر للمكان وهيبان اوسع بكتير وشكله انيق, ولو انتي بتفضلي البساطة اكتر ممكن تعملي مرايا واحدة كبيرة مزخرفة هتديكي شكل انيق.
3- الاثاث الاقل افضل:
وجود كل انواع الاثاث في البيت ممكن يخلق فوضى ويخلي الشكل مش مريح, بخدعة بسيطة جدا ممكن تخلي البيت شكله انيق اكتر واشيك هو انك تستخدمي اقل عدد ممكن من قطع الاثاث, والتصميم الداخلي اللي بيعتمد على قطع اثاث قليلة تريندي جدا وبيخلي البيت شكله اشيك.
اعتمدي على قطع اثاث بسيطة ومش ضخمة, والالوان الفاتحة بننصح بيها جدا كمان عشان تخلي شكل البيت شيك.
4- ضيفي بعض الاكسسوارات الانيقة:
متبالغيش عشان تضيفي اناقة للبيت, اختاري بس اضافة بعض الملحقات الرئيسية في كل غرفة, زي مثلا تركبي ستاير قريبة من السقف, او ستاير طويلة الي ممكن تخلق وسع للغرفة وتخليها تبان اكبر, او تضيفي بعض المخدات المزخرفة على الكنبة او السرير.
5- حطي دايما ورد وزرع طبيعي في المكان:
حيلة كمان بسيطة ومش مكلفة عشان تخلي البيت شكله اشيك, هو اضافة ورد طبيعي في المكان, ده هيعمل اضافة حلوة جدا للمكان.
ده غير ان النباتات الخضرا هتنضف الهوا في البيت, عشان كده بننصحك ان دايما يكون في ورد وزرع طبيعي في البيت هيدي لمسة اضافية من الاناقة والطبيعة في البيت.
6- ضيفي سجاد:
في قاعدة عامة معروفة في مجال التصميم الداخلي عشان تدي البيت شكل انيق اكتر, وهي اضافة السجاد, وبغض النظر عن نوع السجادة اللي هتختاريها فهي دايما بتبان انيقة حتى لو سعرها مش غالي, السجادة تعتبر جزء من الديكور الداخلي وهتكمل التصميم, وبتعمل جو مريح.
7- ضيفي قطعة فنية حجمها كبير:
صورة مطبوعة على قطعة قماش كبيرة “كانافا”,قطعة فنية شكلها حلو هي كل اللي انتي محتاجاه عشان تخلي بيتك انيق اكتر من غير ما تصرفي فلوس كتير.
وبننصحك بتجنب مناظر البحر الطبيعية كتير, او المناظر اللي فيها جبال, دوري دايما على اللوحات او الصور الفوتوغرافية المختلفة والمميزة, ده هيخلي بيتك كمان شكله مميز وفريد.
