7 علامات تقولك انك عايشة حياة زوجية مش سعيدة

بقلمريهام محمود فيعلاقات visibility296

العلاقة الزوجية اجمل علاقة بين اي اتنين اللي بتقوم في اساسها على  الثقة والاحترام المتبادل, لو لقيتي يوم انك مش حاسه بالسعادة مع شريكك, فده معناه ان العلاقة الزوجية ماشية في طريق مش صح, لكن احنا في اغلب الاوقات بنبقى عايشين حالة انكار ومش بنعترف بده لاننا بنكون مش متقبلين فكرة ان الجواز يفشل او ينتهي باي شكل, والنهاردة من خلال موضوعنا هنقولك علامات لحياة زوجية مش سعيدة عشان تبقى واضحة قدامك لو مريتي بيها كلها او بعض منها.

علامات لحياة زوجية مش سعيدة:

1- دايما بتنتقدوا بعض:

طبيعي ان يحصل خلافات بين اي زوجين من وقت للتاني, ولكن الموضوع يبقى ان كل طرف بينتقد التاني على كل حاجة, دي تعتبر علامة على حياة زوجية مش سعيدة, او لو كل طرف لقى نفسه بيستخدم كلمات نقد للطرف التاني مكنش متعود انه يستخدمها في الخلافات, في الحالة دي بتكون تعبير عن كبت وتراكمات من شريكك بمرور الوقت.

علامات لحياة زوجية مش سعيدة
علامات لحياة زوجية مش سعيدة

2- بطلتوا تتكلموا:

اي علاقة ناجحة محتاجة تواصل مستمر, وبمجرد ما تبطلوا تتكلمو مع بعض, دي تعتبر علامة على زواج غير صحي, ضروري جدا ان الازواج يشاركوا مشاكلهم وكل واحد يتكلم مع التاني عن يومه, وتكونوا قادرين على مشاركة اي حاجة في يومكم, ولو انتي بتفضلي انك تتكلمي مع صديقة بدل من زوجك ده مؤشر لعدم الثقة في شريكك.

علامات لحياة زوجية مش سعيدة

3- مش عارفة دورك في العلاقة:

في بعض الاحيان بيحصل مسافة كبيرة بين الشريكين بتخليهم ينسوا دور كل واحد فيهم في العلاقة الزوجية, فلو انتي حسيتي بعدم الامان او عدم يقين بمجرد التفكير في مكان العلاقة الزوجية دي, دي ممكن تعتبر علامة تحذير على ان الزواج مش سعيد, ولو دايما حاسه بعدم الامان هتزرعي الشك في عقلك ناحية شريكك, وبمجرد ما تبدأي الشك في شريكك هتاخدي العلاقة لطريق مظلم, لان الشك وانعدام الامان اكتر حاجتين ممكن يستهلكوا العلاقة الزوجية, فلو انتي حاسه بالمشاعر دي, دي علامة ان الجواز ماشي في اتجاه مش صح.

علامات لحياة زوجية مش سعيدة

4- مش بتحبوا تقضوا وقت سوا:

لو بتفضلي تقضي وقتك في اي حاجة تانية غير انك تقعدي معاه, دي علامة واضحة جدا ان الجواز ده مش سعيد, لما كل طرف يهرب ويشغل وقته في اي حاجة تانية غير انه يقضي الوقت مع شريكه, دي علامة ان الطرفين مش فاهمين بعض, وان تقضية الوقت مع الطرف التاني مبقتش اولوية.

علامات لحياة زوجية مش سعيدة

5- بتتوقفوا عن الاهتمام ببعض:

الازواج اللي دايما في خلافات وصراع مستمر, حتى في الاوقات اللي مش بيتخانقوا فيها بيبطلوا يهتموا ببعض ويشوفوا بعض, وكل طرف بيبطل يشوف التاني كمصدر راحة او دعم او شراكة, وبيتوقفوا انهم يعاملوا بعض كاصحاب مش بس زوجين, بيبطلوا يخططوا لحاجات ممتعة يعملوها مع بعض, مش بيبقى في ثقة بينهم, بيتوقفوا عن مشاركة مشاعرهم, او حتى انهم يتكلموا عن يومهم مع بعض.

6- الرومانسية بتختفي:

لما بتتجوزي شخص ما, فانتي بتبقي ملتزمة جسديا وروحيا بالشحص ده, والعلاقة الحميمية جزء مهم جدا في الجواز, ولما شخصين بياخدوا قرار الجواز ده تعهد منهم بالارتباط الجسدي مدى الحياة, فلو لاحظتي انك مبقتيش منجذبة جسديا للطرف التاني ومبقتيش حابه العلاقة الحميمية, دي تعتبر علامة واضحة ان العلاقة الزوجية فيها مشكلة, لان العلاقة الجنسية هي علامة ترابط وثقة قوية بين الطرفين ونقصها مؤشر انه مبقاش في انجذاب بينكم.

7- خيالك بيكون خالي من شريكك:

لما المسافة بتكبر بينك وبين الشريك وبيبقى في عدم ثقة, بتبدأي انك تتخيلي حياتك من غير شريكك, كل الاجازات اللي ممكن تقضيها من غيره, او المتعة ومدى سعادتك اللي هتوصلي لها وهو مش معاكي, وده هيخليكي برود المشاعر يزيد بينك وبينه, فلو شريكك مش جزء من خيالك وتفكيرك, فدي علامة مؤكدة انك في علاقة زوجية مش سعيدة.

ممكن يكون صعب ان الطرفين يعترفوا انهم بطلوا يحبوا بعض وان العلاقة الزوجية بدأت تبقى مش سعيدة, ولكن اتخاذ القرارات المناسبة بدري هتنقذ الطرفين من الم اكبر ممكن يحصل في المستقبل, والعلامات دي مش معناها ان الوقت اتأخر لمحاولة اصلاح الجواز مادام الشريكين مستعدين فعلا انهم يعملوا ده ويصلحوا العلاقة سوا, لانه في بعض الاحيان الاشخاص بيكونوا محتاجين ببساطة لفترة راحة بس, وخصوصا ان الحياة اصلا ممكن تكون مرهقة جسديا وعقليا للطرفين.

25 حاجة في العلاقة الزوجية اهم من العلاقة الحميمية

حاجات اهم من العلاقة الحميمية