طريقة تنسيق لون الحجاب مع لبسك بشكل صح

بقلمريهام محمود فيموضة وأزياء visibility1823

في بنات كتير لسه بتحتار في اختيار لون الحجاب المناسب مع اللبس, وكل مرة بيشتروا لبس جديد بيدخلوا في دوامة اختيار لون الطرحة, عشان كده النهاردة بنات حوا هتساعدك في المهمة دي وهنقولك طريقة تنسيق لون الحجاب مع لبسك بشكل صح.

طريقة تنسيق لون الحجاب مع لبسك:

طرحة بألوان محايدة:

الالوان المحايدة اللي زي الابيض والاسود والرمادي والبيج, تعتبر من الالوان اللي سهل تنسيقها مع اي الوان تانية في لبسك, فلو انتي لابسة طقم بألوان زاهية او فاقعة او داخل فيها كذا لون, هيكون افضل اختيار ليكي هي طرحة بألوان محايدة.

طرحة بنفس لون اللبس ولكن بدرجة مختلفة:

لو انتي من النوع اللي مش بيحب يلبس الوان كتير مع بعض وبتحتاري في اختيار لون الطرحة, في الحالة دي تقدري تختاري لون طرحة بنفس اللون التوب او القطعة اللي فوق من لبسك ولكن بدرجة افتح او اغمق شوية من لون التوب, او تقدري تلبسي الطرحة بنفس لون القطعة اللي تحت من لبسك, يعني مثلا لو لابسة بنطلون ابيض وعليه توب مقلم فهنا الطرحة هتكون باللون الابيض, او لو لابسة سكيرت زرقا وتوب فوشيا اختاري طرحة باللون الازرق, او حجاب منقوش يجمع ما بين الدرجتين الازرق والفوشيا.

الطرحة المنقوشة:

لو لابسة لبس سادة ومحتارة في اختيار لون الطرحة بلون واحد, هيبقى اسهل اختيار ليكي هو الطرحة المنقوشة اللي داخل فيها كذا لون.

طرحة بلون واحد مع الملابس المنقوشة:

هنا بقى العكس لو انتي لابسة ملابس منقوشة او داخل فيها كذا لون, فاختيار الطرحة هنا مش هيكون صعب ابدا, لان كل اللي عليكي تعمليه انك تختاري طرحة بنفس اللون الاقل ظهور في الوان نقشة اللبس, وبكده انتي هتظهري الطقم بتاعك اكتر بشكل انيق.

عجلة الالوان:

لو انتي بقى بتحبي تلبسي الوان زاهية مع بعض ولكن مش بتعرفي تنسقيها, بننصحك انك ترجعي لعجلة الالوان اللي سبق نزلناها قبل كده واتكلمنا عليها بالتفصيل, هتقدري من خلالها تنسقي الالوان الزاهية مع بعض بشكل صح.

نصايح عامة لاختيار الطرحة:

1- ابعدي عن خامات الطرحة اللي فيها لمعة زي الساتان او الجوبير او الاورجانزا لو هتلبسيها على ملابس كاجوال صباحية, واعتمدي على القطن او الليكرا او الكتان.

2- لو هتلبسي حاجة للسهرة ابعدي تماما عن القطن, واختاري الطرحة بخامة الساتان او الشيفون او الجوبير, ولو الفستان بيلمع ومطرز تطريز كتير الافضل تكون الطرحة هادية وبسيطة.

3- لو لابسة ملابس واسعة, يبقى ضروري لفة الطرحة يكون فيها طبقات عشان تدي الراس حجم مناسب للبس, لان التوازن بينهم هيطلعك بلوك انيق وشكله حلو.

4- دايما خلي لون الطرحة عكس اللبس, يعني لو لابسة الوان غامقة خلي الطرحة بألوان زاهية, والعكس صحيح لو لابسة الوان فاتحة او زاهية يبقى اختاري طرحة بألوان غامقة عشان اللوك يبقى متوازن.

5- لو لابسة حاجة باللونين الابيض والاسود او التايجر, اختاري طرحة بلون زاهي زي الاحمر او الفوشيا او درجات الكشمير مع شنطة بنفس اللون.

6- لو بتلبسي باندانا تحت الطرحة اتأكدي انها تكون ماشية مع لون اللبس والطرحة ولون بشرتك.

7- اسهل طريقة لتنسيق لون الحجاب مع اللبس انك تختاريه لون القطعة الاساسية في لبسك.

8- طريقة تانية بسيطة لتنسيق الطرحة هي انك تختاريها بلون الاكسسوارات زي الشنطة او الحزام او الشوز, وهنا لون الطرحة هيكون مختلف تماما عن الوان اللبس نفسه.

تعالوا نشوف مع بعض بالصور افكار لتنسيق الطرحة مع اللبس:

دليل الحجاب: الستايلات المختلفة للفات الحجاب وازاي تلبسيها

دليل ستايلات الحجاب
دليل ستايلات الحجاب