ازاي تعالجي جفاف وتلف الشعر بوصفات طبيعية بسيطة

ريهام محمود

في

2888

كلنا بيمر علينا وقت شعرنا بيبقى جاف ومجهد, سواء الصبغة او عوامل الجو او استخدام مستحضرات كيميائية او الاهمال, بس ايا كان السبب انتي تقدري ترجعي شعرك صحي تاني بطرق طبيعية, وده اللي هنعرفه النهاردة مع بعض هنشارك مع كل بنات حوا مجموعة وصفات طبيعية لعلاج جفاف الشعر والتلف بمكونات موجودة في مطبخك.

وصفات طبيعية لعلاج جفاف الشعر:

1- ماسك الافوكادو:

المكونات:

ثمرة افوكادو مهروسة.

بيضة.

الطريقة:

اخلطي الافوكادو مع البيض, وحطي الخليط على شعر رطب, سيبيه لمدة 20 دقيقة, وبعدين اغسليه.

كرري الماسك ده مرة واحدة في الاسبوع لو شعرك تالف وجاف اوي, او مرة كل شهر لو عايزة تحافظي على صحة شعرك.

الافوكادو مفيدة جدا للشعر لانها غنية بالفيتامينات والاحماض الدهنية الاساسية اللي بتساعد على استعادة صحة شعرك.

2- مساج الزبدة:

انتي قريتي فعلا صح, الزبدة تعتبر علاج فعال جدا لعلاج جفاف الشعر, كل اللي هتعمليه خدي كمية من الزبدة حسب طول وكثافة شعرك, حطيها على الشعر كله من الجذور للاطراف ودلكيه كويس, غطيه بكيس بلاستيك وسيبيه لمدة ½ ساعة تقريبا, وبعدها اغسليه بالشامبو بالطريقة العادية.

3- زيت الزيتون كمرطب للشعر:

زيت الزيتون بيحتوي على فوايد صحية كتير, بما فيهم علاج الشعر الجاف وترطيبه بعمق.

سخني ½ كوباية من زيت الزيتون, ودلكي بيه الشعر كله من الجذور للاطراف, غطي الشعر بفوطة وسيبيه لمدة 45 دقيقة, وبعدها اغسليه بالشامبو.

لو عايزى تستخدمي علاج زيت الزيتون بانتظام, بننصحك بيه جدا, حطيه على الشعر من بالليل, واغسليه الصبح لترطيب عميق.

وبما ان الزيوت يشكل عام مفيدة جدا للشعر, فبننصحك انك تجربي انواع زيوت مختلفة او الزبدة مع زيت الزيتون, ومن الوصفات الهايلة جدا هي خليط زبدة الشيا وزيت الارجان وزيت جوز الهند, كلهم بيحسنوا نسيج الشعر بشكل ملحوظ جدا, وبيزودوا مستويات الرطوبة, وبيساعدوا على لمعان الشعر.

4- ماسك خل التفاح:

لاصلاح تلف الشعر بسرعة, ممكن تستخدمي خل التفاح, الحمض اللي موجود في الخل بيساعد على توازن الشعر, وتنعيمه.

اخلطي معلقة صغيرة من خل التفاح مع 2 معلقة كبيرة من زيت الزيتون مع 3 بياض بيض, حطي الخليط على الشعر كله وغطيه لمدة 30 دقيقة, وبعدها اغسليه بالشامبو بالطريقة العادية, وهتشوفي ازاي شعرك بيرجع صحي تاني من اول استخدام للماسك ده.

5- ماسك البيض:

الكمية الصح من البروتينات ممكن انها تساعد في اعادة بناء الشعر, اخلطي بيضة واحدة مع 2 معلقة كبيرة من الشامبو بتاعك اللي انتي بتستخدميه, حطي الخليط على الشعر كله وسيبيه لمدة 5 دقايق, وبعدها اغسليه, الوصفة دي تعتبر واحدة من طرق تغذية الشعر وبتعزز نمو الشعر وانتاج البروتين المسؤول عن قوة الشعر.

يعني كل اللي عليكي تعمليه عشان ترجعي شعرك صحي وتعالجي الجفاف والتلف, تقدري ببساطة تستفيدي من بعض المكونات اللي موجودة في مطبخك, وحطي في اعتبارك كمان ان النظام الغذائي الصحي الغني بالاوميجا 3 بيساهم بشكل كبير جدا في الحفاظ على صحة شعرك وبيمنعه من التلف, وحاولي متبقيش دايما لمه الشعر خلي في وقت تسيبيه على حريته عشان يتنفس.