طريقة عمل تينت الشفايف والخدود في البيت بمكونات طبيعية

بقلمريهام محمود فيمكياج visibility5118

من فترة انتشر منتج بيدي توريد طبيعي للشفايف والخدود وهو التينت, الميزة فيه انه بيدي لوك طبيعي وفي نفس الوقت بيثبت لفترة طويلة, والنهاردة من خلال موضوعنا هنقولك طريقة عمل تينت الشفايف والخدود بمكونات طبيعية من البيت.

طريقة عمل تينت الشفايف والخدود:

1- تينت الجلسرين والوان الطعام:

المكونات:

الوان طعام باللون الاحمر.

زبدة كاكاو.

جلسيرين.

طريقة التحضير:

كل المكونات قدريها بالعين مش كميات محددة حسب الكمية اللي انتي عايزة تعمليها.

1- هاتي بوله صغيرة حطي فيها كمية من الجلسيرين, ضيفي عليها كمية بسيطة من الوان الطعام, وتقدري تعملي تينت باي لون تفضليه, ممكن احمر, برتقاني, بينك, اللي شايفة انه ممكن يناسب لون بشرتك اكتر.

2- ضيفي كمية اللون لحد ما توصلي لدرجة اللون انتي عايزاها, كل ما زودتي اللون هيبقى اقوى واتقل.

3- قلبي المكونات مع بعض بعود قطن, لحد ما يبقى سلس ومافيش فيه اي تكتلات.

4- بمجرد ما تخلطي المكونات جربي اللون على ايدك, هيديكي نتيجة اولية عن اللون اللي انتي عملتيه, لو حسيتي انه خفيف اوي ممكن تزودي الوان الطعام, ولو حسيتي انه ملمسه سميك اوي او لزج, خففيه بكام نقطة مية, كده لحد الخطوة دي التينت يعتبر جاهز للاستخدام للخدود والشفايف.

5- لكن لو عايزة تضيفي له ترطيب اكتر لما تستخدميه للشفايف, ضيفي زبدة الكاكاو ده هيساعد على ترطيب وتغذية الشفايف, ولو حابه اللون يبقى قوي اوي ممكن تستخدمي زبدة كاكاو ملونة, ولو حاباه خفيف استخدمي زبدة كاكاو شفافة.

طريقة عمل تينت الشفايف والخدود

6- حطي الخليط مع زبدة الكاكاو في الميكروويف لمدة 30 ثانية, او على حمام مية سخنة لحد ما زبدة الكاكاو تسيح وقلبيهم مع بعض.

7- كده التينت يبقى جاهز للاستخدام بمجرد ما يبرد حطي منه على الشفايف, وعلى الخدود وادمجيه كويس بصوابعك, وممكن كمان تستخدمي فرشة او بيوتي بلندر للدمج, يعني استخدمي اي وسيلة تحسي انك مرتاحة معاها اكتر.

2- تينت الكركدية:

المكونات:

1 معلقة صغيرة كركدية بودر.

1 ½ معلقة كبيرة مية مقطرة “والمية المقطرة هتساعد ان التينت يقعد معاكي فريش فترة اطول وهتلاقوها متوفرة في الصيدلية”.

½ معلقة صغيرة خل تفاح.

الطريقة:

1- في طبق اخلطي بودرة الكركدية مع المية وقلبيهم مع بعض كويس, وضيفي الخل وقلبي, واختياري ممكن تضيفي ½ معلقة صغيرة فانيليا سايلة للريحة بس هتدي ريحة حلوة للتينت.

2- صفي الخليط بالمصفى عشان تتخلصي من اي بقايا او تكتلات.

3- صبيه في اي ازازة صغيرة عندك, ولو عند ازازة رول صغيرة تقدري تستخدميها هتتبقى اسهل عليكي لما تيجي تستخدمي التينت.

والتينت ده ممكن يقعد معاكي لحد 3 شهور.

الطريقة بالفيديو:

3- تينت البنجر:

المكونات:

½ كوباية مقطرة او مفلترة.

1 معلقة كبيرة بنجر بودر “لو مش متوفر عند العطار تقدري تعمليه في البيت قطعي البنجر شرايح رفيعة وجففيه في الفرن لحد ما ينشف وبعدين اطحنيه لحد ما يبقى بودرة”.

الطريقة:

1- في حلة صغيرة حطي المية وضيفي لها بودرة البنجر, قلبيهم مع بعض واستمري في التقليب على نار منخفضة لمدة دقيقتين لحد ما الخليط يتماسك ويبقى سميك ولونه اغمق.

2- صبي الخليط في برطمان صغير  او علبة صغيرة واحفظيه في التلاجة للاستخدام.

3- حطي منه على الشفايف, والخدود وادمجيه بسرعة على البشرة اول ما تحطيه, في البداية ممكن تلاقي حبيبات بسيطة من البنجر لكن هتختفي بمجرد دمجه.

4- تينت كريمي:

المكونات:

1 معلقة صغيرة زيت خروع.

1 معلقة صغيرة بنجر بودر.

1 معلقة صغيرة زبدة الشيا.

الطريقة:

1- في طبق صغير اخلطي كل المكونات مع بعض, وحطيهم في حمام مية سخنة, لحد ما زبدة الشيا تدوب خالص.

2- قلبي المكونات مع بعض وامزجيها كويس, وصبي الخليط في اي علبة فاضية عندك وسيبيه لحد ما يبرد.

3- وكده يبقى التينت جاهز, خزنيه في مكان ضلمة وبعيد عن الحرارة, لو خزنتيه بشكل صح هيقعد معاكي لحد 6 شهور.

4 طرق لعمل تينت الحواجب في البيت بمكونات طبيعية..وازاي ترسميه زي المحترفين

طرق لعمل تينت الحواجب