طريقة عمل عيش السرايا بالتوست
عيش السرايا من انواع الحلويات اللي جايه من المطبخ الشامي, وانتشرت في كل الدول العربية, وعيش السرايا بتتميز بطعمها اللذيذ ولكن هي مرتفعة جدا في السعرات الحرارية, ويقال ان اسمها جاي من انها زمان كانت صنف حلويات بيتعمل في السرايات للطبقة الغنية بس, عشان كده بتتسمى كمان بحلوى الاغنياء, والنهاردة من خلال موضوعنا هنتعرف على طريقة عمل عيش السرايا بالتوست.
طريقة عمل عيش السرايا:
مكونات الطبقة الاساسية:
½ كيلو توست, او حوالي 8 شرايح.
مكونات السكر المكرمل:
1 كوباية سكر.
2 معلقة كبيرة مية.
1 معلقة كبيرة زبدة.
مكونات الشربات:
3 كوبايات مية.
1 ½ كوباية سكر.
1 معلقة صغيرة عصير ليمون.
1 معلقة كبيرة ماء زهر.
1 معلقة كبيرة ماء ورد.
مكونات القشطة:
2 كوباية لبن.
1 كوب من كريمة الخفق.
1 معلقة كبيرة نشا.
1 معلقة صغيرة مستكة مطحونة.
الطريقة:
1- قطعي اطراف التوست اللي بتكون ناشفة واستخدمي بس الجزء الطري منه, رصي التوست في صينية مستطيلة, دخليه فرن سخنة, لحد ما يبقى محمص شوية ولونه دهبي فاتح.
2- لتحضير السكر المكرمل, في حلة ضيفي المية وعليهم السكر, وحطيه على نار هادية من غير ما تقلبيه, لما السكر يبدأ انه يدوب ويغمق شوية قلبيه عشان السكر كله يتخلط مع بعضه, استمري في التقليب لحد ما السكر يتحول للون الدهبي الغامق ويتكرمل, ارفعي الكراميل من على النار وضيفي له الزبدة وقلبيه كويس لحد ما الزبدة تدوب وتمتزج كويس مع باقي المكونات.
3- لتحضير الشربات, اخلطي السكر والمية في حلة على النار, وضيفي لهم عصير الليمون, وقلبيهم وسيبيهم على النار من 5 – 10 دقايق لحد ما الشربات يتقل, ارفعيه من على النار وضيفي له ماء الزهر وماء الورد.
4- اخلطي الشربات مع السكر المكرمل اللي حضرناه وقلبيهم مع بعض كويس.
5- صبي الخليط ده وهو سخن فوق التوست, وحركيه شوية عشان التوست يتشرب الخليط كويس.
6- لتحضير القشطة, اخلطي النشا في ربع كوباية لبن بارد ودوبيها فيه كويس, في حلة اخلطي باقي كمية من اللبن مع الكريمة وحطيهم على النار مع التقليب, قبل ما الخليط يغلي ارفعيه من على النار وضيفي له النشا اللي دوبتيه في اللبن, مع التقليب السريع عشان ميعملش كتل, وبعدها ضيفي المستكة وقلبي.
7- حطي القشطة فوق طبقة التوست والكراميل اللي حضرناها, سيبيه يبرد خالص, وبعدين دخليه التلاجة لحد ما طبقة القشطة تتجمد حوالي ساعتين تقريبا.
8- زينيها من فوق بالفستق, وتتقدم باردة.