4 طرق لعمل تينت الحواجب في البيت بمكونات طبيعية..وازاي ترسميه زي المحترفين
لو حواجبك خفيفة وحابه تتقليهم وتصبغيهم وفي نفس الوقت تعملي ده بتكلفة قليلة وتوفري في الميزانية, وكمان بحاجات مضمونة من البيت, النهاردة من خلال موضوعنا هنقولك 4 طرق لعمل تينت الحواجب او المعروف بتاتو الحواجب بمكونات طبيعية بسيطة.
طرق لعمل تينت الحواجب:
1- تينت جل الصبار والفحم:
المكونات:
1 معلقة صغيرة من جل الصبار.
1 معلقة صغيرة كاكاو بودر.
كبسولة فحم “من الصيدلية”.
الطريقة:
في طبق صغير اخلطي جل الصبار مع الكاكاو وقلبيهم مع بعض كويس, وبعدين ضيفي الفحم بالتدريج ابدأي الاول باضافة ربع الكبسولة, وبعدين زودي الكمية بالتدريج لحد ما توصلي لدرجة اللون اللي انتي عايزاها المناسبة للون حواجبك.
ممكن كمان تضيفي من 3 – 4 نقط من زيت فيتامين E, ده هيخلي التينت مش مجرد صبغة بس للحواجب لكن كمان هيبقى علاجي وهيساعد على تكثيف حواجبك.
بفرشة الحواحب ابدأي خدي من التينت وارسمي بيه الحواجب, وسيبيه 20 دقيقة وبعدين اغسليه بالمية.
وتقدري تحتفظي بالتينت ده في التلاجة لمدة من اسبوع لاسبوعين.
2- تينت بالايشادو والفازلين:
لو عندك ايشادو قديم مش بتستخدميه كسرية ونعمية خالص لحد ما يبقى بودر, وضيفي عليه الفازلين بالتدريج لحد ما توصلي لجل سميك, اخلطيهم مع بعض كويس, وده كل اللي هتعمليه عشان تعملي تينت للحواجب بطريقة سهلة وسريعة.
اتأكدي بس انك تستخدمي ايشادو بالوان غامقة, زي الاسود, البني, البرونزي, واختاري منهم درجة اللون المناسبة للون شعرك.
طريقة استخدامه زي الطريقة اللي فاتت حطيه على الحواجب وسيبيه من 10 – 20 دقيقة وبعدين اغسليه, والتينت ده ممكن يقعد معاكي شهور من غير ما يحصلة اي حاجة.
3- تينت القهوة والكاكاو:
المكونات:
2 معلقة كبيرة بن مطحون.
1 معلقة صغيرة كاكاو بودر.
2 معلقة كبيرة من زيت جوز الهند.
2 معلقة كبيرة عسل نحل.
الطريقة:
اخلطي المكونات كلها مع بعض كويس, وممكن تحتاجي انك تسيحي زيت جوز الهند شوية في الميكروويف او على حمام مية سخنة, وبعدين تخلطي معاه باقي المكونات, سيبي الخليط لمدة دقايق لحد ما المكونات تندمج كويس, وبعدها تقدري تستخدميه على الحواجب بنفس الطرق اللي فاتت.
تقدري تحتفظي بالتينت ده لمدة اسبوع واحد في التلاجة.
4- تينت الحنة وعصير الليمون:
اعملي عجينة من الحنة وعصير الليمون, اختاري الحنة باللون اللي انتي عايزاة اسود او بني او حتى احمر, خدي كمية بسيطة من الحنة على قد صبغ الحواجب ضيفي عليها عصير الليمون بالتدريج وقلبي لحد ما توصلي لعجينة سميكة, حطيها في التلاجة لمدة من 8 – 12 ساعة, وبعدين استخدميها.
الحنة هتحتاج تسيبيها على الحواجب مدة اطول من الطرق اللي فاتت, ابدأي الاول ب 20 دقيقة, وتقدري تسيبيها لحد ساعتين وبعدين تغسليها, وكل ما تسيبيها فترة اطول اللون هيبقى اغمق واتقل.
تحضير الحواجب لوضع التينت:
1- نضفي الحواجب والمنطقة اللي حواليها بالكحول:
اول حاجة هاتي كحول طبي من الصيدلية, وبقطنة امسحي حواجبك والمنطقة اللي حواليها بالكحول, وافركيهم كويس بالمحول.
2- سرحي حواجبك بالفرشة:
بفرشة الحواجب ابدأي سرحي حواجبك, مرريها من تحت لفوق كذا مره لكل حاجب, عشان تساويها والشعر كله يبقى في نفس الاتجاه والرسمة تطلع مظبوطة معاكي.
ممكن تستخدمي لتسريح الحواجب فرشة الحواجب, او فرشة ماسكارا قديمة عندك, بس اتأكدي انها نضيفة.
3- ارسمي حدود الحواجب بالفازلين:
عشان تمنعي ان الصبغة تلطخ الجلد اللي حوالين الحواجب, حطي على المنطقة اللي على حدود الحاجبين فازلين, ممكن تستخدمي فرشة مكياج صغيرة, او اعواد القطن, وحطي الفازلين من فوق وتحت الحاجب.
وممكن كمان بدل الفازلين تستخدمي زيت جوز الهند, او قلم كحل ابيض.
4- وضع التينت:
دلوقتي هتيجي خطوة وضع التينت, بفرشة مكياج صغيرة ومسطحة, خدي من التينت اللي انتي عملتيه, وابدأي ارسمي الحواجب ابدأي من الركن الداخلي للحواجب واتنقلي لبره, وارسمي جزء جزء صغير, وزودي من التينت كل ما يخلص من الفرشة, وحاولي انك تحافظي على الرسمة في حدود الحواجب حتى لو مستخدمة فازلين او زيت جوز هند حوالين الحواجب.
اتأكدي انك بتغطي كل شعراية من الحاجب بما فيهم الشعر الناعم اللي بيبقى على طول حواف او حدود الحواجب.
5- نضفي الصبغة الزيادة:
لو ايدك اتهزت وانتي بترسمي والصبغة لطخت حوالين الجلد حوالين الحواجب, هاتي عود قطن بليه بالمية وامسحي الجلد اللي حوالين حواجبك.
6- سيبي الصبغة 20 دقيقة:
بعد ما ترسمي الحاجبين سيبي الصبغة لمدة 20 دقيقة, وبالنسبة للحنة زي ما قولنا بتحتاج فترة اطول ممكن تمتد لساعتين.
ولو حسيتي ان الصبغة خفيفة او اللون طلع خفيف اوي معاكي, ممكن تصبغيه مرة كمان.
7- امسحي الصبغة من على الحواجب:
اخر خطوة بقطنة مبلولة بالمية امسحي الصبغة من على الحواجب, او استخدمي صوابعك واغسلي الحواجب بالمية الجارية لحد ما تزيلي كل الصبغة .
