شهر رمضان وفيروس كورونا: ازاي تقضي رمضان في الحظر وايه اللي ممكن تعمليه خلال الشهر

ريهام محمود
ريهام محمود
549

في الوقت اللي كل دول العالم تقريبا مقفولة بسبب فيروس كورونا للتقليل من انتشاره, المسلمين في كل العالم بيستعدوا لاستقبال شهر رمضان الكريم, والشهر ده كان بيبقى بالنسبة لنا كلنا هو التجمع العائلي على الفطار, والخروج والسهر والزحمة في الكافيهات والمطاعم, والمساجد مليانة بالمصلين, ولكن الاحتفال بشهر رمضان السنة دي مختلف واغلب الحاجات اللي كانت بتتعمل في رمضان مش هتتعمل السنة دي ومافيش تجمعات في اي مكان ولا حتى للصلاة, لاننا المفروض نقعد في البيت ونحافظ على التباعد الاجتماعي, ولكن في وسط الوباء اللي احنا بنعيشه دلوقتي, هنقولكم ازاي تقضوا رمضان في الحظر, وقايمة بالحاجات اللي ممكن تعملوها عشان تستفادوا من الشهر ده اقصى استفادة.

ازاي تقضوا رمضان في الحظر:

1- حددي اهداف واقعية:

قبل بداية اول يوم في رمضان حددي اهداف لنفسك تقدري تحققيها خلال الشهر, وده ممكن يشمل الصلاة في الوقت المحدد من غير تأخير لاننا قعدين في البيت ومافيش حاجة هتأخرك عن الصلاة, قراءة من صفحتين لخمس صفحات من القرآن يوميا عشان تقدري تختميه على اخر الشهر, التبرع بمبلغ معين حسب مقدرتك للمحتاجين كل اسبوع.

ازاي تقضوا رمضان في الحظر 1
ازاي تقضوا رمضان في الحظر 1

2- اتقني صلاتك:

بما انه في حظر وفي موظفين كتير مش بيروحوا اشغالهم, وفي وقت اكبر بنقضيه في البيت, يبقى مافيش داعي ابدا انك تستعجلي في صلاتك عشان بعدها مثلا وراكي التزامات او هترجعي لشغل زي الايام العادية, هيكون في وقت اكبر هيديكي فرصة انك تصلي وقت اكبر وبخشوع اكتر من غير استعجال لانه معاكي الوقت.

ازاي تقضوا رمضان في الحظر 2
ازاي تقضوا رمضان في الحظر 2

3- اعملي فطار افتراضي:

شهر رمضان دايما كان هو بيبقى شهر تجمع العيلة والاصحاب على الفطار, ولكن السنة دي بما ان في حظر وتباعد اجتماعي ومافيش تجمعات, ممكن تعملي فكرة جديدة ومختلفة وتنظموا فطار افتراضي كبديل للتواصل مع الاهل والاصحاب, ودلوقتي الانترنت بيقرب المسافات والابليكيشنز اللي ممكن تقدم لنا ده كتير جدا.

ازاي تقضوا رمضان في الحظر 3
ازاي تقضوا رمضان في الحظر 3

4- جربي وصفات جديدة:

بما انه في وقت فاضي كتير في البيت, ممكن تستغلي الوقت ده انك تجربي تعملي وصفات جديدة كل يوم خلال شهر رمضان, وتعملي اكلات كان نفسك تجربيها من زمان والوقت مكنش مساعدك.

ازاي تقضوا رمضان في الحظر 4
ازاي تقضوا رمضان في الحظر 4

5- اعملي هدية بسيطة لعمال الديلفري:

بما ان مافيش اكل في مطاعم وكلها مقفولة, فلو فكرتي يوم تطلبي الفطار من بره من اي مطعم ديلفري, ممكن تجربي تعملي كيس صغير او بوكس صغير فيه وجبة وتمر مع ازازة مية ومعاهم مثلا قطعة حلويات, يعني اللي تقدري انك تحطيه, وتديه لعامل الديلفري في الوقت ده, هيبقى عمل خير واخدتي ثواب افطار صائم, وفي نفس الوقت لفتة حلوة كشكر وتقدير ليه انه بيشتغل في التوقيت ده.

ازاي تقضوا رمضان في الحظر 5

6- اتبرعي:

اكيد كلنا بنبقى عايزين نعمل خير في الشهر ده اكتر من اي وقت تاني, حاولي انك خلال الشهر ده تضاعفي تبرعاتك سواء باللبس, فلوس, او اكل للجمعيات الخيرية, او دوري على بنوك ومؤسسات الطعام اللي في مدينتك اللي بيكون عندهم قايمة بالاشخاص اللي فعلا محتاجين مساعدات وبيجوا ياخدوا التبرع من البيت عشان تتجنبي الخروج.

ازاي تقضوا رمضان في الحظر 6

7- قللي من الوقت اللي بتقضيه على مواقع التواصل الاجتماعي:

اكيد عملية الحظر وقفل كل اماكن الخروج والترفيه, خلت ان مافيش وسائل ترفيه كتير في البيت او مافيش حاجات كتير ممكن تشغل وقتنا, فاكيد مش غريب اننا نلاقي ارتفاع في استخدام وسائل التواصل الاجتماعي عالميا, ولكن بننصحك بدل ما تقضي ساعات من وقتك على التويتر والفيسبوك والانستجرام, استفادي بالوقت ده في التفكير, قراءة القرآن, الصلاة.

ازاي تقضوا رمضان في الحظر 7

8- ركزي على العناية الذاتية:

الاهتمام بصحتك الجسدية والعقلية واجب ديني, عشان كده لازم انك تهتمي بنفسك كويس, والعناية الذاتية مهمة جدا مش بس لصحتنا الجسدية ولكن كمان لصحتنا العقلية.

واثناء فترة الحظر ضروري اننا نعتمد على عادات عناية ذاتية كويسة, وده مش بس عشان نبقى مبسوطين وصحتنا كويسة لكن كمان ده هيساعدنا اننا نحافظ على حماسنا وانتاجيتنا.

خلال شهر رمضان وبشكل خاص في الوقت ده اللي بنواجه فيه ضغوطات اكتر, مهم جدا انك تخصصي وقت لنفسك, وتتأكدي انك تشاركي في النشاطات اللي هتساعدك على الشعور بالاسترخاء, وخالية من الاجهاد بقدر الامكان, والتركيز داخل نفسك.

عشان كده لو انتي في وقت الحظر ده حاسه باكتئاب ومفتقدة اصحابك وعيلتك, ممكن تتفقوا على مكالمة سكاي بي, او مكالمات تليفونية بشكل منتظم, او زي ما قولنا في النقطة اللي قبل كده تعملوا فطار افتراضي.

حافظي على التمارين الرياضية بشكل منتظم لان ده هيحافظ على صحتك الجسدية والعقلية, ممكن تمارسي تمارين من خلال فيديوهات على الانترنت, او تعملي جلسات تأمل.

مهم جدا انك تخصصي وقت لنفسك وللانشطة اللي بتستمعي بيها, خصصي وقت اكبر للصلاة, خدي حمام مريح, استرخي في البلكونة او لو عندك جنينة, ممكن في يوم كنوع من التغيير وكسر الروتين اليومي تتمشي في مكان مفتوح ولكن حافظي على قاعدة التباعد الاجتماعي وابعدي عن اي اشخاص خارج اسرتك, عشان تضمني انك تحافظي على صحتك.

ازاي تقضوا رمضان في الحظر 8

مقالات متعلقه

حكاية وتاريخ فانوس رمضان

حكاية وتاريخ فانوس رمضان

قائمة مسلسلات رمضان  2024: الجزء 1

قائمة مسلسلات رمضان 2024: الجزء 1

قائمة مسلسلات رمضان 2023

قائمة مسلسلات رمضان 2023