ليه المفروض تتجنبي انك تحطي كوباية مية جنب السرير وانتي نايمة

بقلمريهام محمود فيصحة visibility916

معظم الدكاترة والمتخصصين بينصحوا بشرب ما لا يقل عن 8 كوبايات مية يوميا عشان نحافظ على رطوبة جسمنا, ولكن كتير من الاشخاص بيبذلوا مجهود وبيحاولوا على قد ما يقدروا انهم يحافظوا على شرب كمية المية المطلوبة بطرق مختلفة, ومن ضمن الطرق دي هي عادة وضع كوباية المية او ازازة مية جنب السرير للتذكرة بشرب المية كل فترة, اول الشرب منها الصبح اول ما نصحى, ولكن مع ذلك عادة وضع كوباية المية جنب السرير مش مفيدة زي ما انتي متخيلة, والنهاردة من خلال موضوعنا هنقولك اضرار وضع المية جنب السرير.

اضرار وضع المية جنب السرير:

1- ممكن تتعرض للتلوث:

وضع كوباية المية مكشوفة جنبك ده ممكن يخليها معرضة لاي حاجة تقع فيها, زي الذباب او الناموس او اي حشرات تانية, ممكن كمان يوصل للمية تراب من الجو, وانتي لما تيجي تشربي منها مش هتلاحظي ده وانتي لسه صاحية من النوم الصبح او لو قلقتي وشربتي منها في نص الليل.

اضرار وضع المية جنب السرير
اضرار وضع المية جنب السرير

2- ممكن طعمها يتغير:

لو مليتي ازازة المية من الحنفية, فاحتمال كبير ان المية هتكون بتحتوي على كلور التطهير اللي عادة بيبقى موجود في المية, والكلور هيبدأ في التبخر خلال ساعات الليل, وده هيغير طعم المية.

اضرار وضع المية جنب السرير

3- المية هتتحول لارض خصبة لتكاثر الجراثيم:

لما تشربي من كوباية المية ملايين الجراثيم ممكن تتنقل من فمك للازازة او الكوباية ومنها للمية, فلو انتي شربتي منها قبل ما تنامي وسيبتيها طول الليل, الجراثيم هتتنقل للمية وتتكاثر لحد الصبح.

اضرار وضع المية جنب السرير

4- خطر حريق محتمل:

كتير مننا ممكن ينام ويسيب التليفون بيتشحن جنب السرير, فلو حصل وكوباية المية وقعت من غير قصد, ممكن ده يسبب خطر حريق لما المية تلامس الكهربا.

5- المية هتبقى اكتر حمضية:

لما تسيبي المية في كوباية مكشوفة, ممكن انها تمتص كمية صغيرة من ثاني اكسيد الكربون اللي موجود في الجو, وده ممكن يغير درجة حموضة المية, ونتيجة لدة المية ممكن تبقى اكتر حمضية, وده ان كان مش هيضر صحتك ولكن هيغير من طعم المية.

6- كوباية المية جنب السرير ممكن تسبب مشاكل في النوم:

لو دايما جنب سريرك كوباية مية, وانتي اصلا من الاشخاص اللي بيناموا بصعوبة او مش بيدخلوا في نوم عميق على طول, ممكن ده يخليكي كل شوية تشربي اثناء فترة الليل, ويزود رغبتك لدخول الحمام بشكل اكبر, وانك تقومي كذا مرة خلال فترة الليل, وده هيبوظ دورة نومك, وهيخليكي متناميش كويس, وهتصحي الصبح حاسه بتعب وارهاق.

تحدي شرب المية لمدة 30 يوم! ولاحظي التغييرات على صحتك وبشرتك

تحدي شرب المية