5 علامات بيقولهم الفم عن صحتك متتجاهليهاش ابدا

في كتير من الاوقات المشاكل الصحية مش بتظهر بس في شكل مثلا بقع موضعية, ولكن المشاكل والاعراض ممكن تظهر في كل انحاء الجسم, من ناحية ده ممكن يكون مزعج الى حد ما, ولكن من ناحية تانية ده هيسهل عليكي تلاحظي الاعراض, وده هيخليكي تكتشفي المشاكل في الوقت المناسب والحصول على العلاج المناسب ليها, ونفس الوضع بينطبق على الفم, الفم هو واحد من مناطق الجسم اللي غالبا بتتحمل عبء كبير من اعراض الاضطرابات اللي ممكن تحصل في الجسم, وده معناه ان الانتباه لصحة الفم ممكن يضمن لك صحة جسمك, والنهاردة من خلال موضوعنا هنتعرف على مشاكل الصحة من الفم من خلال مجموعة من العلامات اللي ممكن تنبهنا ان في مشاكل في اجزاء تانية من الجسم.

مشاكل الصحة من الفم:

1- الاسنان:

الاسنان والابتسامة غالبا هي اول حاجة بيلاحظها الناس, وهي كمان طريقة للاكل والتحدث بسهولة, عشان كده لو اسنانك بتعاني من اي مشاكل ده هيبقى محتاج منك اهتمام اكتر, خصوصا لو الالم او المشاكل فيها من الحاجات اللي هنعرفها دلوقتي مع بعض.

الاسنان المسطحة:

لو ظهر شكل الاسنان انها مسطحة وبتتآكل بشكل ما, ممكن تكوني في الحالة دي بتعاني من مشكلة طحن الاسنان, خصوصا لو في الم في الفك وصداع.

ومهم جدا انك تروحي لدكتور الاسنان لو بتعاني من الاعراض دي, لان ده ممكن يأدي لتلف العضم والعضلات مع مرور الوقت, وزيادة الاجهاد وانخفاض التفكير الايجابي هام اكتر الاعراض الشائعة لمشكلة طحن الاسنان.

تآكل الاسنان:

كتير من الاشخاص ممكن يلاحظوا تآكل اسنانهم, ولكن المشكلة دي مش سببها بس طحن الاسنان, لكن تآكل او تكسر الاسنان ممكن تكون علامة على مرض ارتجاع المريء, والمعروف كمان باسم الارتجاع المعدي المريئي.

ومشكلة ارتجاع المريء بتحصل لما بيتم طرد احماض المعدة لاعلى الفم, وبيبدأ ساعتها السائل الحمضي في تدمير مينا الاسنان, وممكن التآكل ميكونش واضح اوي ولكن الاسنان الناعمة بشكل مش طبيعي ممكن كتون علامة على ارتجاع المريء.

الاسنان الحساسة:

كتير من الاشخاص بيعانوا من مشكلة حساسية الاسنان اللي ممكن تبقى اسوأ مع اكل الحاجات السخنة او الباردة, وفي بعض الحالات بتحصل مع اكل السكر, وده ممكن يكون علامة عن عدوى, تجاويف, كسور, مشاكل جذور الاسنان, ومشاكل اكتر كمان.

2- النفس:

كتير من الاشخاص ممكن يعانوا من مشكلة ريحة الفم الكريهة وبتسبب لهم حرج كبير في التعامل مع اللي حواليهم, وبيحاولوا انهم يبذلوا مجهود كبير عشان يغطوا على الريحة دي باللبان, النعناع, غسول الفم, وبينضفوا اسنانهم باستمرار وتجنب الاكلات اللي ممكن تسبب ريحة مش حلوة, ولكن لو انتي بتعملي ده كله ومع ذلك بتعاني من ريحة الفم الكريهة هنا يبقى في مشكلة تانية.

ريحة الفم الكريهة ممكن تكون علامة على مشاكل في الجهاز الهضمي, لان زيادة نمو البكتيريا في المعدة ممكن يأدي لريحة الفم الكريهة, كمان مشاكل الكبد والكلى ممكن تأدي للمشكلة دي, كمان مشاكل الجيوب الانفية وامراض الجهاز التنفسي, فلو انتي بتشكي في اي حاجة من المشاكل دي لازم تروحي للدكتور.

كمان مرض السكري غير المعالج من الاسباب الشائعة لريحة النفس الكريهة, لان غالبا مرضى السكر بيستخدموا الكيتونات اللي موجودة في الدهون عشان يحصلوا على الطاقة لان جسمهم مش بيكون فيه الانسلوين اللي محتاجينه لتحويل الجلوكوز لطاقة, وده بيسبب ريحة الفم الكريهة.

3- القرحة, البقع, الالتهابات, وغيرها من الاعراض:

الفم منطقة حساسة جدا, وممكن يتكون فيه نتؤات وبقع مختلفة, وممكن كتير منها ميبقاش ضار برغم شكلها السيء, ولكن بعضها ممكن يكون علامة على حاجة اخطر, حتى البقع الغير ضارة ممكن تبقى علامة على مشكلة صحية اساسية صعبة اكتر, ودلوقتي هنقولك بعض العلامات او الاعراض اللي المفروض تنتبهي لها.

القرحة:

التقرحات او القرحة اللي بتظهر في الفم ممكن تظهر بسبب مشاكل هرمونية او اجهاد او حتى نقص فيتامين معين, ممكن نقص فيتامين B12, الحديد, حمض الفوليك, في تكون تقرحات الفم, وممكن كمان القرح دي تكون بسبب الحساسية, او حتى ممكن تظهر في وقت الدورة الشهرية.

ولكن مع ذلك بعض الدراسات ربطت التقرحات دي بعدم تحمل الجلوتين, لانها ممكن تكون ناتجة عن نقص الزنك اللي بيكون شائع جدا مع الاشخاص اللي بيعانوا من هضم منتجات الجلوتين.

قروح البرد:

قروح البرد هي بتبقى نوع من انواع الهربس, فيروس الهربس البسيط, وعادة القروح دي بتبقى مليانة بالسوايل, وبتخف لوحدها خلال 3 اسابيع.

يمكن كتير من الناس بيخافوا من فكرة الهربس, ولكن معظم انواع فيروس الهربس بتكون مش مضرة اوي, عشان كده بنقولك متقلقيش نفسك اوي منها, وقروح البرد بتيجي كمان اوقات الاصابة بالانفلونزا, او بسبب عدم تناول اكل صحي.

الآفات:

الآفات بتبقى اكتر خطورة لو في الجزء الخلفي من الفم, لانها ممكن تكون واحدة من اعراض سرطان الفم,, وده نوع سرطان نادر جدا, وفي نفس الوقت ممكن تكون الآفات الموجودة تحت لسانك او على اللوزتين علامة على الاصابة بفيروس الورم الحليمي البشري, فكل الاحوال لو لاحظتي اي آفات في الفم ايا كان نوعها, لازم تروحي للدكتور فورا.

الفطريات:

غالبا فطريات الفم بتكون علامة على القلاع الفموي, وده ممكن يحصل لاكتر من سبب, عشان كده افضل حاجة انك تروحي تستشيري دكتور في اقرب وقت ممكن.

البقع:

البقع الرمادي على الخد من جوه الفم او اللسان معروفة عادة باسم الطلاوة المشعرة, ودي بتحصل عادة بسبب ضعف المناعة, وفي الحالة دي لو لاحظتي اي بقع بننصحك تستشيري دكتور في اقرب وقت ممكن.

النتؤات:

النتؤات او الثآليل زي البقع بالظبط بتظهر نتيجة ضعف جهاز المناعة, فلو لاحظتي وجود اي ثآليل داخل الفم استشيري الدكتور في اقرب وقت ممكن.

4- اللثة:

اللثة هي النسيج اللي بيمسك الاسنان ببعض, وممكن تبقى مؤشر كبير جدا للصحة العامة, لو لونها اتغير, او بقت حساسة, والحاجات دي سهل جدا انك تلاحظيها لما تحصل, وهنقولك على بعض المشاكل اللي ممكن تظهر على حسب حالة اللثة عندك.

فقر الدم او الانيميا:

لو لثتك لونها شاحب, ده ممكن يكون علامة على الانيميا, ودي حالة الجسم مش بييقدر فيها انه ينتج كمية كافية من كرات الدم الحمرا للحفاظ على جسمك في حالة صحية, وشوحب اللثة ممكن يكون بسبب عدم كفاية تدفق الدم.

مشاكل القلب:

بكتيريا الفم في اللثة ممكن انها تسبب التهاب, واي بكتيريا بتعيش في الفم مكن انها تتنقل بسهولة لتحت لباقي الجسم ومجرى الدم, يعني بشكل اساسي اي التهاب في اللثة ممكن يأثر على اجزاء تانية في جسمك.

بعض انواع البكتيريا ممكن تأثر على الاوعية الدموية, واللي هتأدي لامراض القلب على المدى الطويل, عشان كده الحفاظ على صحة اللثة مهم جدا لصحة الجسم كله.

مرض السكر:

مرض السكر عادة بيتسبب في مشاكل في الجهاز المناعي, وده مكن يسبب لزيادة الاصابة بالعدوى, بالاضافة ان ارتفاع مستوى السكر في الدم وفي الجسم  ممكن يأدي لزيادة احتمال الاصابة بامراض اللثة, عشان كده لو بتعاني من مشاكل اللثة, ضروري انك تتأكدي من مستوى السكر في الجسم.

المشاكل الهرمونية:

اللثة مليانة بمستقبلات الهرمونات, وبشكل خاص موجودة في نسيج اللثة, وده السبب في ان كتير من النساء الحوامل ممكن يعانوا من نزيف اللثة, بالظبط نفس الحال مع النساء اللي بيعانوا من انقطاع الدورة الشهرية, فلو لثتك بتوجعك او حساسة او بيحصل فيها نزيف بسهولة, ممكن يكون عندك مشاكل هرمونية انتي مش عرفاها, زي اختلال توازن الغدة الدرقية او متلازمة المبيض متعدد التكيسات.

التهاب اللثة:

التهاب اللثة دي علامة واضحة على امراض اللثة نفسها, وفي كتير من الاشخاص مش بيهتموا بالمشكلة دي لما بتحصل, ولكن هي تعتبر واحدة من اكبر اسباب فقدان الاسنان عند البالغين, وممكن انها تفتح الباب لعدوى اكبر, عشان كده لازم تنتبهي وتعتبريها علامة كبيرة وواضحة لمشاكل صحية.

شوفي من هنا 10 وصفات طبيعية سهلة لعلاج مشكلة تراجع اللثة.

5- اللسان:

اللسان يعتبر من اقوى العضلات في الجسم, ولكن مع ذلك سطحه حساس الى حد ما, وده بيخليكي تلاحظي عليه اي اعراض ممكن تنبهك لمشكلة صحية, وهنقولك بعض الاعراض اللي ممكن تحصل.

اللسان المنتفخ او الاحمر:

لو لاحظتي ن اللسان منتفخ وبيلمع وحجمه اكبر من الطبيعي, دي ممكن تكون علامة على نقص بعض العناصر الغذائية في الجسم, والاحمرار المنتشر في كل اجزاء الفم ممكن يكون علامة على نقص فيتامين B6 او لنقص الحديد.

اللسان الشاحب:

لو اللسان شاحب بالظبط زي اللثة, ده ممكن يكون علامة على الانيميا, نقص خلايا الدم الحمرا ممكن انها تأدي لعدم ضخ ده كفاية في منطقة الفم, والتغيير المفاجيء في لون لسانك مؤشر واضح انك لازمي تستشيري دكتور.

الفم الجاف:

جفاف الفم او اللسان الجاف مشكلة كبيرة بيعاني منها كتير من الاشخاص في جميع انحاء العالم, فلو حسيتي بالجفاف في الفم دي ممكن تكون علامة على مشكلة صحية تانية في الجسم.

جفاف الفم معناه ان اللعاب قليل داخل الفم, واللعاب ليه دور مهم انه بيساعد على ابعاد البكتيريا عن اللثة والاسنان, وبالتالي لو مافيش لعاب كفاية, فانتي هتكوني معرضة اكتر للاصابة, وجفاف الفم ممكن يكون كمان علامة على متلازمة Sjogren هو مرض مناعي ذاتي.

في النهاية بننصحك لو لاحظتي اي علامة من اللي احنا قولناها, انك تزوري للدكتور في اقرب وقت ممكن, خصوصا لو انتي معرضة لخطر الاصابة ببعض الامراض, وجسمك هيحاول يقولك انك بتعاني من مشاكل صحية بطرق كتير غير متوقعة, فمتتجاهليش الرسايل او العلامات اللي بيقولهالك جسمك.

10 علاجات طبيعية تعمليهم في البيت هتخلصك من ألم الاسنان