قائمة البرامج الدينية في رمضان 2020
البرامج الدينية من الحاجات اللي كتير مننا بيستناها كل سنة في شهر رمضان الكريم, خصوصا ان البرامج مبقتش مقتصرة بس على معرفة الامور الدينية والدنيوية بشكل اكبر, ولكن كمان فيها برامج انسانية اللي بتحفزنا اننا نعمل الخير اكتر خلال الشهر ده, والنهاردة هنعرف مع بعض قائمة البرامج الدينية في رمضان 2020.
البرامج الدينية في رمضان 2020:
1- برنامج احسان من المستقبل:
الاعلامي احمد الشقيري بيرجع يطل علينا تاني في رمضان 2020 بعد انقطاع فترة عن تقديم البرامج ببرنامج الاحسان من المستقبل.
البرنامج هيتعرض على قناة MBC الساعة 6 مساء بتوقيت مصر.
2- برنامج قلبي اطمأن:
كتير مننا كان متابع برنامج قلبي اطمأن خلال المواسم اللي فاتت, ورمضان السنة دي هيبقى معانا بالموسم التالت, والبرنامج فكرته بتعتمد على مساعدة الاشخاص المحتاجين في اي مكان, البرنامج بيقدمه الشاب الاماراتي غيث اللي طول الحلقات مش بيظهر بوشه وشعاره دايما في البرنامج هو “الناس للناس”.
البرنامج هيتعرض على قناة ابو ظبي.
3- برنامج قصة وآية:
برنامج قصة وآية بيقدمه الاعلامي نبيل العوضي وهي عبارة عن حلقات من خلال قناتة على اليوتيوب, كل حلقة بيقدم فيها آية وبيشرح سبب نزولها وتفسيرها.
4- برنامج على أبواب الفتن:
بيقدمه الداعية الاسلامي مصطفى حسني, والبرنامج بيناقش اكتر الفتن اللي ممكن نكون بنواجهها في العصر الحالي.
البرنامج هيتعرض على قناة ON tv.
5- برنامج لعلهم يفقهون:
بيقدمه الشيخ خالد الجندي, والشيخ رمضان عبد المعز, وهدفه هو تجديد الخطاب الديني, وزيادة وعي المسلمين بدينهم بشكل عصري.
البرنامج هيتعرض على قناة DMC.
6- برنامج لعلهم يرجعون:
بيقدمه الشيخ عبد السلام عبد المنصف, وهيتعرض على قناة النهار.
7- برنامج خطوات الشيطان:
بيقدمه الداعية الاسلامي معز مسعود, والبرنامج بيتناول المواقف المتكررة اللي ممكن الانسان يواجه فيها الشيطان في حياتة اليومية, وازاي يتغلب على المواقف دي بالقرآن والاحاديث.
البرنامج هيتعرض على قناة النهار.
8- برنامج اسأل مع دعاء:
برنامج من تقديم الاعلامية دعاء فاروق اللي بيعتمد على استضافة شيخ او داعية اسلامي في كل حلقة, بهدف الرد على اي اسئلة واستفسارات من الجمهور في مختلف الامور الدينية والدنيوية.
البرنامج هيتعرض على قناة النهار.
