وصفة مقرمشات البطاطس على الطريقة الاسيوية بالخطوات والفيديو
مقرمشات البطاطس, هي من اكتر انواع المقرمشات المشهورة تقريبا في كل الدول الاسيوية, وهي وصفة لذيذة وسهلة جدا ومكوناتها بسيطة, والنهاردة من خلال موضوعنا هنقولك ازاي تحضريها في البيت بالخطوات والفيديو.
وصفة مقرمشات البطاطس على الطريقة الاسيوية:
المكونات:
– ½ كوباية بطاطس مسلوقة ومهروسة.
– ½ كوباية دقيق ذرة او نشا بطاطس او نشا عادي.
– ½ معلقة صغيرة فلفل حار بودر.
– ½ معلقة صغيرة ملح.
– ¼ كوباية مية دافية.
الطريقة:
1- في بولة كبيرة اخلطي البطاطس المهروسة, النشا, الملح, الفلفل الحار, وامزجي كل المكونات بايدك مع بعض كويس.
2- ضيفي المية الدافية للمكونات واعجنيها لحد ما العجينة تلم معاكي.
3- شكلي العجينة على شكل اسطوانة طويلة وساوي الاطراف بتاعتها بحيث تبقى واخدة شكل دائري.
4- في حلة على النار فيها مية بتغلي حطي العجينة, وسيبيها على نار متوسطة لمدة 25 دقيقة.
5- طلعي العجينة من المية وحطيها على طبق وسيبيها تبرد خالص, وبعدين دخليها الفريزر لمدة من 6 – 8 ساعات لحد ما تتجمد.
6- خرجي العجينة من الفريزر هتكون متجمدة وسهلة التقطيع, قطيعها بقطاعة الشيبسي.
7- افردي شرايح البطاطس على صينية كبيرة, وسيبيها تحت الشمس لتجفيفها لمدة من 8 – 10 ساعات, او ممكن تجفيفها في الفرن لاختصار الوقت.
8- بعد ما البطاطس تبقى جافة تقدري تحتفظي بيها في برطمان محكم الغلق للتحمير منها اي وقت, وتقدري تخزني اي كمية هتعمليها لمدة 6 شهور هتقعد معاكي من غير ما يحصلها اي حاجة.
9- وقت ما تحبي تحمري منها, حطي طاسة على نار متوسطة فيها زيت غزير, وحمري البطاطس لحد ما تلاقي حجمها كبر معاكي طلعيها من الزيت.
10- تقدري تاكليها زي ما هي كده او ترشي عليها اي توابل تفضليها, او تاكليها مع الكاتشب بيبقى طعمها لذيذ جدا, والاهم انها مضمونة وعملاها بايدك في البيت بمكونات معروفة ومش مضرة.
