تقشير وتنعيم الجسم زي مركز التجميل في خطوتين سهلين في البيت
الجسم زي الوش بالظبط بيحتاج اهتمام وماسكات, لان خلايا الجلد الميتة على الجسم بتحتاج تقشير باستمرار, لانها لما تتراكم على سطح البشرة هتتسبب ان بشرتك تبقى خشنة وجافة وبملمس ولون غير موحد, والمسام هتتسد, عشان كده جلسة تقشير وتنضيف الجسم دي مهمة جدا, والنهاردة من خلال السطور الجايه هنقولك ازاي تعملي جلسة تقشير الجسم زي مركز التجميل في خطوتين سهلين في البيت.
جلسة تقشير الجسم في البيت:
1- الخطوة (1) تبخير وتدليك الجسم:
اول حاجة خدي حمام بمية فاترة عشان تفتحي مسام الجسم.
هاتي كمية من زيت جوز الهند دفيها شوية على النار, دلكي بيه جسمك كله في حركات دائرية لمدة 10 دقايق.
2- الخطوة (2) السكراب:
المكونات:
– 4 معالق كبيرة من دقيق الحمص.
– لبن رايب او لبن عادي او زبادي كمية حسب ما تعجني المكونات مع بعض.
– ½ معلقة صغيرة كركم.
– 1 معلقة كبيرة خشب الصندل بودر “من عند العطار”.
– 2 معلقة كبيرة عصير ليمون.
– 1 معلقة كبيرة قشر برتقان بودر.
الطريقة:
اخلطي دقيق الحمص, الكركم, خشب الصندل, الليمون, وقشر البرتقان, وضيفي لهم لبن رايب بالتدريج لحد ما الخليط يبقى قوامه مناسب مش سايل اوي ولا سميك اوي.
طريقة الاستخدام:
– خدي من الخليط دلكي الجسم بحركات دائرية لمدة من 10 – 15 دقيقة عى الاقل.
– اثناء التدليك ركزي على الاماكن الخشنة والغامقة واللي بيكون متراكم فيها جلد ميت اكتر زي الركبتين, الكوعين, والكعوب حطي عليها الخليط وافركيها بالحجر الخفاف بالراحة.
– اخر حاجة اشطفي الجسم بالمية بس, واتجنبي استخدام اي صابون بعد السكراب ده.
– نشفي جسمك وادهنيه باي لوشن متعودة تستخدميه للترطيب, او ممكن ترطبيه بزيوت طبيعية زي زيت جوز الهند, زيت اللوز الحلو, زيت الزيتون.
