7 عوامل بيتسببوا في وجود الشعر الدهني وازاي تتخلصي منها بسرعة

آية حسان

في

1174

فروة رأسك بتفرز دهون وزيوت عشان تحمي شعرك وترطبه وتكوًن حاجز بينه وبين البيئة اللي حواليكي، لكن الدهون الزيادة بتسبب أضرار لشعرك زي قشرة الشعر.. وفروة راسك بتكون متهيجة وتسببلك حكة، عشان كده لو عرفتي الأسباب هيكون سهل عليكي تلاقي حلول للمشكلة دي، اعرفي معانا 7 عوامل بيتسببوا في وجود الشعر الدهني وازاي تتخلصي منها بسرعة..

7 عوامل بيتسببوا في وجود الشعر الدهني وازاي تتخلصي منها بسرعة..

1- تسريحات الشعر الضيقة والمشدودة :

كلنا بنحب نعمل شعرنا ديل حصان لأنه بيخفي عيوب في الشعر لو كان دهني طبيعي وبيخلي شكلنا كمان حلو، بس خدي بالك لأنه بيزود الافرازات الدهنية في شعرك فتتراكم تحت شعرك وفي الجذور، كمان اي تسريحة شعر مشدودة او خلينا نقول مكتومة زي الضفيرة او الـ bun لفترات طويلة بتتسبب في تراكم الدهون بسهولة.

الحل :

ماتبالغيش في استخدامك لمنتجات شعرك والتسريحات لانها بتكون محتاجه لتنظيف الشعر المستمر، وماتخليشي شعرك دايماً ملموم خليه يتنفس أكتر.

2- بتغسلي شعرك بالمياة السخنة :

المياة السخنة حلوة أوي لفتح المسام وتنضيف الاوساخ اللي بتكون علي الجسم ولكنها مضرة للشعر لانها بتنشفه وبتفقده الزيوت الطبيعية اللي فيه وكمان بتسبب قشرة للشعر، والجفاف وممكن بزيادتها تتسبب في التهابات لمنابت وفروة الشعر اللي بالتالي ممكن تتسبب في زيادة الافرازات لان فروة الراس هتحاول تعادل الالتهابات بانها تزود من افرازاتها.

الحل :

اشطفي شعرك بالمياة الباردة او الفاترة بعد استخدامك للشامبو والترطيب لشعرك، وماتبالغيش في استخدام منتجات تصفيف الشعر.

3- الاختيار الغلط لمنتجات العناية بالشعر :

خدي بالك من المنتجات اللي بتستخدميها لأنها ممكن تسبب في ان شعرك يكون دهني أكتر وتكون طبقة رقيقة فوقه.

الحل:

تجنبي المنتجات الخاصة بالشعر الجاف أو التالف لأنها بتبقى غنية بالمكونات اللي بتسبب دهنية الشعر فمع افرازات الدهون الطبيعية لشعرك وفروة راسك هتبقى كمية الدهون المتراكمة زايدة، كمان تقدري تستخدمي زيوت طبيعية كل فترة زي زيت جوز الهند بس مش كتير.

4- لمس شعرك وتسريحه كتير :

لما بتلمسي شعرك البكتيريا والزيوت اللي في ايديك بتنتقل لشعرك فشعرك بيكون دهني أكتر، وكمان تسريحك المتزايد لشعرك كتير بيخلي الدهون تتوزع علي شعرك بشكل أكبر.

الحل :

اتعودي إنك ماتلمسيش شعرك بذات لو متوترة او بتتكلمي مع حد، وكفاية تسرحيه مرة لمرتين في اليوم وتتأكدي أن فرشاة شعرك نظيفة .

5- الارهاق الزيادة:

الاجهاد والارهاق بيخلي جسمك يفرز هرمون الكورتيزول وده بيخلي جسمك ينتج أو افرازات دهنية اكتر فده هسيبب قشرة الشعر ويسبب معاها الشعور بالحكة والالتهابات.

الحل :

مفيش حل إلا إنك تنظمي حياتك وتقللي ضغوطاتك وترتاحي أطول وقت ممكن، وتقدري تستخدمي منتجات لقشرة الشعر وفروة راسك هتحسي براحة أكتر.

6- بتغسلي شعرك كتير :

المليارات من البكتيريا المفيدة اللي بتعزز المعامل الهيدروجيني الصحي لبشرتنا بتعيش على فروة رأسنا ولما بنغسل شعرنا كتير بنغير في التوازن الطبيعي لبشرتنا فالغدد الدهنية بتفرز دهون أكتر، وبالتالي ده هيسبب تراكم للدهون على شعرك وبشرتك وفروة رأسك.

الحل :

قللي مرات غسيل شعرك شوية واستخدمي شامبو مايسببش جفاف لشعرك، كمان كلي اكلات متوازنة وفاكهة وخضار لانه ده هينعكس على توازن وصحة شعرك.

7- تفاعل شعرك مع المنتجات المختلفة:

اخر سبب معانا لوجود الشعر الدهني هي انه في انواع للشعر بتكون متعرضه للزيوت أكتر من غيرها، كمان بعض المشاكل الصحية هي ممكن تكون السبب في افراز الدهون في شعرك سواء هرمونات أو التهاب الجلد الدهنين وتفاعل جسمك وشعرك مع المنتجات المخلفة ممكن يساهم في زيادة افرازات الدهون بشكل كبير.

الحل :

روحي للدكتور الخاص بمشاكل الشعر دي لو لاحظتي أي تغييرات في شعرك مش عادية، عشان المتخصصين هما اللي هيقدروا يدلوكي على افضل المنتجات لشعرك.