نصايح لستايل انيق للمحجبات في الربيع

بقلمريهام محمود فيموضة وأزياء visibility472

اول ما بيبدأ موسم جديد كل بنت بتبدأ تدور على موضة الموسم والحاجات اللي المفروض تبقى موجودة في دولابها, والنهاردة بنات حوا هتساعدك في المهمة دي وهنقولك شوية نصايح لستايل الربيع, وايه القطع اللي المفروض تكون موجودة في دولابك.

نصايح لستايل الربيع للمحجبات:

1- البسي الخامات اللي تنفع لكل الاوقات:

في موسم الربيع اعتمدي دايما على الخامات المصنوعة من القطن, الكتان, الحرير, او الصوف لو الجو لسه في شوية برد, بننصحك انك تشتري القطع المصنوعة من ال 4 خامات دول, هتقدري تنسقيهم مع كل حاجة عندك.

2- اختاري النقشة الفلورال:

الفلورال او نقشة الورد من الحاجات المناسبة جدا لموسم الربيع, ممكن تلبسي فستان فلورال, وتنسقيه مع بوت مفتوح, او توب فلورال مع الجينز او جيبة.

3- اختاري الاكسسوارات الملفتة:

كلنا عارفين ان الاكسسوارات من الحاجات اللي بتكمل اللوك, ومش بس كده هي كمان بتعبر عن شخصيتك, عشان كده اتأكدي انك تختاري الاكسسوارات المناسبة, ومن قطع الاكسسوار التريندي جدا للموسم ده هي الاحجار.

4- خليكي بسيطة:

اعتمدي على اللوك الكاجوال البسيط هيكون مناسب جدا لموسم الربيع, ممكن تنسقي شيميز جينز مع جيبة او بنطلون بوي فريند, او تيشرت مع جاكيت جينز وبنطلون جينز او dressy pants, او سويت شيرت مع الجينز, وكملي اللوك بسنيكرز.

5- درجات البيج:

درجات البيج من الدرجات المناسبة تقريبا لكل المواسم مش بس الربيع, سواء بنطلون, شيميز, فستان, سويتر, او اي قطعة تانية, هيكون مناسب جدا للوك الربيع.

6- السالوبيت:

من انسب القطع لموسم الربيع للوك اليومي هو السالوبيت بالالوان الزاهية, والموسم ده الستايل ال Oversized تريندي جدا, واكيد متنسيش تنسقي معاها الاكسسوارات المناسبة عشان تكملي اللوك بتاعك.

7- جربي ال Puffed sleeves:

سواء الفستان او السويتر بالكم ال Puffed من الحاجات البسيطة اللي لازم تكون عندك الربيع ده, التفصيلة بسيطة جدا ولكن بتضيف للوك وبتخلي شكله انيق اكتر.

8- اللون الاسود:

لو بتفكري الربيع يعني بس الالوان الزاهية والفلورال, انتي غلطانة, لان اللون الاسود من الالوان المناسبة تقريبا لكل الاوقات, ولكن اتأكدي بس ان مع الاسود يكون داخل تفاصيل بالوان زاهية او مشرقة عشان تكسري اللون الاسود.

9- الستايل الريترو:

الربيع من انسب المواسم اللي ممكن تجربي فيها الستايل الريترو او القديم المستوحي من السبعينات, زي مثلا الفستان ال Heart shaped مع النقط, او توب مع فيونكة.

10- المقلم:

المقلم من الحاجات تقريبا اللي مش بتبطل, ممكن انك تختاري قطعة مقلمة للوك بتاعك في الربيع, ممكن تنسقي سويتر مع جيبة مطبوعة, او بنطلون ابيض.

تعالوا نشوف مع بعض مجموعة ستايلات تستوحي منها اللوك بتاعك:

ستايلات توب لازم تكون موجودة في دولابك

ستايلات توب لازم تبقى في دولابك