دخلي البذور دي في نظامك الغذائي هتساعدك تخسري وزنك بسرعة
لو بتدوري على حاجة سهلة تخسري بيها وزنك من غير نظام غذائي, النهاردة من خلال موضوعنا هنشارك معاكم قايمة بذور لتخسيس الوزن بسرعة وكمان تقليل دهون البطن, وهنقولك ازاي تستخدميها عشان تجيب معاكي افضل النتايج.
بذور لتخسيس الوزن بسرعة:
1- بذور الكتان:
بذور الكتان تعتبر مصدر غني جدا بالبروتين والالياف, وكمان بتساعد على موازنة مستوى السكر في الدم, وبتساعد على تقليل الشهية.
المكونات:
½ معلقة كبيرة من بذور الكتان.
كوباية زبادي.
2 معلقة صغيرة عسل نحل.
الطريقة:
بكل بساطة اخلطي المكونات كلها مع بعض وكليها على طول, ممكن تاكليها مرتين في اليوم قبل وجبة الفطار والعشا.
2- بذور القرع:
بذور القرع تعتبر مصدر مهم جدا للزنك, وهو مهم لحرق الدهون, وبيساعد على تنظيم حركة الامعاء.
هاتي 2 معلقة كبيرة من بذور القرع, حمصيها في الطاسة على النار, وكليها.
تقدري تاكليها كوجبة خفيفة في نص اليوم يوميا.
3- بذور الشيا:
بذور الشيا غنية بالبروتين والالياف المفيدة للصحة, والمشروب ده غير انه بيخسس كمان بيساعد على مكافحة السرطان.
المكونات:
2 معلقة كبيرة من بذور الشيا.
1 معلقة كبيرة عسل نحل.
1 معلقة صغيرة عصير ليمون.
2 كوباية مية.
الطريقة:
اخلطي المكونات كلها مع بعض في برطمان, وحطيه في التلاجة لمدة ساعة, وبعدين قلبيه كويس واشربيه, تقدري تشربيه اي وقت خلال اليوم يوميا.
4- بذور عباد الشمس “اللب السوري”:
بذور عباد الشمس مصدر مهم للمعادن ومضادات الاكسدة, وكمان اكل بذور عباد الشمس مفيد لشعرك وبشرتك.
المكونات:
1 معلقة كبيرة من بذور عباد الشمس.
½ كوباية شوفان.
1 معلقة كبيرة مشمش مجفف.
1 معلقة كبيرة جوز هند مبشور “اختياري”.
2 معلقة كبيرة لوز مفروم.
½ معلقة صغيرة قرفة.
وكوباية من حليب اللوز.
الطريقة:
اجمعي المكونات كلها مع بعض وقلبيهم كويس, واستهلكي الوصفة دي كوجبة فطار كل يوم عشان توصلي لافضل النتايج.
5- بذور القنب الهندي “الشنارق”:
بذور القنب بتساعد في عملية الهضم, وتوازن هرمونات الجسم, وبتحسن عملية التمثيل الغذائي.
المكونات:
2 معلقة من بذور القنب مطحونة.
1 كوباية لبن.
الطريقة:
ضيفي مسحوق بذور القنب لكوباية لبن مغلية, وقلبيهم كويس مع بعض, وكده يبقى المشروب جاهز, تقدري تشربيه اي وقت خلال اليوم يوميا.
وتقدري كمان ترشي من مسحوق بذور القنب على طبق السلطة.
6- بذور السمسم:
بذور السمسم تعتبر مصدر غني جدا بالالياف والكالسيوم والفيتامينات, وبذور السمسم بتساعد على تحسين الجهاز الهضمي, وبتساعد على فقدان الوزن بسرعة.
المكونات:
شريحة توست.
بياض بيضة.
كمية من بذور السمسم.
ملح.
فلفل اسود.
الطريقة:
هاتي شريحة التوست حطي عليها من فوق بياض البيضة, ورشي فوقيها بذور السمسم, حطي شريحة التوست في الفرن تتحمص شوية, وطلعيها ضيفي لها الملح والفلفل الاسود حسب ذوقك.
ممكن تاكلي الوصفة دي كوجبة فطار, او وجبة خفيفة في نص اليوم, او وجبة عشا.
