18 تسريحة شعر سهلة خطوة بخطوة تقدري تعمليهم بنفسك في البيت

بقلمريهام محمود فيشعر visibility504

لو بتدوري على تسريحات سهلة وفي نفس الوقت شكلها حلو, النهاردة هنشوف مع بعض تسريحات شعر سهلة خطوة بخطوة تقدري تعمليهم بنفسك في البيت من غير ما تضطري تروحي للكوافير.

تسريحات شعر سهلة:

1- تسريحة Braided chignon:

تسريحة بسيطة وسهلة جدا, في جنب ضفري ضفرتين صغيرين جنب بعض, وفي الجنب التاني ضفري ضفيرة صغيرة وخدي خصلة تانية اعمليها لفتين بس على بعضين, وبعدين لمي الجناب مع باقي الشعر ولفي الشعر كله لفتين على بعض, وبعدين لميه كله على فوق ودخليه جوه الضفاير وثبتيه بالبنس.

تسريحات شعر سهلة
تسريحات شعر سهلة

2- تسريحة ضفيرة ديل السمكة Fishtail braided:

خدي الاول جزء من الشعر من فوق سرحيه بالمشط بالعكس عشان تديه حجم زيادة, خدي تلت الشعر من فوق قسميه نصين, وابدأي ضفريه وانتي بتضفري خدي خصلة من الشعر من تحت دخليها مع الضفيرة من الجنبين, لحد ما تخلصي الشعر كله.

تسريحات شعر سهلة

3- تسريحة French twist:

خدي الجزء بتاع القصة سرحيه بالمشط او بالفرشة بالعكس عشان تديه حجم اكبر, بعدين لمي الشعر كله على ورا ابرميه وارفعيه على فوق ودخليه جوه بعضه وثبتيه بالبنس.

تسريحات شعر سهلة

4- تسريحة Romatic side braid:

خدي جزء من الشعر من قدام عند القوصة وابدأي ضفريه, وخدي خصلة من الشعر من ورا ومن قدام دخليها مع الضفيرة لحد ما تخلصي الشعر كله واربطيه باستك من تحت.

تسريحات شعر سهلة

5- ستايل الويفي:

اعملي شعرك كله بالسيشوار بالطريقة العادية, وبعدين بالكيرلر او بالمكوى ابدأي خدي خصلة خصلة من الشعر ولفيها على المكوى لحد ما تخلصي الشعر كله, في الاخر رشي عليه مثبت.

تسريحات شعر سهلة

6- تسريحة Elegant fishtail bun:

لمي الشعر كله بتوكه ديل حصان عالي, طلعي خصلة صغيرة من تحت التوكة واعمليها ضفيرة ديل السمكة, باقي الشعر اعمليه كحكة عالية, ولفي الضفيرة على الكحكة وثبتيها بالبنس.

تسريحات شعر سهلة

7- تسريحة  Waterfall braid:

اعملي الشعر كيرلي بالمكوى بالطريقة العادية, خدي جزء من الشعر من قدام اعمليه ضفيرة جانبية, لمي الشعر اللي ورا بطريقة فوضوية وبعدين خدي الضفيرة اشبكيها مع الشعر ورا بالبنس.

تسريحات شعر سهلة

8- تسريحة Knotted chignon:

لمي الشعر كله بتوكة على ورا على شكل ديل حصان منخفض, خدي خصلة من الشعر لفيها على شكل كحكة وثبتيها بالنبس, وبعدين خدي الباقي من الشعر ارفعيه على فوق وثبتيه بالبنس فوق الكحكة والباقي من الشعر اعمليه عقدة او اربطيه ولفيه على الشعر وثبتيه بالبنس.

تسريحات شعر سهلة

9- تسريحة  Romantic wrapped side pony:

طلعي الجزء بتاع القوصة اشبكيه بالبنسة, وبعدين خدي باقي الشعر اعمليه ديل حصان جانبي, وبعدها اعملي القوصة للجنب واشبكيها بالبنسة مع الشعر.

تسريحات شعر سهلة

10- تسريحة Big waves:

اعملي شعرك بالسيشوار بالطريقة العادية, وبعدين قسميه خصل ولفي كل خصلة على ايدك وثبتيها بالبنس, اعملي الشعر كله وسيبيه ملفوف شوية وبعدين فكيه, هياخد شكل الويفي العريض.

تسريحات شعر سهلة

11- تسريحة Round brush waves:

ممكن تعملي ويفز بالفرشة, بعد غسل الشعر ادهنيه بالموس, اعمليه سيشوار بالفرشة الكبيرة واثناء ما انتي بتعمليه لفي الشعر على الفرشة, هيطلع معاكي ويفي.

تسريحات شعر سهلة

12- حجم اكبر للشعر:

عشان تدي حجم للشعر وخصوصا لو شعرك خفيف, قسمي الشعر خصل واعمليه كل خصلة بالسيشوار ولفيها على بكرة كبيرة, اعملي الشعر كله بنفس الطريقة, وبعد ما تخلصي فكيه.

13- تسريحة Braided tassel:

خدي جزء من الشعر من الجنب اعمليه ضفيرة, وبعدين باقي الشعر لمية ديل حصان جانبي وخدي الشعر كله لفيه جوه ديل الحصان زي ما هو باين قدامنا في الصورة كده, خدي الضفيرة لفيها حوالين ديل الحصان وثبتيها بالبنسة.

14- تسريحة بالباندانا:

حطي الباندانا ورا الجزء بتاع القوصة, خدي خصل الشعر من الجنبين وابدأي لفيها حوالين الباندانا.

15- تسريحة Easy twist bun:

اقسمي الشعر نصين, وكل نص لميه بتوكه على شكل ديل حصان بارتفاع متوسط, كل نص اقسميه اتنين ولفيه على بعض واشبكيه باستك من تحت, بعدها ارفعي النصين عكس بعض وثبتيهم بالبنس.

16- تسريحة Braided bun:

اول حاجة خدي جزء من الشعر من فوق سرحيه بالعكس عشان تديه حجم اكبر, لمي الشعر كله على شك ديل حصان عالي, اقسميه نصين, وضفري كل نص واربطيه باستك من تحت, وبعدين لفي الضفيرين عكس بعض على شكل كحكة وثبتيها بالبنس, وفي الاخر رشيها بالمثبت, تقدري تحطي توكة على شكل فيونكة كبيرة تحت الكحكة عشان تديها شكل احلى.

17- تسريحة Cute ponytail:

الجزء اللي فوق من الشعر ورا القوصة سرحيه بالمشط بالعكس عشان تديه حجم اكبر, لمي الشعر كله ديل حصان بارتفاع متوسط, وخدي خصلة من الشعر لفيها حوالين ديل الحصان وثبتيها بالبنس.

18- تسريحة One sided:

خدي خصلة من الشعر من قدام اعمليها ضفيرة جانبية, واثناء ما انتي بتضفري خدي خصل من الشعر من ورا دخليها مع الضفيرة, واربطيها من تحت باستك.

7 تسريحات سهلة وسريعة للشعر المبلول بالخطوات والفيديو

تسريحات للشعر المبلول