ايه هي اعراض واسباب نقص المناعة..وطرق علاجها

بقلمريهام محمود فيصحة visibility969

الجهاز المناعي يعتبر اهم جهاز في جسم الانسان, لانه هو الوسيلة اللي الجسم بيقدر يدافع بيها عن نفسه ضد اي حاجة غريبة ممكن تدخله زي الفيروسات, الجراثيم, البكتيريا المسببة للامراض, والنهاردة من خلال موضوعنا هنتعرف على اعراض نقص المناعة واسبابها وطرق علاجها.

ايه هو الجهاز المناعي:

اول حاجة عشان نفهم الموضوع لازم نعرف ايه هو الجهاز المناعي وازاي بيشتغل في الجسم, جهاز المناعة بيتكون من مجموعة خطوط دفاعية.

الخط الدفاعي الاول:

ده خد دفاعي فطري بيبقى موجود مع الانسان من اول ما بيتولد وبيتكون من:

– الجلد: اللي يعتبر حاجز ضد دخول الميكروبات المسببة للامراض جوه الجسم.

– الاغشية المخاطية: زي الانف, والفم اللي بتنتج مادة مخاطية لزجة بتلتصق فيها الميكروبات المختلفة.

– العصارة الهضمية الموجودة في المعدة: ودي بتتميز بدرجة حموضة عالية, بتساعد على قتل معظم البكتيريا اللي ممكن تكون موجودة في الاكل.

– اللعاب: بيساعد على تقليل كمية البكتيريا ومسببات الامراض التانية اللي موجودة في الفم.

الخط الدفاعي التاني:

وده خط دفاعي بيتطور مع نمو الانسان, فلو الميكروبات قدرت انها تعدي من خط الدفاع الاول, في الحالة دي بتواجه خط الدفاع التاني, اللي بيزود الجسم بالمقاومة والمناعة من الامراض المختلفة والخط ده بيتكون من:

– كل خلايا الدم البيضا المتخصصة, اللي بتدافع عن الجسم ضد العدوى.

– الجهاز اللمفاوي اللي بيتكون من الاوعية اللي بتحتوي على الخلايا الليمفاوية المتخصصة, اللي بتهاجم الفيروسات ومسببات الامراض اول ما تدخل الجسم, بالاضافة انها بتكون الاجسام المضادة اللي بتساعد على تدمير الفيروسات لو دخلت الجسم.

اعراض نقص المناعة
اعراض نقص المناعة

اعراض نقص المناعة:

اعراض نقص المناعة بتختلف من شخص للتاني حسب الاسباب ومن الاعراض دي.

1- زيادة قابلية الجسم للاصابة بالعدوى, لو الشخص عنده نقص في المناعة فترة العدوى عنده بتكون اطول, وبيبقى صعب علاجها مقارنة بالاشخاص اللي مناعتهم قوية.

2- الاصابة بالالتهابات الرئوية, والتهاب الشعب الهوائية, والتهاب الجيوب الانفية, والتهاب الاذن, والتهاب الجلد بشكل متكرر.

3- الاصابة بالعدوى والالتهابات في اعضاء الجسم الداخلية.

4- التأخر في النمو.

5- التعرض لاضطرابات المناعة الذاتية زي مرض الذئبة, والتهاب المفاصل, ومرض السكر من النوع الاول.

6- حدوث اضطرابات في الدم, زي انخفاض عدد الصفائح الدموية, وفقر الدم او الانيميا.

7- تكرار حدوث مشاكل في الجهاز الهضمي, زي التقلصات, فقدان الشهية, الغثيان, الاسهال, والاسهال بشكل خاص لو استمر لمدة من 2 – 4 اسابيع متواصلة ده ممكن يكون علامة تحذرك ان الجهاز المناعي ضعيف وبيسبب ضرر في بطانة الامعاء الدقيقة او الجهاز الهضمي.

8- برودة الايدين, لو الاوعية الدموية اتعرضت لالتهاب هيبقى صعب ان الجسم يحافظ على تدفئة صوابع الايدين والقدمين والاذنين والانف.

9- جفاف العينين.

10- التعب الشديد.

11- الحمى.

12- الصداع.

13- الطفح الجلدي.

14- آلام المفاصل.

15- الحساسية الزيادة من الشمس.

16- الوخز او الاحساس بتنميل وتخدير في الايدين والقدمين.

17- تغيير الوزن من غير سبب واضح.

18- العين الوردية او المعروف طبيا باسم التهاب الملتحمة.

لكن لازم نعرف كمان ان في كتير من الاعراض دي ممكن انها تحصل لاسباب تانية غير ضعف جهاز المناعة, عشان كده ضروري لو اي شخص حس باي اعراض منها يروح لزيارة الدكتور ويعمل التحاليل والفحوصات اللازمة.

اعراض نقص المناعة

اسباب ضعف المناعة:

ممكن يكون سببه التعرض لمرض معين بيضعف الجهاز المناعي, او التعرض لانواع معينة من السرطانات اللي بتهاجم  الجهاز المناعي زي سرطان الغدد اللمفاوية, الورم النخاعي, سرطان الدم “اللوكيميا”.

– التعرض لحروق شديدة.

– مرض السكر.

– سوء التغذية.

– العلاج الكيميائي والاشعاعي زي اللي بيتعرض له مرضى السرطان.

– استئصال الطحال.

ولازم نعرف حاجة مهمة جدا ان قلة النوم او عدم النوم لساعات كافية ممكن انه يقلل من مناعة الجسم, وكمان مع التقدم في السن جهاز المناعة بيبدأ يضعف لان بعض اجهزة الجسم اللي بتنتج خلايا الدم البيضا بتبدأ انها تتقلص لما بتوصل لسن معين, وده بيضعف جهاز المناعة في الجسم.

نصايح للاشخاص اللي بيعانوا من ضعف المناعة:

في حاجات ممكن يمشي عليها اي شخص بيعاني من نقص المناعة هتساعده انه يقدر يتعامل معاها ويقويها.

– وقت الحمام او في المطبخ ممكن تقعدي بدل ما تقفي عشان تقللي من الاحساس بالتعب.

– استهلاك الاطعمة الصحية اللي بتساعد على تقوية المناعة زي الفواكة, الخضروات, الحبوب الكاملة, ومصادر البروتين الخالية من الدهون.

– تجنب الاطعمة المصنعة اللي بتحتوي على مواد مضافة كتير.

– تجنب الاطعمة النية او اللي مش مطبوخة كويس.

– عدم تناول المكملات الغذائية الا بعد استشارة دكتور متخصص عشان يساعدك في اختيار المناسب ليكي.

– ممارسة الرياضة بقدر الامكان, لان الرياضة بتساعد على زيادة قدرة الجسم والطاقة وبتقلل من التوتر اللي ممكن يزود من مشكلة ضعف المناعة, ممكن تمارسي تمارين رياضية بسيطة من 5 – 10 دقايق وتخليها جزء من روتينك اليومي, زي المشي مثلا, او التمارين الرياضية البسيطة في البيت.

– حماية الجسم من العدوى بقدر الامكان عن طريق لبس كمامة في الاماكن الزحمة, وتجنب اصلا التواجد في اماكن زحمة لو في وقت انتشار الانفلونزا, والبعد عن المرضى, والنوم عدد ساعات كفاية.

– لو عايزة تربي حيوان اليف في البيت, اختاري حيوان تقدري تعتني بيه كويس زي القطط او الكلاب, لان بعض الحيوانات زي الزواحف والطيور ممكن انها تنقل جراثيم وامراض بسهولة, لان حتى التطعيمات مش بتحميها من الامراض.

– غسل الايدين بمية دافية لمدة 20 ثانية قبل وبعد تجهيز واكل الطعام.

– غسل الفواكه والخضروات كويس تحت المية الجارية, واتجنبي استخدام الصابون والمنظفات والكلور لتنضيفها, وافركي الخضروات والفواكه اللي قشرتها سميكة كويس تحت المية.

– غسل الخضروات الورقية كويس جدا, عن طريق غسل ورقة ورقة تحت مية جارية.

– اتخلصي من الفواكة والخضروات اللي فيها اجزاء بايظة.

– اغسلي غطيان الاطعمة المعلبة بالمية والصابون قبل فتحها.

اهم الاطعمة اللي هتساعدك على تقوية جهاز المناعة

اهم الاطعمة لتقوية جهاز المناعة