15 غلطة في الطبخ ممكن تبوظلك الاكل..اعرفيهم معانا وتجنبيهم

بقلمريهام محمود فيمنوعات visibility459

ممكن يكون في حاجات كتير متعودين اننا نعملها اثناء الطبخ ومنعرفش انها غلط, وتكون النتيجة ان الاكل ميطلعش بالطعم المطلوب اللي احنا متوقعينه, عشان كده النهاردة هنشارك معاكم غلطات في الطبخ المفروض تتجنبيها, عشان الاكل يطلع لذيذ وطعمه حلو.

غلطات في الطبخ:

1- اضافة الزيت للمية وانتي بتعملي المكرونة:

معظمنا تقريبا بيعمل الحركة دي وهي اضافة الزيت لمية سلق المكرونة, والحيلة دي بتتعمل ياما عشان نمنع المية انها تفور من الحلة, او عشان نمنع المكرونة تلزق في بعضها, ولكن اضافة الزيت مش فكرة مثالية, لان لو هتعملي المكرونة بالصلصة, الزيت هيخلي الصلصة متمسكش في المكرونة كويس او متتشربهاش كلها.

غلطات في الطبخ
غلطات في الطبخ

2- تصفية مية المكرونة وشطف المكرونة:

بعد ما المكرونة بتستوي تقريبا معظمنا بيتخلص من مية السلق, ولكن الاحتفاظ بالمية ممكن يضيف نكهة لطبقك, ولو هتعملي المكرونة بالصلصة المية بتاعة السلق لو ضيفتي منها شوية للصلصة ممكن انها تساعد ان الصلصة والمكرونة يمسكوا في بعض كويس وهيخلي قوامها متسق اكتر, وشطف المكرونة ممكن يكو هو السبب ان الصلصة مش بتمسك في المكرونة.

غلطات في الطبخ

3- بتستني فترة طويلة قبل تقليب المكرونة:

وانتي بتسلقي المكرونة مهم جدا انك تقلبيها على طول بعد ما تنزليها في المية, لان في الغالب التصاق المكرونة ببعضها بيبقى في البداية بسبب النشا اللي بينزل من المكرونة.

غلطات في الطبخ

4- مش بتخلي اللحمة تفك كويس:

ضروري تخرجي اللحمة من التلاجة قبل طبخها بفترة وتسيبيها توصل لدرجة حرارة الغرفة, لان لو عملتيها وهي لسه متجمدة الاجزاء المتجمدة هتستوي بشكل مش متساوي, ومش هتستوي كويس من جوه وهتتحرق من بره.

غلطات في الطبخ

5- مش بتسيبي اللحمة ترتاح قبل تقطيعها:

لما بتطبخي اللحمة, معظم العصارة بتاعتها في الجزء اللي في النص, عشان كده الافضل انك تسيبيها ترتاح شوية قبل تقطيعها, لحد ما العصارة توصل لباقي اجزاء اللحمة.

غلطات في الطبخ

6- تقليب الارز:

من الافضل عدم تقليب الارز وهو على النار, لان التقليب ممكن ينشط النشا اللي موجود فيه, وده ممكن يخلي الارز يعجن منك.

غلطات في الطبخ

7- رفع الغطا اثناء طبخ الارز:

اثناء طبخ الارز مترفعيش الغطا عشان تتأكدي اذا كان استوى ولا لا, لانك لو عملتي كده الحرارة هتهرب او هتخرج من الحلة, والجزء اللي فوق هيبقى مستوي اقل من الجزء اللي تحت, بالاضافة انها هتقلل نسبة المية اللي انتي حطاها للارز لانه هيتبخر مع رفع الغطا, وهيطلع الارز ناشف معاكي.

غلطات في الطبخ

8- قلي الاكل بزيت الزيتون البكر الممتاز:

زيت الزيتون البكر الممتاز بيحتوي على درجة دخان منخفضة, وبالتالي لو حطتيه على النار في درجة حرارة عالية, هتبدأي تشمي ريحة كريهة وهيخرج منه مواد كيميائية سامة.

9- عدم التأكد من جفاف الاسماك:

لو الاسماك سطحها مبلل او عليه نسبة مية وبدأتي تحمريه في الطاسة زي ما هو كده, السطح بتاعه هيتحرق, ومش هيديكي في النهاية القشرة الدهبي الطبيعية بتاعته.

10- تشويح الخضار وهو رطب:

بعد غسل الخضروات, اتأكدي من جفافها كويس قبل طبخها, والا المية هتسبب بخار, هيخلي الخضروات رطبة جدا بعد الطبخ, وهتفقد طعمها ونكهتها.

11- اضافة الزبدة الباردة والكريمة للبطاطس المهروسة:

اضافة المكونات دي وهي باردة هيخليها متختلطش كويس بسبب النشا اللي في البطاطس, عشان كده الافضل تدوبي الزبدة لحد ما تسيح خالص والكريمة سخنيها لحد ما تبدأ تطلع بخار, وتقدري ساعتها تضيفيها للبطاطس.

12- بتحطي كمية كبيرة في طاسة واحدة:

لو بتطبخي وجبة كبيرة وحطيتي مكونات كتير في طاسة واحدة, ممكن المكونات في النهاية تبقى ناشفة او متستويش كويس, لان الحرارة هتبدأ تنخفض عشان تتوزع على كل الحاجات اللي عندك, وده هيسبب فقدان اللحمة لرطوبتها وطراوتها وهتطلع ناشفة معاكي.

13- بتضيفي الثوم بدري:

الثوم من المكونات اللي بتتحرق بسهولة وبسرعة, عشان كده لو حطتيه هو اول حاجة ممكن يدمر نكهته ويبوظلك طعم الاكلة كلها, عشان كده الافضل انك تضيفيه في الاخر, واتأكدي انه مش هيتحرق منك.

14- مش بتسخني الطاسة قبل الطبخ فيها:

ضروري انك تسخني الطاسة كويس قبل ما تقلي فيها اي حاجة, والا اللحمة او السمك مش هيستوا كويس في النهاية.

15- مش بتسوي البطاطس قبل شويها:

لو حطيتي البطاطس النية في الفرن, ممكن انها تتحرق من بره من غير ما تستوي من جوه كويس, وعشان تتجنبي ان ده يحصل لو انتي هتشوي البطاطس الافضل سلقها في المية المغلية بشكل جزئي يعني تبقى نص سلق قبل ما تشويها في الفرن.

21 حيلة هتسهل حياتك في المطبخ مكنتيش تعرفيهم قبل كده

حيل هتسهل حياتك في المطبخ