4 خطوات في روتين البشرة للعروسة لازم تبدأهم قبل الفرح بشهر

بقلمآية حسان فيبشرة visibility1368

اهتمام العروسة ببشرتها من أهم الحاجات اللي لازم تحضرلها، زيه زي الجهاز والهدوم وتفاصيل الفرح والبيت، ومايقلش اهمية ابدا عن اي حاجة تانية مهمة بتحضري ليها قبل فرحك، عشان كده في المقال ده هاتعرفي معانا 4 خطوات في روتين البشرة للعروسة لازم تبدأهم قبل الفرح بشهر

4 خطوات في روتين البشرة للعروسة لازم تبدأهم قبل الفرح بشهر

1- تنظيف البشرة

تنظيف البشرة بيعتبر اهم خطوة في اي روتين عناية بالبشرة خصوصا للتخلص من المسام اللي بتعتبر اكبر مشكلة بتواجه كل البنات، في الخطوة دي هنستخدم حاجتين سهلين جداً وهما مياة الورد والقطن الطبي، بلي قطنة نضيفة بمياة الورد كويس واعصريها بشكل متوسط و وزعيه على بشرتك وسيبيه لمدة دقيقتين، مياة الورد بتساعد على تنظيف وسد المسام وكمان بترطب البشرة وتحسن من الدورة الدموية. 

روتين البشرة للعروسة
تنظيف البشرة

2- تقشير البشرة

تقشير البشرة بيساعد على التخلص من طبقات الجلد الميتة و بيظهر الطبقات التحتية الجديدة وده اللي بيخلي وشك بيلمع ويبان صحي ومشرق، وعلشان تحضري سكراب طبيعي لبشرتك استخدمي الوصفة دي، امزجي جل الصبار مع زيت جوز الهند الطبيعي والسكر والعسل الأبيض بكميات متناسبة وقلبيهم مع بعص كويس، وافردي المزيج على وشك وافركي برفق لمدة دقيقتين وبعد كده اغسلي وشك بمياة باردة. 

تقشير البشرة

3- ماسك تفتيح البشرة 

ماسك الليمون والخيار من أهم واسهل الوصفات اللي هتساعد على توحيد لون البشرة وتفتيحها، اهرسي خيارة في الكبة او الخلاط وامزجيها مع عصير ليمونة ومعلقة دقيق وقلبي لحد ما يكونوا مزيج يشبه الكريم او المعجون، وافرديها على وشك وسيبيه لمدة 15 دقيقة وبعدين اغسلي وشك بمياة باردة وكرري الماسك مرتين في الأسبوع. 

ماسك الليمون والخيار

4- ترطيب البشرة: 

آخر واهم ماسك معانا هو ماسك ترطيب البشرة، والحقيقة ان ترطيب البشرة لازم يتم بشكل يومي لانه الخطوة الاساسية لبشرة شابة وصحية ومشرقة دايماً، عشان تحضري الماسك ده هتحتاجي معلقة عسل ابيض، جلسرين، عصير ليمون وشاي اخضر، امزجي معلقة من العسل مع معلقتين من الجلسرين ومعلقتين من الشاي الاخضر ومعلقة عصير ليمون، وافردي المزيج على وشك بحركة دائرية من دقيقة لدقيقتين وبعد كده نامي بيه طول الليل، الجلسرين والعسل هيساعدوا على ترطيب البشرة ومنع التجاعيد، كرري الماسك كل يوم او يوم اه ويوم لا لو تقدري. 

ترطيب البشرة

اعرفي معانا كمان طرق استخدام اوراق الريحان للتخلص من حب الشباب