اهم الاطعمة اللي هتساعدك على تقوية جهاز المناعة

بقلمريهام محمود فيصحة visibility765

جهاز المناعة هو الدرع الواقي للجسم, وعشان نحمي الجسم من اي امراض يبقى لازم نقوي جهاز المناعة, وده ممكن يحصل بطريقة بسيطة ومش مكلفة وهي التغذية الصحية السليمة, والنهاردة من خلال السطور الجاية هنتعرف على اهم الاطعمة لتقوية جهاز المناعة.

اهم الاطعمة لتقوية جهاز المناعة:

1- الفواكة الحمضية:

معظم الاشخاص لما بيتعرضوا لنزلة برد او انفلونزا اول حاجة بيلجأوا لها هو فيتامين C, وده لانه بيساعد على بناء وتقوية جهاز المناعة في الجسم, لانه فيتامين C بيزود من انتاج خلايا الدم البيضا, وده يعتبر مفتاح مكافحة العدوى.

والفواكة الحمضية تشمل:

– الجريب فروت.

– البرتقان.

– اليوسفي.

– الليمون.

ولان جسمك مش بينتج او بيخزن العنصر ده, فأنتي محتاجة فيتامين C بشكل يومي عشان تحافظي على صحتك, وتقريبا كل الحمضيات غنية بفيتامين C, والتنوع ده هيساعدنا اننا نضيفه بسهولة لنظامنا الغذائي بشكل اليومي.

اهم الاطعمة لتقوية جهاز المناعة
اهم الاطعمة لتقوية جهاز المناعة

2- الفلفل الرومي الاحمر:

لو فاكرة ان الحمضيات بس هي اللي بتحتوي على اكبر نسبة من فيتامين C, احنا النهاردة بنقولك ان 28 جرام او حتى نص الكمية دي من الفلفل بتحتوي على ضعف فيتامين C اللي موجودة في الحمضيات, بالاضافة انها مصدر غني لبيتا كاروتين, اللي بتساعد على تقوية جهاز المناعة, وفيتامين C ممكن يساعد على الحفاظ على صحة الجلد, والبيتا كاروتين بتحافظ على صحة العين والبشرة.

اهم الاطعمة لتقوية جهاز المناعة

3- البروكلي:

البروكلي غني بالفيتامينات والمعادن, غني بفيتامينات A, C, E, بالاضافة لمضادات الاكسدة والالياف, ويعتبر البروكلي من اكتر الخضروات الصحية اللي ممكن تضيفيها لنظامك الغذائي, والمفتاح عشان تحافظي على قيمته الغذائية اطبخيه وقت قليل على النار بقدر الامكان.

اهم الاطعمة لتقوية جهاز المناعة

4- الثوم:

الثوم موجود في كل مطبخ تقريبا, ومن الحاجات اللي بتضيف نكهة مميزة للاكل, بالاضافة انه مفيد للصحة, والدراسات اثبتت قدرته في مكافحة العدوى, الثوم ممكن انه يساعد على خفض ضغط الدم, وابطاء تصلب الشرايين, وبيحتوي على خصائص بتساعد على تعزيز المناعة اللي بتيجي من تركيز المركبات المحتوية على الكبريت زي الاليسين.

اهم الاطعمة لتقوية جهاز المناعة

5- الزنجبيل:

الزنجبيل كمان واحد من العناصر اللي بيلجأ ليها اشخاص كتير في وقت المرض, الزنجبيل ممكن انه يساعد في تقليل الالتهابات, وده بدوره بيساعد على تقليل التهاب الحلق والامراض الالتهابية التانية, والزنجبيل كمان ممكن انه يساعد على تقليل الغثيان.

الزنجبيل بيساعد كمان على تقليل الالم المزمن, وبيحتوي على خصائص بتساعد على تخفيض الكوليسترول.

اهم الاطعمة لتقوية جهاز المناعة

6- السبانخ:

السبانخ غنية بفيتامين C, وبمضادات الاكسدة وبيتا كاروتين, وده بيساعد على تقوية جهاز المناعة وزيادة قدرته على مكافحة العدوى, وزي البروكلي بالظبط السبانخ هتكون مفيدة اكتر لو اطبخت لوقت قليل على النار عشان تحافظ على قيمتها الغذائية, ومع ذلك الطبخ الخفيف بيعزز من فيتامين A وبيسمح باطلاق مغذيات تانية من حمض الاكساليك.

اهم الاطعمة لتقوية جهاز المناعة

7- الزبادي:

دوري على الزبادي اللي فيها عناصر نشطة زي الزبادي اليوناني, لان العناصر دي بتساعد على تقوية جهاز المناعة لمكافحة الامراض, وحاولي انك تعتمدي على الزبادي العادي بدل الانواع اللي بيكون فيها سكر, وتقدري تحلي الزبادي بنفسك بالفاكهة الطبيعية الصحية او العسل.

الزبادي كمان تعتبر مصدر رائع جدا لفيتامين D, عشان كده حاولي انك تختاري الانواع المدعمة اكتر بفيتامين D, فيتامين D بيساعد على تنظيم  جهاز المناعة, وبيعزز دفاعات الجسم الطبيعية ضد الامراض.

اهم الاطعمة لتقوية جهاز المناعة

8- اللوز:

لما الموضوع يتعلق بالوقاية من نزلات البرد ومكافحتها, هنا بيجي دور فيتامين E, فيتامين E يعتبر مفتاح نظام المناعة الصحي, هو فيتامين قابل للذوبان في الدهون, وده معناه انه بيتطلب امتصاص الدهون بشكل صحيح, والمكسرات زي اللوز غنية بالفيتامينات وبتحتوي كمان على الدهون الصحية, حوالي ½ كوباية من اللوز واللي هي تقريبا 46 حباية لوز, بتوفر تقريبا 100% من الكمية اليومية الموصي بيها من فيتامين  E.

اهم الاطعمة لتقوية جهاز المناعة

9- الكركم:

الكركم يعتبر من انواع التوابل المفيدة جدا, ومعروف عنه على مر السنين انه مضاد للالتهابات, وبيساعد في علاج التهاب المفاصل والروماتويد, واثبتت الدراسات ان التركيزات العالية من الكركمين واللي بتدي الكركم لونه الاصفر المميز, بتساعد على تقليل تلف العضلات الناتج عن ممارسة الرياضة.

10- الشاي الاخضر:

الشاي الاخضر او الاسود الاتنين مليانين بعنصر الفلافونويد, وده نوع من مضادات الاكسدة القوية واللي ثبت فعاليته في تقوية المناعة, والشاي الاخضر يعتبر كمان مصدر للحمض الاميني الليثينين اللي بيساعد في انتاج مركبات مقاومة الجراثيم.

11- البابايا:

البابايا من انواع الفواكة الغنية بفيتامين C, هنلاقي فيه 224% من الكمية اليومية الموصي بيها من فيتامين C, والبابايا بتحتوي على انزيم هضمي اسمه بابين ليه تأثير مضاد للالتهابات.

البابايا بيحتوي كمان على كميات من البوتاسيوم وفيتامين B, والفولات, وكلها عناصر مفيدة للصحة العامة.

12- الكيوي:

الكيوي زي البابايا مليان بشكل طبيعي بالعناصر الغذائية الاساسية, بما فيهم حمض الفوليك والبوتاسيوم وفيتامين C اللي بيساعد على تعزيز خلايا الدم البيضا لمحاربة العدوى, والعناصر الغذائية الباقية اللي موجودة في الكيوي بتحافظ على عمل باقي الجسم بشكل صح.

13- الدواجن:

لما تكوني مريضة شوربة الفراخ هتكون اكتر من مجرد وجبة, شوربة الفراخ بتساعد على تحسين اعراض البرد, وبتساعد على حمايتك من الاصابة بالمرض, الدواجن زي الفراخ, الديك الرومي, غني بفيتامين B6, وحوالي 85 جرام من لحم الديك الرومي او الفراخ بتحتوي على 40 – 50% من الكمية اليومية الموصي بيها من B6.

فيتامين B6 يعتبر مهم جدا في كتير من التفاعلات الكيميائية اللي بتحصل في الجسم, وكمان ضروري لتكوين خلايا الدم الحمراء, والشوربة المصنوعة من غلي عضم الفراخ بتحتوي على الجيلاتين والكوندرويتين والمواد الغذائية المفيدة لشفاء الامعاء وتقوية المناعة.

14- بذور عباد الشمس “اللب السوري”:

بذور عباد الشمس مليانة بالعناصر الغذائية, بما فيهم الفوسفور والمغنسيوم وفيتامين B6,  وكمان بتحتوي على نسبة عالية من فيتامين E, وهو واحد من مضادات الاكسدة القوية.

فيتامين E مهم جدا في تنظيم وظيفة الجهاز المناعي والحفاظ عليه, ومن الاطعمة التانية الغنية بفيتامين E الافوكادو, والخضروات الورقية اللي لونها اخضر غامق.

15- المحار:

المحار غني بالزنك, ويمكن يكون الزنك من العناصر اللي شهرتها اقل من باقي الفيتامينات والمعادن, ولكن اجسامنا محتاجاه عشان خلايا المناعة تشتغل بشكل صح.

ومن انواع المحار اللي بتحتوي على نسبة عالية من الزنك:

– الكابوريا.

– الرخويات.

– الاستاكوزا.

– بلح البحر.

ولكن لازم تحطي في اعتبارك انك متاخديش اكتر من الكمية اليومية الموصي بيها من الزنك, بالنسبة للرجال البالغين بيحتاجوا 11 ملليجرام من الزنك, والنساء بيحتاجوا 8 ملليجرام, لان الكمية الزيادة من الزنك ممكن تعمل نتيجة عكسية وتمنع وظيفة الجهاز المناعي.

التنوع في الاكل مهم جدا للوقاية من الامراض, يعني مش كفاية اكل نوع واحد بس من الاطعمة دي لمكافحة الانفلونزا او الامراض بشكل عام, حتى لو بتاكليه باستمرار, لازم تدخليهم كلهم في نظامك الغذائي,  وحطي في اعتبارك الكمية الموصي بيها من كل حاجة عشان متاخديش كمية كبيرة من فيتامين واحد وقليل جدا من باقي الفيتامينات.

شاي الاعشاب لبشرة نضرة ولصحة الامعاء وفوايد تانية كتير

فوايد شاي الاعشاب الجمالية والصحية