13 حيلة صباحية عشان تبدأي يومك صح

بقلمريهام محمود فيصحة visibility348

مهمة جدا الحاجات او العادات اللي بنعملها كل يوم الصبح في بداية اليوم, لانها هي اللي بتساعدنا نكمل يومنا بنشاط ويكون يوم منتج ونقدر نكمله للنهاية او العكس, والنهاردة من خلال موضوعنا هنقولك قايمة عادات صباحية تبدأي بيها يومك هتفرق معاكي جدا.

عادات صباحية تبدأي بيها يومك:

1- ضيفي ملح لقهوتك:

يمكن تكون معلومة غريبة وهي استبدال السكر في القهوة بالملح, الحقيقة ان فعلا الملح بيحسن طعم القهوة وبيقلل من المرارة بتاعتها, ده غير ان الملح يعتبر بديل صحي اكتر من السكر واللبن المليانين بالسعرات الحرارية, ولكن متبالغيش في كمية الملح يعني رشة صغيرة هتكون كافية جدا لتحقيق الطعم المثالي.

عادات صباحية تبدأي بيها يومك
عادات صباحية تبدأي بيها يومك

2- دخلي البيض في وجبة فطارك, حتى في القهوة:

من الحاجات اللي مشهورة جدا في دول كتير هي قهوة البيض يمكن تكون غريبة شوية, ولكن اضافة صفار بيضة نية للقهوة هتخلي طعمها حلو وكمان مفيدة جدا لجسمك, وحسب الدراسات ان الاشخاص اللي بياكلوا بيض الصبح بيكونوا اكتر نشاط من الاشخاص اللي مش بيدخلوا البيض في فطارهم, دمج البيض مع الكافيين هيديكي طاقة كبيرة جدا الصبح, وتقدري تاكلي البيض الصبح باي طريقة تانية تحبيها.

عادات صباحية تبدأي بيها يومك

3- جربي الشاي الاسود او الهوت شوكليت مع شوية قرفة:

لو انتي مش من محبين القهوة, تقدري تجربي كوباية شاي اسود, لانه بيحتوي كمان على الكافيين اللي بيساعد على تنشيط الجسم وزيادة التركيز, او تشربي كوباية من الهوت شوكليت مع اضافة شوية قرفة, القرفة هتساعد على التحكم في مستوى السكر في الدم, وده هيحافظ على مستويات الطاقة في الجسم طول اليوم من غير ما تحسي بارهاق.

عادات صباحية تبدأي بيها يومك

4- اشربي كوباية مية او مية بالليمون:

المية ضرورية جدا بغض النظر عن وقت شربها خلال اليوم, وشرب المية اول ما تصحي من النوم الصبح بيساعد على تحسين الاداء العقلي, لان الموضوع بيتعلق بعدم الترطيب لو الجسم مش مترطب كويس بيعمل تأثير عكسي تماما على ادائك خلال اليوم, ممكن كمان تجربي كوباية مية مع شرايح الليمون, هتساعدك على الترطيب والهضم وفقدان الوزن, وكمان الليمون بيحتوي على فيتامين C اللي يعتبر مفيد جدا للبشرة والجهاز المناعي, وتعتبر طريقة مثالية جدا تبدأي بيها يومك.

عادات صباحية تبدأي بيها يومك

5- دخلي الشوفان في وجبة فطارك:

الدراسات بتنصح كمان انك تدخلي الشوفان في وجبة الفطار, لانه هيزود طاقتك, وهيخليكي تحسي بالشبع, وهيساعدك تبدأي يومك بشكل مثالي,  والابحاث اظهرت ان الاشخاص اللي بياكلوا وجبة فطار عالية الكربوهيدرات بيبقوا اكتر نشاط ويقظة خلال النهار من الاشخاص اللي بياكلوا حاجات تانية, وكمان الالياف والبروتين مهمة جدا في وجبة الفطار.

عادات صباحية تبدأي بيها يومك

6- اسمعي موسيقى:

مافيش شك ان الموسيقى ممكن انها تأثر على مزاجنا, واظهرت الدراسات ان الموسيقى ممكن انها تخلينا نحس بالسعادة اكتر وتقلل من التوتر, وبالتالي بدء اليوم بالموسيقى هي افضل طريقة لرفع مزاجك وهتساعدك تستمري لباقي اليوم.

عادات صباحية تبدأي بيها يومك

7- خلي حواليكي الوان زاهية:

الخبراء صرحوا ان الوان المحيط اللي حوالينا بيأثر بشكل كبير جدا على مزاجنا, عشان كده بننصحك انك تختاري الالوان الزاهية للبيت كله وللفرش, خصوصا لو بيتك مافيهوش اضاءة كتير, حاولي تلبسي هدوم بألوان زاهية ومشرقة وهتلاحظي تغير مزاجك, وهتحسي انها بترفع مودك, ولو كمان مشيتي على نظام غذائي صحي, هيعمل فرق كبير جدا في يومك.

عادات صباحية تبدأي بيها يومك

8- حضري هدومك من بالليل:

تجهيز هدومك اللي هتلبسيها تاني يوم من بالليل هيوفرلك في الوقت الصبح, وهيقلل عليكي الضغط اللي بيبقى عليكي الصبح وهتبقي مرتاحة ومش مستعجلة, وهيديكي وقت انك تعملي وجبة فطار وتستمتعي بيها وتعملي اي حاجة تانية الصبح لان هيبقى عندك وقت كافي.

9- حطي خطة لليوم واعرفي اولوياتك:

حاجة كمان هتساعدك على توفير الوقت وانك تعملي حاجات اكتر خلال اليوم وهي التنظيم, اكتبي قايمة بالحاجات اللي عايزة تنجزيها خلال اليوم, ورتبيها من الاكتر اهمية للاقل اهمية, لو عملتي كده هتبقي مرتاحة خلال اليوم ومش مضغوطة, وهتعملي كل حاجة صح وهتخلصي كل اللي وراكي على نهاية اليوم.

10- حطي المنبه بعيد عنك:

الافضل انك تخلي المنبة بعيد عن ايدك يعني متحطيهوش جنب السرير, لان ده هيساعدك انك تقومي على طول عشان تطفيه وبالتالي هتفوقي بشكل اسرع, لان لو جنبك ممكن تتطفيه وتنامي شوية وتبقي مكسلة, ولكن مجرد ما انتي تقومي من السرير عشان تطفيه ده هيساعدك تبدأي يومك اسرع.

11- خدي مكسرات معاكي في الشنطة:

المكسرات غير المحلاه وغير المملحة كمان, تعتبر وجبة خفيفة صحية جدا تبدأي بيها يومك, ولانها غنية بالدهون والكربوهيدرات والبروتين, فهي بتساعد على زيادة مستويات الطاقة وهتخليكي تحسي بالشبع, وتبقي مستعدة لليوم.

12- اعملي تمارين سريعة وانتي بتغسلي اسنانك:

اضافة التمارين لروتينك الصباحي من الحاجات اللي هتساعدك على الصحيان بشكل اسرع لانها بتزود طاقة الجسم وبتقلل من التعب والاجهاد والمشاعر السلبية, ولو مش هتقدري تضيفي تمرين كامل, تقدري تجربي التمرين لمدة من 2 – 5 دقايق اثناء ما انتي بتعملي حاجات تانية, مثلا تقدري تعملي سكوات, او تسندي على الحيطة في الحمام وتنزلي بجسمك لتحت وانتي بتغسلي اسنانك.

13- دخلي اشعة الشمس في الاوضة:

ثبت علميا ان ضوء الشمس الطبيعي بيحسن المزاج, وبيحفز اجسامنا عشان توقف انتاج الميلاتونين الهرمون اللي بيساعدنا على النوم, وبالتالي هنبقى اكتر نشاط, فلو عايزة تبدأي يومك بشكل مشرق وسعيد, افتحي الستاير وخلي ضوء الشمس يدخل الاوضة او حتى الخروج والاستمتاع بضوء الشمس.

6 حيل يابانية لتحسين الصحة بيعملها كل اليابانيين

حيل يابانية لتحسين الصحة