طريقة عمل فراخ باربكيو على الطريقة الكورية
المطبخ الكوري من المطابخ المميزة جدا والمختلفة, واللي بقى ليه انتشار واسع جدا الفترة الاخيرة, ولو انتي من عشاق الاكلات الكوري, النهاردة هنشوف مع بعض طريقة عمل فراخ باربكيو على الطريقة الكورية.
فراخ باربكيو على الطريقة الكورية:
المكونات:
– 450 جرام اوراك فراخ من غير جلد “وتقدري تستخدمي اي قطع من الفراخ من اختيارك”.
– 3 معالق كبيرة صويا صوص.
– 1 ½ معلقة كبيرة سكر بني.
– 1 معلقة كبيرة خل.
– ¼ كوباية سبرايت “او ممكن تستخدمي سفن اب, او اي نوع من انواع الصودا بالليمون”.
– ½ معلقة كبيرة ثوم مفروم.
– 1 معلقة صغيرة جنزبيل مفروم.
– 1 معلقة صغيرة من زيت السمسم.
– فلفل اسود.
طريقة التحضير:
1- قطعي الفراخ لقطع صغيرة, ولو هتعمليها على الجريل خلي التقطيع والحجم حسب نوع الجريل بتاعك وشكله وحسب الحجم اللي تفضليه.
2- في طبق كبير جهزي التتبيلة اخلطي الصويا صوص, السكر البني, الخل, السبرايت, الثوم, الجنزبيل, زيت السمسم, الفلفل الاسود, وقلبيهم مع بعض كويس, تبلي قطع الفراخ وغطيها كويس بالخليط, وسيبي الفراخ منقوعة في التتبيلة لمدة 4 ساعات على الاقل او من بالليل للصبح عشان النكهة تبقى اقوى والفراخ تشرب من التتبيلة كويس.
3- في طاسة كبيرة حطي الفراخ على النار “ولو هتعمليها على الشواية, اشويهم بالطريقة العادية اللي متعودة تشوي بيها”, متحطيش التتبيلة بتاعة الفراخ كلها خلي منها جزء, وسيبي الفراخ على حرارة عالية الاول شوية وبعدين قللي الحرارة لمتوسطة لحد ما الفراخ تستوي.
4- هاتي باقي التتبيلة اللي انتي سبتيها حطيها في طاسة تانية, واغليها لمدة من 2 – 3 دقايق على نار متوسطة مع التقليب كل شوية, ارفعي الصوص من على النار وصفيه من اي قطع وخليه في طبق على جنب.
5- حطي الفراخ في طبق التقديم وصبي عليها الصوص من فوق.
6- ممكن تقدمي الفراخ مع خضار سوتيه من اختيارك وارز, او تاكليها مع طبق سلطة بس لو عايزة وجبة خفيفة.