25 حاجة في العلاقة الزوجية اهم من العلاقة الحميمية

ريهام محمود
ريهام محمود
19616

مع مرور الوقت بين اي زوجين ممكن انه الشغف بالعلاقة الحميمية يبدأ يقل شوية بشوية, ولكن اي زوجين ممكن يعيشوا حياة حلوة وسعيدة وايجابية حتى لو قلت بينهم العلاقة الحميمية مع الوقت, لو ركزوا على حاجات تانية مهمة, وده اللي هنعرفه النهاردة من خلال السطور الجاية هنقولك على حاجات اهم من العلاقة الحميمية هتحافظ على علاقة زوجية وحياة سعيدة.

حاجات اهم من العلاقة الحميمية:

اظهرت دراسة ان الازواج اللي بينهم تواصل وبيسمعوا بعض دايما علاقتهم سعيدة اكتر وراضيين عنها, حتى ان ده بيجي قبل العلاقة الحميمية في نجاح العلاقة.

1- في احترام متبادل بينكم:

انتي وشريكك اشخاص مختلفين, ولكن كل واحد فيكم متفهم الاختلاف ده وانه لازم يكون موجود, وان كل طرف مش بيفرض وجهة نظره او رايه على التاني, والعلاقة الجيدة او الناجحة مش بتقوم على ان الطرفين بيحبوا وبيكرهوا نفس الحاجات ولكن على احترام الاختلاف.

2- عايزين نفس الحاجات:

على الرغم من الاختلاف, ولكن انتي وشريكك دايما في نفس الصفحة او على نفس الخطة لما الموضوع يتعلق بعلاقتكم, في النهاية عندكم نفس الهدف وعايزين نفس الحاجة, وعشان تعيشوا حياة سعيدة ومتناغمة وتستمر برغم قلة الشغف اللي ممكن يحصل في العلاقة الحميمية, لازم تكونوا في نفس الصفحة او مشتركين في نفس الاهداف.

3- كل واحد بيقدر يعبر عن مشاعره للتاني:

تقدري تعبري عن مشاعرك وارائك لشريكك بكل صراحة وحرية, لان التعبير عن النفس مش بس في العلاقة الحميمية, ولكن كمان في محادثاتك اليومية مع شريكك, انه يكون دايما بينكم محاداثات حقيقية, انك تناقشي معاه اللي بيسعدك وبيحبطك, او تطلبي منه رايه في حاجة او مشكلة معينة, او تفكري معاه في امور الحياة كلها.

4- بتسمعوا بعض:

التواصل الجيد انك انتي وشريكك تسمعوا بعض, لو كنتي متضايقة من اي حاجة تقدري انك تتكلمي مع شريكك بكل حرية من غير خوف من انه يحكم عليكي او يأنبك او يجرحك.

5- بتدعموا بعض:

وجود شريك قوي مدى الحياة ده معناه ان عندك دعم في اي مشكلة او اي حاجة تمري بيها, وانه دايما يبقى عندك شخص تلجأي له في اي حاجة صعبة تمري بيها, وانتوا الاتنين تبقوا اكبر داعم لبعض في الحياة, وتبقي انتي اول حد بيلجأ له في اي حاجة بيمر بيها وبيشاركك كل حاجة.

كل واحد فيكم اكيد بيكون ليه دور والتزامات في الحياة, ولكن بترجعوا لبعض لو اي واحد منكم مقدرش انه يعمل اللي هو ملتزم بيه او واجبه المكلف بيه, على سبيل المثال, لو الزوجة مقدرتش تقعد مع الاولاد عشان تنيمهم ووراها حاجة تانية مهمة في شغلها او حاجة في البيت, يبقى دور الزوج هنا انه يقوم بالمهمة دي بدالها.

حاجات اهم من العلاقة الحميمية 1
حاجات اهم من العلاقة الحميمية 1

6- شكر الطرف التاني:

لازم الطرفين يشكروا بعض على اللي بيقدمه الطرف التاني, الزوج لازم يشكر مراته على الاكل اللي بتعمله ويقولها كلمة حلوة انها تعبت وعملته, وانتي متفوتيش اي فرصة في تشجيع زوجك وتحفيزه في كل خطوة جديدة بيعملها.

7- ضحكوا بعض:

متبقيش قلقانة انك تظهري قدام شريكك مضحكة او غير جذابة بالنسبة له, بالعكس, الضحك والهزار طول الوقت الحياة بيخلي الحياة اقل ارهاق وبيخفف من ضغوط الحياة, والدراسات على مدى سنين طويلة اثبتت ان الازواج اللي بيضحكوا بعض بيعيشوا مع بعض فترة اطول, وبيكون بينهم ترابط اكتر وبيخلقوا جو ايجابي بينهم لما بيدوروا دايما على الحاجات المسلية والايجابية في حياتهم اليومية مع بعض.

8- تجربة الحاجات الجديدة:

الازواج اللي بيحبوا يجربوا حاجات جديدة سواء داخل او خارج غرفة النوم علاقتهم بتبقى اقوى, لان العلاقة الحميمية ممكن يمر عليها وقت وتبقى روتينية, فالبتالي تجربة حاجات جديدة امر مطلوب عشان تحافظوا على العلاقة مثيرة وتطلعوا من دايرة الروتين والملل, والدراسات اثبتت ان الازواج اللي بيجربوا حاجات جديدة علاقتهم بتستمر اكتر.

9- بتعرفوا تقضوا وقت حلو مع بعض:

تعملوا ايه لما ميكونش في علاقة حميمية؟ الازواج يقدروا يقضوا وقت حلو وممتع مع بعض حتى من غير العلاقة الحميمية, بانكم تعملوا كل حاجة مثيرة للاهتمام مع بعض, ومش مهم الوقت ده فين سواء هتسافروا في اجازة رومانسية او حتى هتقضوه في البيت, ولكن المهم انكم بتعرفوا تقضوا وقت حلو مع بعض.

10- بتحبي تحضني شريكك كتير:

تحضني شريكك كتير وبتحبي دايما تبقي قريبة منه,وتبقي مرتاحة انك تلمسيه وتحضنيه حتى في الاماكن العامة, او ماشيين مع بعض في مكان تبقوا ماسكين ايد بعض, او حاطط ايده على كتفك وهو قاعد جنبك بيقرا كتاب مثلا او بتتفرجوا على التليفزيون مع بعض.

حاجات اهم من العلاقة الحميمية 2
حاجات اهم من العلاقة الحميمية 2

11- انك تكوني واقعية في توقعاتك:

لازم توقعاتك تبقى واقعية في علاقتك, ومتطلبيش من شريكك انه يعمل كل حاجة عشان يديكي حياة ترضي عنها, لان لازم العطاء يكون من الطرفين, ولازم حياتك تكون مليانة بالاشخاص اللي بيحبوكي ويهتموكي بيكي سواء من الاهل او الاصحاب, وشريكك يعرف انه مش هو بس مصدر السعادة في حياتك او هو بس اللي يقدر يخليكي مبسوطة.

12- كل طرف يكون جزء من الحياة الاجتماعية للطرف التاني:

الدراسات اثبتت ان الازواج اللي بيختلطوا مع مجموعة مختلفة الاصدقاء بتكون علاقتهم اعمق وحياتهم الزوجية افضل, يعني تخرجوا مع اصحابكم كجروب وتقضوا وقت حلو, لانه مهم ان كل طرف يحس انه جزء من الحياة الاجتماعية بتاعة الطرف التاني, ده بيقوي الاتصال بين الزوجين.

13- بتثقوا في بعض:

العلاقة اللي مش بيكون فيعا ثقة بيبقى كلها شك, وبغض النظر عن ان العلاقة الحميمية بينكم كويسة, لكن هتبقى باستمرار في حالة شك وقلق من الشريك وممكن توصل لحالة المطاردة, ولكن لو في ثقة اكيد ده مش هيحصل ومش هتتهميه بحاجات مالهاش اساس من الصحة لو مثلا في مرة اتأخر في الرد على رسالتك او مردش على مكالمتك.

14- مخلصين لبعض:

الثقة اكيد مرتبطة بالاخلاص والوفاء, يعني عشان النقطة اللي فاتت تتحقق وهي الثقة لازم يكون في اخلاص من الطرفين لبعض.

15- بتغفروا لبعض:

طبيعي جدا بين اي زوجين يبقى في مشاكل وخلافات, لان البشر مش كاملين وكلنا بنغلط, ولكن لو انتي من النوع المتسامح علاقتك هتكون قادرة على تجاوز اي مشاكل في العلاقة.

حاجات اهم من العلاقة الحميمية 3
حاجات اهم من العلاقة الحميمية 3

16- بتتقبلي غلطاتك وبتتعلمي منها:

انك تسامحي نفسك على غلطاتك دي حاجة كويسة, ولكن من الافضل لو عايزة العلاقة دي تستمر وتنمو, يبقى لازم تتعلمي من غلطاتك ويبقى في نضج والتزام بعدم تكرارها.

17- اختاري الحاجات اللي ممكن تقفي عندها:

لازم تعرفي انك مش كل حاجة المفروض تقفي عندها, الافضل انك تختاري الحاجة اللي فعلا تقفي عندها بدل الجدل والخناق على كل حاجة, لانك محتاجة انك تعيشي حياة متناغمة وايجابية اكتر من انك تثبتي بس انك على حق.

18- تبقي افضل صديقة لشريكك:

مش دايما هيكون عندك افضل اللحظات الحميمية بينك وبين زوجك, ولكن علاقتك ممكن تدوم لو كنتي افضل صديقة لشريكك, لان الاصدقاء بيثقوا في بعض, ومش بيخافوا يبانوا ضعفا قدام بعض وبيقبلوا نقط ضعف بعض.

19- مش بتعتمدوا على بعض اعتماد كلي:

حتى لو شريكك هو افضل صديق ليكي, مش المفروض انك تعيشي حياتك معتمدة اعتماد كلي عليه, لازم تدوا لبعض شوية مساحة, وكل واحد يقضي وقت خاص بيه ده ضروري جدا.

20- تبقوا شغوفين ببعض:

الشغف مش معناه بس العلاقة الحميمية في السرير, الشغف متعلق كمان بحل مشاكلك في العلاقة, خصوصا لو بتمروا بمشاكل دايما او العلاقة مش سلسلة.

حاجات اهم من العلاقة الحميمية 4

21- كريمة وبتفكري في شريكك دايما:

انك تجيبي له حاجة يكون بيحبها, ومش شرط ابدا تكون حاجة غالية, ممكن تبقى حاجة بسيطة جدا ولكن يتبسط بس انك دايما بتفكري تسعديه وده اكيد من الطرفين, يعني ممكن كل واحد يسيب للتاني رسالة فيها كلام حلو في مكان هيشوفه في الشنطة او في جيبه, او كل طرف يبعت للتاني رسالة على تليفونه في نص اليوم, عشان كل طرف يحسس التاني بس انه بيفكر فيه.

22- كل واحد يبقى الامان بالنسبة للتاني:

اللحظات الحميمية اكيد مهمة وبتحسي بعدها برضا وامان, ولكن علاقتك ممكن تبقى اعمق لو وفرتي مساحة آمنة لشريكك, والمكان الآمن هو المكان اللي بتحسي فيه بالحب والقبول وانك تكوني نفسك, بغض النظر عن اخطائك ونقط ضعفك.

23- مارسوا التمارين الرياضية مع بعض:

حسب الدراسات ان 905 من الازواج اللي بيمارسوا الرياضة مع بعض علاقتهم بتبقى اقوى, وحتى علاقتهم الحميمية بتبقى افضل, لان الرياضة مش بتحسن لياقتك البدنية بس, لكن كمان بتحسن الطاقة والرغبة الجنسية.

24- بتشاركوا بعض تفاصيل اليوم:

ممكن تبان حاجة بسيطة انك تسألي زوجك عن تفاصيل يومه, ولكن الطريقة دي فعلا فعالة جدا لبناء علاقة ايجابية بين الزوجين, وخبراء العلاقات بيقولوا ان مشاركة الدردشة الصغيرة او البسيطة كل يوم بتقوي العلاقة بين الزوجين جدا.

25- بتحبوا بعض بجد:

صعب جدا اننا نوصف الحب الحقيقي في كلمات, ولكن اكيد هتقدري تعرفيه مجرد ما يكون موجود في علاقتك, لان لو مافيش علاقة حميمية او قلت مع مرور الوقت العلاقة مش هتستمر لو الحب مش موجود.

حاجات اهم من العلاقة الحميمية 5

في النهاية العلاقة الطويلة والدائمة والايجابية بتحتاج اكتر من العلاقة الجسدية عشان تستمر, لان الازواج اللي بيوصلوا لمرحلة تجاوز الجانب المادي او العلاقة الحميمية اكتر ارتباط بسبب كل الحاجات اللي بيشاركوها مع بعض بره غرفة النوم.

حاجات اهم من العلاقة الحميمية 6

7 علامات للعلاقات القوية لو موجودة في علاقتكم يبقوا انتوا بتعيشوا علاقة من حديد

7 علامات للعلاقات القوية لو موجودة في علاقتكم يبقوا انتوا بتعيشوا علاقة من حديد
7 علامات للعلاقات القوية لو موجودة في علاقتكم يبقوا انتوا بتعيشوا علاقة من حديد

مقالات متعلقه

جمل لو قولتيهم لشريكك هتخليه يدوب في حبك

جمل لو قولتيهم لشريكك هتخليه يدوب في حبك

حركات وتصرفات هتخلي شريكك يحبك بشكل جنوني

حركات وتصرفات هتخلي شريكك يحبك بشكل جنوني

6 تصرفات انثوية شريكك بيحبها اكتر من اي حاجة تانية

6 تصرفات انثوية شريكك بيحبها اكتر من اي حاجة تانية