لو شعرك بيقع وضوافرك ضعيفة ومش بتطول كلي الاكلات دي هتعالج لك كل المشاكل
زي ما دايما بنقول لكل بنات ان الجمال لازم يبدأ من جوه قبل بره, وشعرك وضوافرك من اكتر الحاجات اللي ممكن تقولك حاجات عن صحتك وايه اللي بيحصل جوه جسمك, وعشان شعرك يبقى قوي وبيلمع وميقعش وضوافرك تبقى قوية وتطول بسرعة, لازم نظامك الغذائي يبقى غني بكميات كبيرة من الفيتامينات والبروتينات والاحماض الدهنية اوميجا 3 والبيوتين وغيرها من العناصر المهمة, والنهاردة من خلال السطور الجاية هنعرف مع بعض اهم اكلات لصحة الشعر والضوافر.
اهم اكلات لصحة الشعر والضوافر:
1- البيض:
البيض مصدر غني جدا بالبروتينات وكمان بفيتامين A وفيتامين E, والعناصر دي بتساعد على التحكم في تساقط الشعر وتكسر الضوافر.
الكمية اللازمة للجسم:
كلي يوميا بيضتين مسلوقين او اومليت كوجبة خفيفة خلال اليوم.
2- اللبن:
المستويات المنخفضة من فيتامين D في الجسم ممكن انها تأدي لتساقط الشعر وتكسر الضوافر, كمان نقص الحديد في الجسم بيأدي ان الضوافر تبقى ضعيفة وتتكسر بسهولة, واللبن واحد من الاطعمة الغنية بالبروتين والكالسيوم والفيتامينات اللي بتساعد على منع تساقط الشعر وتكسر الضوافر.
الكمية اللازمة للجسم:
اشربي يوميا كوباية لبن او دخلي اي منتج من منتجات الالبان في وجبة الفطار.
3- بذور الكتان:
بذور الكتان هي مصدر غني جدا بالاوميجا 3 الدهنية اللي بتزود نمو الشعر وبتساعد على تقوية الضوافر.
الكمية اللازمة للجسم:
انقعي من 2 – 3 معالق كبيرة من بذور الكتان في كوباية مية, سيبيه منقوع من بالليل للصبح, وتاني يوم صفي بذور الكتان, واشربي المية بتاعته كل يوم قبل وجبة الفطار.
4- سمك السلمون:
سمك السلمون غني بالاحماض الدهنية اوميجا 3 وفيتامين D, وده بيساعد على الحفاظ على ترطيب فروة الراس وبيقلل من الجفاف والتكسر, وده بالتالي بيساعد على الحفاظ على صحة فروة الشعر وفروة الراس وكمان الضوافر.
الكمية اللازمة للجسم:
كلي سمك السلمون كوجبة غدا مرة او مرتين في الاسبوع.
5- الشوفان:
الشوفان بيحتوي على نسبة عالية من فيتامين E, اللي بيساعد ان الضوافر يبقى لونها وردي وصحي وبيساعد على نموها بشكل قوي وصحي, بيساعد الشعر كمان انه يبقى اكتر مرونة وبيمنع الضرر, وبالتالي هيساعد على الحفاظ على شعر كثيف وطويل.
الكمية اللازمة للجسم:
كلي كوباية من الشوفان يوميا كجزء من وجباتك الخفيفة المسائية.
6- البابايا:
العناصر الغذائية الموجودة في البابايا بتمنع تساقط الشعر, والبابايا تعتبر مصدر غني بالبروتينات اللي بتمنع تساقط الشعر وتكسر الضوافر.
الكمية اللازمة للجسم:
كلي طبق من البابايا كجزء من وجبة الفطار, او كوجبة خفيفة بين الغدا والعشا.
7- السبانخ:
الخضروات الورقية الخضرا بشكل عام ومن ضمنها السبانخ بتمنع تساقط الشعر وهشاشة الضوافر, لانها غنية بالحديد وفيتامين C اللي بتساعد على الحفاظ على صحة الشعر وفروة الراس.
الكمية اللازمة للجسم:
اشربي كوباية من عصير السبانخ كجزء من وجبة الفطار يوميا, وتقدري كمان تطبخيه وتاكليه كجزء من وجبة الغدا.
8- الطماطم:
الطماطم بتحتوي على فيتامين A, B, C, وهي تعتبر مهمة جدا لشعر قوي وصحي, وبتساعد على لمعان الشعر ومنع قشرة الشعر, وتقوية الضوافر.
الكمية اللازمة للجسم:
كلي طبق سلطة طماطم يوميا في وجبة الغدا والعشا.
تقدري كمان تدخلي في نظامك الغذائي العناصر دي:
– البيوتين: موجود في الموز, الفاصوليا, الفول, القرنبيط, العدس, الفول السوداني.
– احماض اوميجا 3 الدهنية: موجودة في السردين, التونة, الجوز.
– البروتينات: موجودة في الفراخ, اللحوم الحمرا الخالية من الدهون, فول الصويا, الحبوب الكاملة, المأكولات البحرية.
– فيتامين A: موجود في المشمش, البروكلي, المانجا, الجزر, البطاطا.
– الزنك: موجود في الكاجو, المحار, الاستاكوزا, اللحوم الحمرا, البقوليات, المكسرات, البيض, الشوكولاتة الغامقة, منتجات الالبان.
انتي محتاجة تاكلي الخلطة دي لو بتعاني من تساقط الشعر وضوافرك ضعيفة بتتكسر ومش بتنامي كويس
