طريقة عمل مقشر البيكنج بودر الكوري بمكونات طبيعية في البيت
يمكن يكون في كتير مننا سمع عن سكراب البكينج بودر الكوري وفوايده للبشرة, في ازالة الرؤوس السودا, وتنضيف المسام بعمق, تقشير البشرة والتخلص من خلايا الجلد الميت, وتفتيح البشرة, علاج حب الشباب, وبما ان السكراب ده مش دايما متوفر هنا في مصر, النهاردة هنقولكم طريقة عمل مقشر البيكنج بودر بمكونات طبيعية في البيت, وهنعرف طرق تانية كمان لاستخدام البكينج بودر لجمال بشرتك.
طريقة عمل مقشر البيكنج بودر الكوري:
1- مقشر البيكنج بودر:
اخلطي معلقتين من البيكنج بودر مع معلقتين من الشوفان, واعجينهم مع بعض بالمية لحد ما يتكون عندك خليك سميك, رطبي بشرتك بالمية وحطي الخليط على البشرة ودلكيها في حركات دائرية من 3 – 4 دقايق وبعدين اغسليها بالمية, والمقشر ده ينفع للوش وللجسم كله.
2- غسول البيكنج بودر:
ممكن تستخدميه كغسول اخلطي معلقتين من البيكنج بودر مع معلقة مية دافية وقلبيهم مع بعض, رطبي وشك بالمية ودلكيه بالخليط في حركات دائرية, وبعدها اغسلي بشرتك بمية دافية, وبعدها بمية باردة او مرري مكعب تلج على بشرتك عشان تقفلي المسام.
3- تفتيح البشرة:
اخلطي معلقتين من البيكنج بودر مع معلقة من عصير الليمون وكام نقطة من زيت الزيتون, وزعي الخليط على البشرة, وسيبيه 10 دقايق وبعدين اغسليه بالمية.
4- علاج حب الشباب:
اخلطي البكينج بودر مع مية دافية لحد ما يتكون عندك معجون سهل الفرد على البشرة, وزعيه على بشرتك وسيبيه 10 دقايق, وبعدين اغسليه بالمية, الوصفة دي هتساعد على تخفيف التهاب حب الحبوب وازالة الرؤوس السودا.
5- علاج حروق الشمس:
اخلطي كمية من البيكنج بودر مع مية باردة بحيث ان الخليط يكون عندك سائل, هاتي قطعة قطن اغمسيها في الخليط واعملي كمادات للمناطق اللي بتعاني من حروق الشمس.
6- تنعيم القدمين:
هاتي طبق كبير حطي فيه شوية مية دافية بحيث تغطي الرجل, وضيفي لها فنجان من البيكنج بودر, وانقعي رجلك فيها لحد ما تلاقي المية بردت, طلعيها واستخدمي الحجر او مبرد القدمين عشان تتخلصي من كل الجلد الميت, بعدها نشفيها وادهنيها بكريم مرطب قوي, الوصفة هتساعد على تنضيف وتنعيم القدمين بشكل كبير جدا.
